သျှမ်းပြည် လောက်ကိုင်မြို့မှ ထွက်ခွာလာသည့် လူအုပ်ကြားထဲသို့ စစ်ကောင်စီတပ်မှ ရမ်းသမ်းပစ်ခတ်သည့် လက်နက်ကြီး ကျရောက်ပေါက်ကွဲမှုကြောင့် စစ်ဘေးရှောင် ၃ ဦး သေဆုံးသွားကြောင်း စုံစမ်းသိရသည်။
ပြီးခဲ့သည့် နိုဝင်ဘာလ ၂၇ ရက်တွင် လောက်ကိုင်မြို့အထွက် လေးမျက်နှာဘုရား တောင်ကုန်းပေါ်ရှိ စစ်ကောင်စီတပ်မှ လက်နက်ကြီး ရမ်းသမ်းပစ်ခတ်ခဲ့ရာ ချင်းရွှေဟော်မြို့ဘက်သို့ ဦးတည်ထွက်ခွာနေသည့် စစ်ဘေးရှောင်ယာဉ်တန်းပေါ်သို့ ကျရောက်ပေါက်ကွဲခဲ့ပြီး စစ်ဘေးရှောင် ၃ ဦး သေဆုံးခဲ့ကြောင်း လောက်ကိုင်မြို့မှ ထွက်ပြေးတိမ်းရှောင်လာသည့် စစ်ဘေးရှောင်များက ပြောသည်။
“ပြီးခဲ့တဲ့ ၂၇ ရက်နေ့က စစ်ကောင်စီက လေးမျက်နှာဘုရားကနေ ကိုးကန့်တပ်ကို လှမ်းပစ်တာထင်တယ်၊ အဲ့ထိမရောက်ဘဲနဲ့ လောက်ကိုင်ကနေ ထွက်လာတဲ့ ချင်းရွှေဟော်ဘက်သွားမယ့် ကားတန်းပေါ်ကျပြီး လူ ၃ ယောက် သေသွားတယ်လို့ပြောတယ်။ ထိခိုက်ဒဏ်ရာရတာကတော့ အများကြီးပဲ။ အဲ့မှာ ကားတွေပိတ်ပြီးတော့ ဝင်မရ ထွက်မရဖြစ်တာ၊ ညနေ ၃ နာရီထင်တယ် အဲ့အချိန် လက်နက်ကြီးကျလာတာပဲ”ဟု လောက်ကိုင်မြို့မှ ထွက်ခွာလာသည့် စစ်ဘေးရှောင်အမျိုးသားတစ်ဦးက သျှမ်းသံတော်ဆင့်ကို ပြောသည်။
အလားတူ နိုဝင်ဘာ ၂၂ ရက်ကလည်း လောက်ကိုင်မြို့အထွက် တုန်ချိန်နှင့် ဆယ်တန်ဂိတ်တို့တွင် လက်နက်ကြီး ကျရောက်ပေါက်ကွဲခြင်းကြောင့် ပြည်သူ ၈ ဦး သေဆုံးပြီး ၁၀ ဦးထက်မနည်း ထိခိုက်ဒဏ်ရာရရှိခဲ့ကြောင်း လောက်ကိုင်ဒေသခံများထံမှ သိရသည်။
နိုဝင်ဘာလ ၂၆ရက်မှ ၂၈ ရက်နေ့အထိ လောက်ကိုင်မြို့မှ ထွက်ခွာလာသည့် စစ်ဘေးရှောင်ဦးရေ ၃ သောင်းကျော်ခန့်ကို ချင်းရွှေဟော်မြို့မှတဆင့် ကယ်ထုတ်ပေးနေပြီး လားရှိုးမြို့နှင့် “ဝ” ဒေသ နမ့်တစ်မြို့ စသည့် လုံခြုံသည့်နေရာသို့ ပြောင်းရွှေ့ပေးခဲ့ကြောင်း ကိုးကန့်တပ်ဖွဲ့ MNDAA က ကိုးကန့်မီဒီယာမှ နိုဝင်ဘာ ၂၉ ရက်တွင် ထုတ်ပြန်ထားသည်။
ယခုရက်ပိုင်းအတွင်း လောက်ကိုင်မြို့ကို ဝင်ရောက်တိုက်ခိုက်တော့မည်ဟု ကိုးကန့်တပ်ဖွဲ့ MNDAA ဘက်မှ ထုတ်ဖော်ပြောကြားမှုကြောင့် လောက်ကိုင်မြို့အနီး တိုက်ပွဲများ ရက်ဆက်ဖြစ်ပွားနေရာ စစ်ကောင်စီတပ်မှ လက်နက်ကြီးများ အကြိမ်ကြိမ် ပစ်ခတ်နေသည့်အပြင် ကိုးကန့်တပ်ဖွဲ့ MNDAA သိမ်းပိုက်ထားသည့် စခန်းကုန်းအချို့ကိုလည်း လေကြောင်းမှ ပစ်ခတ်နေသောကြောင့် မြို့တွင်းနေ ဒေသခံပြည်သူ သောင်းနှင့်ချီ နေရပ်စွန့်ခွာပြီး စစ်ဘေးတိမ်းရှောင်နေကြရကြောင်း လောက်ကိုင်ဒေသခံများက ပြောသည်။
