သျှမ်းပြည် သီပေါမြို့နယ်တွင် ညီနောင်မဟာမိတ်တပ်ဖွဲ့နှင့် စစ်ကောင်စီတပ်တို့ နှစ်ဘက်တိုက်ပွဲအကြား လုံခြုံရေးစိုးရိမ်မှုကြောင့် ဒေသခံ ၃၀၀၀ ကျော် ထွက်ပြေးတိမ်းရှောင်နေရပြီး စားနပ်ရိက္ခာ အရေးပေါ် လိုအပ်နေကြောင်း စုံစမ်းသိရသည်။

သီပေါမြို့နယ်တွင် နိုဝင်ဘာ ၂၂ ရက်မှစပြီး ယနေ့ (နိုဝင်ဘာ ၂၇ ရက်)အထိ ညီနောင်မဟာမိတ်တပ်ဖွဲ့နှင့် စစ်ကောင်စီတပ်တို့ လက်နက်ကြီးဖြင့် အပြန်အလှန် ပစ်ခတ်နေခြင်းကြောင့် ဒေသခံ ၃၀၀၀ ကျော်မှာ စိုးရိမ်ထိတ်လန့်ကာ နီးစပ်ရာ မြို့ပေါ်ဘုန်းကြီးကျောင်းများသို့ ထွက်ပြေးတိမ်းရှောင်နေကြောင်း သီပေါမြို့ ဒေသခံများထံမှ သိရသည်။

“တိုက်ပွဲကို ကြောက်ကြတာပေါ့။ အဓိက လက်နက်ကြီး စိုးရိမ်ရတယ်၊ နှစ်ဘက်စလုံးက ပြန်ပစ်နေတာလေ။ လေယာဉ်နဲ့ပဲထုထု အမြောက်နဲ့ပဲထုထု သူတို့စစ်မြေပြင် ဖြစ်နေတဲ့ဟာ။ ပြည်သူကို ကာဗာယူနေတော့ ဘယ်လိုလုပ်ပြီး လုံခြုံပါ့မလဲ၊ လက်နက်ကိုင်ရှိတဲ့နေရာ အချိန်မရွေး စစ်မြေပြင်ပဲ။ အခုတော့ မြို့ပေါ်ဘုန်းကြီးကျောင်း အကုန်နီးပါးပါပဲ စစ်ရှောင်ရှိတာ၊ လူဦးရေ ၃၀၀၀ ကျော်ရှိမယ်”ဟု သီပေါမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။

သီပေါမြို့နယ်အတွင်းရှိ ဘော်ကြို၊ ကျင်သီ၊ လောင်ခွန်ကျေးရွာအုပ်စုများမှ ဒေသခံ ၁၀၀၀ ကျော်သည် နမ့်ဟူးနွဲ့နှင့် ဘော်ကြိုဘုရားကြီး ကျောင်းတိုက်တို့တွင် ရောက်ရှိနေပြီး သီပေါမြို့အနီး ကျေးရွာများမှ ပြည်သူများသည် မြို့ပေါ်ရှိ အောင်မင်္ဂလာ ဘိုးတော်ကျောင်း၊ စံဖိတ်၊ နောင်ကတ်၊ ရေဦး၊ မြို့လယ်ဘုန်းကြီးကျောင်းနှင့် ၂၅၀၀ ကျောင်းများတွင် ထွက်ပြေးတိမ်းရှောင်နေသည်ဟု သီပေါမြို့ စစ်ဘေးရှောင်ကူညီနေသူများထံမှ သိရသည်။

“စံဖိတ်၊ နားလွယ်၊ နားမုံ၊ ညောင်ကိုးပင် အဲ့ဘက်နဲ့ နီးတဲ့သူတွေ ရှောင်ကြရတယ်။ အဲ့ဘက်ရွာကလူတွေ နောင်ကတ်၊ စံဖိတ်၊ ကုန်းတော်နဲ့ ဦးခန္တီကျောင်းတွေမှာ စစ်ဘေးရှောင်လာတယ်။ ဘော်ကြိုရွာနဲ့ အနီးတဝိုက်က လူတွေတော့ နမ့်ဟူးနွဲ့ကျောင်းနဲ့ ဘော်ကြိုဘုရားကြီးကျောင်းမှာ ရောက်နေကြတယ်။ မြို့ပေါ်နဲ့ ဘော်ကြိုမှာ ပေါင်းလိုက်ရင် ၃၀၀၀ ကျော်ရှိတယ်၊ သူတို့အတွက် အဓိက စားနပ်ရိက္ခာ အရေးပေါ် လိုနေတယ်”ဟု သီပေါမြို့ စစ်ဘေးရှောင်ကူနေသူ တစ်ဦးက သျှမ်းသံတော်ဆင့်ကို ပြောသည်။

ထို့အပြင် သီပေါမြို့နယ်တွင် ပြီးခဲ့သည့် နိုဝင်ဘာ ၂၂ ရက်က စံဖိတ်ကွက်သစ်အတွင်း လက်နက်ကြီး ကျရောက်ပေါက်ကွဲခြင်းကြောင့် အမျိုးသားတစ်ဦး ပွဲချင်းပြီး သေဆုံးကာ ၇ ဦး ထိခိုက်ဒဏ်ရာရရှိပြီး နိုဝင်ဘာ ၂၅ ရက်ကလည်း မန်လွယ်ကျေးရွာမှ အမျိုးသားတစ်ဦး လက်နက်ကြီး ထိမှန်၍ ထိခိုက်ဒဏ်ရာရရှိခဲ့ကြောင်း သီပေါမြို့ ဒေသခံများထံမှ သိရသည်။

သီပေါမြို့နယ်တွင် စစ်ကောင်စီ၏ ထောက်ပို့လမ်းကြောင်း ဖြတ်တောက်ရန် ပြီးခဲ့သည့် နိုဝင်ဘာ ၁၂ ရက်တွင် ကျောက်မဲနှင့် သီပေါမြို့အကြားရှိ ကျင်သီတံတားကို TNLA တပ်ဖွဲ့က ဗုံးခွဲဖျက်စီးခဲ့ပြီးနောက် ကျင်သီနှင့် ဘော်ကြိုရှိ စစ်ကောင်စီ တပ်စခန်းကိုလဲ တိုက်ခိုက်သိမ်းပိုက်ခဲ့သည်။

အလားတူ ကျင်သီတံတားအနီးတွင် ထပ်မံတပ်စွဲလာသော စစ်ကောင်စီတပ်ကိုလည်း ကိုးကန့်တပ်ဖွဲ့ MNDAA နှင့် TNLA တပ်ဖွဲ့တို့က ယမန်နေ့ (နိုဝင်ဘာ ၂၆ ရက်)တွင် တိုက်ခိုက်သိမ်းပိုက်ခဲ့သည်ဟု ကိုးကန့်မီဒီယာက သတင်းထုတ်ပြန်ထားသည်။

ယနေ့ (နိုဝင်ဘာ ၂၇ ရက်) နံနက်အချိန်တွင် ကျောက်မဲနှင့် သီပေါအကြားရှိ နားခေါ်ကျေးရွာအနီး စစ်ကောင်စီတပ်နှင့် TNLA တပ်ဖွဲ့တို့ နှစ်ဘက်ထိတွေ့တိုက်ပွဲ ဖြစ်ပွားခဲ့ပြီး ကျောက်မဲမြို့အခြေစိုက် စစ်ကောင်စီတပ် ခမရ-၅၀၁/၅၀၂ တို့မှ လက်နက်ကြီးများဖြင့် သီပေါမြို့နယ်ဘက်သို့ ရမ်းသမ်းပစ်ခတ်နေကြောင်း သီပေါဒေသခံများက ပြောသည်။