သျှမ်းပြည် မူဆယ်မြို့နယ် ၁၀၅ မိုင် ကုန်သွယ်ရေးဇုန် အနီးတွင် တအာင်း (ပလောင်) အမျိုးသား လွတ်မြောက်ရေး တပ်မတော် ( TNLA ) နှင့် စစ်ကောင်စီတပ်တို့ တိုက်ပွဲ ဖြစ်ပွားရာ စစ်ကောင်မှ လေယာဉ်ဖြင့် ဗုံးကြဲ တိုက်ခိုက်မှုကြောင့် အမျိုးသမီး တစ်ဦး သေဆုံးသွားကြောင်း စုံစမ်းသိရသည်။
ယမန်နေ့ (နိုဝင်ဘာလ ၂၈) ရက် မွန်းလွဲပိုင်း ၂ နာရီကျော်တွင် ၁၀၅ မိုင် ကုန်သွယ်ရေးဇုန် အနီး စစ်ကောင်စီတပ်မှ တိုက်လေယာဉ်အမျိုးအစားဖြင့် လာရောက်ဗုံးကြဲ တိုက်ခိုက်မှုကြောင့် မူဆယ်မြို့ မန်မော်ကျေးရွာ အတွင်း ကျပေါက်ကွဲပြီး အရပ်သား ၁ ဦးသေ ၊အရပ်သား ၁ ဦး ဒဏ်ရာရခဲ့ကြောင်း မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“သေသွားတဲ့သူက ကလေး နှစ်ယောက်ရဲ့ မိခင်ပါ။ သူ့ယောက်ျားကလည်း ဒဏ်ရာ တော်တော်ပြင်းတယ်။ လေယာဉ်ကနေ ပစ်ချတဲ့ ဗုံးက အိမ်ထဲကို ကျလာတာ။ ကလေးနှစ်ယောက်ကတော့ မထိဘူးတဲ့။ စစ်တပ်က ရွာထဲ ပေးမဝင်လို့ ဒဏ်ရာ ရတဲ့သူနဲ့ အလောင်းကိုလည်း လူမှုကူညီရေး အသင်းတွေ ခက်ခက်ခဲခဲ သယ်ယူရတယ်။” ဟု အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
စစ်ကောင်စီမှ လေယာဉ်ဖြင့် ဗုံးကြဲ တိုက်ခိုက်မှုကြောင့် မူဆယ်မြို့၊ ၁၀၅ မိုင် အနီးရှိ မန်မော်ကျေးရွာမှ ကလေးနှစ်ယောက်မိခင်သေဆုံးရသည့်အပြင် အမျိုးသား ဖြစ်သူလည်း ဒဏ်ရာ ပြင်းထန်စွာ ရရှိကြောင်း သိရသည်။
လက်ရှိတွင် ကလေးနှစ်ယောက်ကို စစ်ဘေးရှောင်စခန်းသို့ ပို့ဆောင်ထားရကြောင်း စစ်ရှောင်ကူညီပေးသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
“အကြီး တစ်ယောက်က ၁၃ နှစ်၊ အငယ်က ၁၀ နှစ်ဝန်းကျင်ပေါ့။ မိခင်ကဆုံး၊ ဖခင်လည်း ဒဏ်ရာရာဆိုတော့ သူတို့ကို ပြုစုမယ့်သူလည်း မရှိတော့ဘူးလေ။ အဲ့ကြောင့် မောင်နှမနှစ်ယောက်ကို စစ်ဘေးရှောင်စခန်း တစ်နေရာမှာ ပို့ထားလိုက်တယ်” ဟု စစ်ရှောင်ကူညီပေးနေသည့် အမျိူးသား တစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် အောက်တိုဘာလ နှောင်းပိုင်းမှစတင်ပြီး မူဆယ်မြို့နယ်အတွင်း စစ်ကောင်စီ နှင့် TNLA တပ်တို့သည် နေ့စဉ် နီးပါး တိုက်ပွဲ ဖြစ်ပွား နေလျက်ရှိပြီး လက်နက်ကြီး/ ငယ်များ ရမ်းသမ်းပစ်ခတ်မှုကြောင့် အရပ်သား ထိခိုက်ဒဏ်ရာရမှုသည် (၁၀)ဦး အထက်ရှိပြီး သေဆုံးမှုလည်း (၅)ဦးအထက်ရှိကြောင်း နှင့် နေအိမ်အဆောက်အအုံ ပျက်စီးမှုများလည်း ရှိနေကြောင်း သိရသည်။
နှစ်ဖက်တပ်ဖွဲ့ တိုက်ပွဲကြောင့် စစ်ရှောင်ထွက်ပြေးရသည့် မူဆယ်မြို့နယ်မှ ဒေသခံများသည်လည်း ယနေ့အချိန် မြေပြင် စစ်ရေး တင်းမာမှုကြောင့် နေရပ်မပြန်နိုင်ကြသေးကြောင် သိရသည်။
