မြန်မာ-တရုတ်နယ်စပ်ကုန်သွယ်ရေးဇုန်ဖြစ်သည့် မူဆယ်မြို့နယ် (၁၀၅)မိုင်တွင် စစ်ကောင်စီနှင့် ညီနောင်မဟာမိတ်(၃)ဖွဲ့ တိုက်ပွဲဖြစ်ပွားကာ အမျိုးသားတစ်ဦး လက်နက်ကြီး ကျည်စထိမှန်သေဆုံးသွားကြောင်း စုံစမ်းသိရသည်။
မူဆယ်မြို့နယ် (၁၀၅)မိုင်အနီးတွင် ယမန်နေ့ (နိုဝင်ဘာ ၂၆)ရက် ည ၇နာရီခွဲဝန်းကျင်မှ စပြီး စစ်ကောင်စီနှင့် ညီနောင်မဟာမိတ်တပ်ဖွဲ့တို့သည် တိုက်ပွဲပြင်းထန်ခဲ့ပြီး အမျိုးသားတစ်ဦး လက်နက်ကြီးစထိမှန်သေဆုံးကာ နေအိမ် နှင့် ဆိုင်ခန်းများလည်း ထိခိုက်ပျက်စီးမှုများရှိကြောင်း မူဆယ်မြို့နယ် မှ အသက် ၅၀ အရွယ်ရှိ အမျိုးသားတစ်ဦးက သျှမ်းသံတော်ဆင့်ကိုပြောသည်။
“မနေ့ (နိုဝင်ဘာ ၂၆) ရက် ည ၇နာရီကနေ ဒီနေ့ (နိုဝင်ဘာ ၂၇)ရက် မနက် ၂နာရီထိ လက်နက်ကြီးသံကြားတယ်။ အဲ့မှာ လက်နက်ကြီး ကျပြီး အမျိုးသားတစ်ဦးပွဲချင်းပြီး သေသွားတယ်။ သူ့ကားတွေလည်း ထိတယ်။ စစ်ကောင်စီကဘက် လေယာဥ်တွေနဲ့လည်း (၃)ကြိမ်မက လာပစ်တယ်” ဟု မူဆယ်ဒေသခံအမျိုးသားတစ်ဦးက ပြောသည်။
ယမန်နေ့ ( နိုဝင်ဘာလ ၂၆) ရက် စစ်ကောင်စီ နှင့် ညီနောင်မဟာမိတ် ၃ ဖွဲ့တို့ တိုက်ပွဲများပြင်းထန်ပြီး မူဆယ်မြို့ထဲထိ လက်နက်ကြီးသံများ လေယာဉ်သံများ ကျယ်လောင်စွာကြားရသည်။
တိုက်ပွဲကြောင့် မူဆယ်မြို့နယ် (၁၀၅)မိုင် စစ်ဆေးရေးဂိတ်များ၊ ကုန်တင်ကားများ၊ နေအိမ်များပါပျက်စီးမှုရှိကြောင်း သိရသည်။
Leave a Comments