သျှမ်းပြည် လားရှိုးမြို့နယ် နမ့်ပေါင်တိုက်နယ်တွင် အမျိုးသမီး ၁ ဦး လက်နက်ကြီးထိမှန်ပြီး ပွဲချင်းပြီး သေဆုံးသွားကြောင်း စုံစမ်းသိရသည်။
ယမန်နေ့ (နိုဝင်ဘာ ၃၀ ရက်) နံနက် ၁၁ နာရီအချိန်ခန့်တွင် လားရှိုးမြို့နယ် နမ့်ပေါင်တိုက်နယ်ရှိ ဟိုနားကုန်းသာရွာတွင် လက်နက်ကြီးကျကာ အသက် ၂၇ နှစ်အရွယ်ရှိ နန်းကြည်ကို ထိမှန်ပြီး ပွဲချင်းပြီး သေဆုံးသွားကြောင်း လားရှိုးမြို့နယ် နမ့်ပေါင်ဒေသခံများက ပြောသည်။
“မနေ့ မနက်က သူတို့တောင်ယာထဲမှာ ပြောင်းဖူးချိုးနေတဲ့အချိန် ဘယ်ကပစ်လာမှန်းမသိတဲ့ လက်နက်ကြီး ကျလာပြီးတော့ ခြံထဲမှာပဲ ပွဲချင်းပြီးသေတာ”ဟု လားရှိုးမြို့နယ် နမ့်ပေါင်ဒေသခံတစ်ဦးက သျှမ်းသံတော်ဆင့်ကို ပြောသည်။
လက်နက်ကြီး ထိမှန်သေဆုံးခဲ့သည့် အမျိုးသမီးသည် ပခုံးထိမှန်ဒဏ်ရာဖြင့် ပွဲချင်းပြီး သေဆုံးသွားခဲ့ကာ အခြားသူများ ထိခိုက်ဒဏ်ရာ ရရှိမှုမရှိကြောင်း နမ့်ပေါင်ဒေသခံက ဆက်ပြောသည်။
ပြီးခဲ့သည့် နိုဝင်ဘာလဆန်းပိုင်းက လားရှိုးမြို့နယ် နမ့်ပေါင်တိုက်နယ်ရှိ စစ်ကောင်စီတပ် ခလရ -၂၉၁ နှင့် ရဲစခန်းတို့ကို ညီနောင်မဟာမိတ်များက ဝင်ရောက်တိုက်ခိုက်ခဲ့ပြီးနောက် နမ့်ပေါင်ကျေးရွာ အုပ်စုအတွင်းသို့ စစ်ကောင်စီတပ်ဖွဲ့မှ နယ်မြေဝင်ရောက် ရှင်းလင်းခဲ့စဉ် လမ်းမပေါ်ရှိ အမျိုးသား ၅ ဦးကို ဖမ်းဆီးခေါ်ဆောင်သွားခဲ့ပြီး ရွာသားများမှာ ထွက်ပြေးတိမ်းရှောင်ခဲ့ရသည်ဟု ဒေသခံများထံမှ သိရသည်။
“ဒီဘက်မှာ တိုက်ပွဲမဖြစ်ဘဲနဲ့ ခလရ – ၂၉၁ တပ်ကပစ်တဲ့ လက်နက်ကြီးကတော့ နေ့တိုင်းကျနေတာ၊ အဝေးကနေ တစ်ချက်တစ်ချက် အသံကြားနေရတာ။ ဘယ်ဘက်တွေ ကျလဲတော့ မသိဘူး၊ ရွာသားတွေလဲ ရွာပြင် မထွက်ရဲကြတော့လေ။ စစ်ကောင်စီတပ် နဲ့ နီးတဲ့အိမ်တွေတော့ အခုထိ ပြန်မလာရဲကြသေးဘူး။ ညဆို ဘုန်းကြီးကျောင်းမှာပဲ သွားအိပ်တယ်၊ နေ့လယ်ကြတော့ ကိုယ်စီ အလုပ်ပြန်လုပ်ကြတာပေါ့။ အခုတလော နှစ်ဘက်စလုံးက စစ်ရေးလှုပ်ရှားတာတော့ ရှိတယ်”ဟု လားရှိုးမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လားရှိုးမြို့နယ်တွင် “၁၀၂၇ စစ်ဆင်ရေး” တစ်လတာ ကာလအတွင်း လက်နက်ကြီး ထိမှန်မှုကြောင့် အမျိုးသမီး ၁၀ ဦးနှင့် ကလေး ၁ ဦးအပါအဝင် စုစုပေါင်း ၁၆ ဦး သေဆုံးခဲ့ပြီး ၁၀ ဦးထက်မနည်း ထိခိုက်ဒဏ်ရာရရှိကာ ၆ ဦး ဖမ်းဆီးခံခဲ့ရကြောင်း သျှမ်းသံတော်ဆင့်မှ ရရှိထားသော စာရင်းများအရ သိရသည်။
Leave a Comments