သျှမ်းပြည် သီပေါမြို့နယ် ဘော်ကြိုရွာရှိ ဘော်ကြိုဘုရားကျောင်းတွင် တိုက်ပွဲကြောင့် ထွက်ပြေး တိမ်းရှောင်လာသည့် စစ်ရှောင်ကလေးများကို တအာင်း (ပလောင်) တပ်ဖွဲ့ TNLA နှင့် ပြည်သူ့ကာကွယ်ရေးတပ်ဖွဲ့ PDF တို့မှ စစ်မှုထမ်းရန် အတင်းအကျပ် ခြိမ်းခြောက်နေကြောင်း ဆိုသည့် သတင်းအမှား ဖြန့်ဝေနေသည်။
စစ်ကောင်စီ ဝါဒဖြန့်တယ်ရီဂရမ် ချယ်နယ်ဖြစ်သည့် Lashio thar ဆိုသည့်အကောင့်တစ်ခုမှ “ သောင်းကျန်းသူပုန် “ TNLA၊ PDF “ တို့မှ ရှမ်းတိုင်းရင်းသား အသက် (၁၀) နှစ်အထက် စစ်ဘေးရှောင် ကလေးသူငယ်များကို စစ်မှုထမ်းရန် အတင်းအကျပ် ခြိမ်းခြောက်နေကြောင်း “ ဟုဆိုကာ ပြည်သူလူထုကို လှည့်ဖြားမှားယွင်းစွာ တင်ဆက်ချက်ဖြင့် ချဲ့ကားရေးသား ဖြန့်ဝေနေသည်။
Archive Link – https://archive.ph/NK9po
သျှမ်းသံတော်ဆင့် အချက်အလက် စစ်ဆေးသည့် အဖွဲ့အနေဖြင့် စစ်ရှောင်ကလေးများကို တအာင်းတပ်ဖွဲ့ TNLA နှင့် ပြည်သူ့ကာကွယ်ရေးတပ်ဖွဲ့ PDF မှ စစ်မှုထမ်းရန် အတင်းအကျပ် ခြိမ်းခြောက်နေသော သတင်းကို စီစစ်ဆေးမှု ပြလုပ်ခဲ့သည်။ ယင်းမှာ မှားယွင်းနေကြောင်းတွေ့ရသည်။
သျှမ်းမြောက်ဒေသတွင် “ ၁၀၂၇ စစ်ဆင်ရေး “ စတင်လာပြီးနောက်ပိုင်း သီပေါမြို့နယ် ဘော်ကြိုရွာရှိ ဘုန်းကြီးကျောင်းဝိုင်းမှာ TNLA တပ်သားများ လာရောက်ကင်းလှည့်လည် ဆောင်ရွက်နေခြင်းမှာ ယခု (နိုဝင်ဘာလ) ထဲတွင် နှစ်ပတ်ကျော် ကြာမြင့်ပြီ ဖြစ်ကြောင်း ဒေသခံများပြောချက်အရသိရသည်။
သို့သော် ဘုန်းကြီးကျောင်းရှိ အသက် (၁၀) နှစ်အထက် စစ်ရှောင်ကလေးငယ်များအပြင် ဒေသခံများကို စစ်မှုထမ်းရန် အတင်းအကျပ် ခြိမ်းခြောက်နေခြင်း မရှိကြောင်း ဘော်ကြိုဘုရားကျောင်းရှိ သီပေါမြို့စစ်ရှောင်တစ်ဦးက ပြောသည်။
“ ဘော်ကြိုကျောင်းဝိုင်းအနားမှာတော့ TNLA တပ်သားတွေရှိနေတာ ၂၀ ရက်ကျော်၊ လဝက်လောက်ရှိနေပြီ။ သူတို့ လုံခြုံရေးအရ၊ လမ်းအတိုင်း စစ်တပ်အင်အားဖြည့်လာမှာကို စိုးရိမ်လို့ထင်တယ်။ နေရာခွဲပြီး လေး၊ ငါး ယောက်လောက်စောင့်နေတာတွေ့တယ်။ ဆေးလာကုတယ်ဆိုတာလည်းမရှိဘူး။ စစ်မှုထမ်းတာခိုင်းတာလည်း မရှိဘူး “ ဟု ၎င်းက ယခုလိုပြောဆိုထားသည်။
အဆိုပါ သတင်းနှင့်ပတ်သက်၍ သီပေါမြို့နယ် ဘော်ကြိုဘုရားကျောင်းရှိ စစ်ရှောင်ကူညီသူထံ ဆက်သွယ်မေးမြန်ရာမှာ မဟုတ်မှန်ကြောင်းလည်း ပြောသည်။ သတင်းမီဒီယာလုပ်ငန်းစဉ်အတိုင်း လုပ်ဆောင်နေသည့် မီဒီယာများမှာလည်း ယင်းကိစ္စနှင့် ပတ်သက်ပြီး ရေးသားဖော်ပြထားခြင်း မရှိပေ။
ထို့ကြောင့် စစ်ရှောင်ကလေးများကို TNLA နှင့် PDF မှ စစ်မှုထမ်းရန် အတင်းအကျပ် ခြိမ်းခြောက်နေခြင်းဆိုသည့် သတင်းမှာ အမှားဖြစ်ပြီး၊ ပြည်သူလူထုကို လှည့်ဖြားမှားယွင်းတင်ဆက်ချက်ဖြင့် ချဲ့ကားရေးသား ဖြန့်ချိနေသည့် သတင်းမှား ဖြစ်သည်။
သျှမ်းသံတော်ဆင့် စာဖတ်ပရိသတ်များအနေဖြင့် လူမှုကွန်ရက်စာမျက်နှာများတွင် ဖော်ပြနေသည့် သတင်များကို ချက်ချင်းမယုံကြည်ဘဲ စိတ်ချရသော သတင်းမီဒီများတွင် သွားရောက်ဖတ်ရှု့ကြရန် တိုက်တွန်းပါသည်။
ထို့အပြင် စာဖတ်ပရိတ်သတ်များအနေဖြင့် (သတင်းအမှား) ဟု ယူဆရသည့် သတင်းများကိုလည်း သျှမ်းသံတော်ဆင့်ရဲ့ Chat Box မှ တစ်ဆင့် သတင်း၏ လင့်ခ် ( သို့ ) Screen Short ပေးပို့လာခြင်းဖြင့် စစ်ဆေးနိုင်သည်။
