သျှမ်းပြည် နမ့်ခမ်းမြို့နယ်ရှိ စစ်ကောင်စီတပ်ရဲ့ စခန်းသစ်ကုန်း ကို သိမ်းပိုက်နိုင်ဖို့အတွက် နိုဝင်ဘာ (၃) ရက်နေ့ကစတင်ပြီး တအာင်း (ပလောင်) အမျိုးသားလွတ်မြောက်ရေးတပ်မတော် (TNLA ) နဲ့ စစ်ကောင်စီ တို့ နေ့စဥ်ဆက်တိုက် တိုက်ပွဲ ဖြစ်ပွားနေပါတယ်။ ဒီထိုးစစ်ဆင်မှုဟာ ၃ ပတ်ကြာလာပြီး TNLA ဘက်မှ မြေပြင်ထိုးစစ်ဆင်မှု ပြုလုပ်သလို ဒရုန်း နဲ့ ပစ်ခတ်တာတွေ လုပ်နေပါတယ်။ တဖက် က စစ်ကောင်စီဘက်လည်း လေကြောင်းလိုင်းနဲ့ ဗုံးကြဲ တိုက်ခိုက်တာတွေလည်း ရှိနေပါတယ်။

အဲ့ဒီလို တိုက်ပွဲပြင်းထန်နေတဲ့အတွက် စစ်ကောင်စီရဲ့ လေကြောင်းဗုံးကြဲခြင်းဟာ နမ့်ခမ်းမြို့ရှိ အရပ်သား နေအိမ်တွေမှာ လက်နက်ကြီး ထိမှန်ပြီး ဒေသခံ ပြည်သူ အချို့လည်း စစ်ဘေးတိမ်းရှောင်နေရပါတယ်။

စစ်ကောင်စီ လေကြောင်းလိုင်းမှ ဗုံးကြဲတဲ့အတွက် နမ့်ခမ်းဒေသခံ တစ်ဦးရဲ့ နေအိမ်တစ်လုံးနဲ့ ကားဝပ်ရှော့ကို ထိမှန်ခဲ့ပါတယ်။ လက်ရှိမှာတော့ အဲ့ဒီပိုင်ရှင်က မူဆယ်မြို့ပေါ်ရှိ စစ်ရှောင်စခန်းတစ်ခုမှာ စစ်ဘေးတိမ်းရှောင်နေတဲ့ အသက် (၄၀) ဝန်းကျင် အမျိုးသားတစ်ဦးကို သျှမ်းသံတော်ဆင့် မှ တွေ့ဆုံမေးမြန်းထားပါတယ်။

မေး။ ။ နိုဝင်ဘာ (၄) ရက်နေ့က နမ့်ခမ်းမြို့မှာ စစ်ကောင်စီက လေယာဥ်ဗုံးကြဲတာတွေ လုပ်ပြီး အိမ်တွေလဲ ထိခိုက်သွားတယ်လို့ သိရတယ်။ ဘယ်နေရာတွေ ထိသွားပါသလဲ။

ဖြေ။ ။ စကစ တွေ လေယာဥ်တွေနဲ့ ဗုံးလာကြဲတဲ့နေ့က ကျနော်တို့အိမ်မှာ သက်ကြီးပိုင်း တစ်ယောက် နဲ့ ကလေး တစ်ယောက် နဲ့ ကျနော်တို့ ဒီမူဆယ်ဘက်ကို စစ်ဘေးမရှောင်လာသေးဘူး။ ဒါပေမယ့် ဘယ်မှလဲ ထွက်ပြေးလို့လဲ မရဘူး။ အသက်ကြီးတဲ့သူ ရှိထားတော့ ထွက်ပြေးဖို့က ခက်ခဲတယ်။ ဗုံးလာကြဲတဲ့နေ့ က ညနေ ၃ နာရီခွဲလောက် လက်နက်ကြီးက ကျနော်တို့ အိမ်ရှေ့တည့်တည့်မှာ လာကျတယ်။ တော်သေးလို့ ကျနော်တို့ ၃ ယောက်လုံး မထိလို့ပေါ့။

မေး ။ ။ အဲ့လက်နက်ကြီးကျရောက်ပေါက်ကွဲတယ်ဆိုတော့ ဘယ်နေရာတွေမှာ ပေါက်ကွဲသွားလဲ။

ဖြေ။ ။ ကျနော်တို့ အိမ်ပေါ် မှာ ကျပေါက်ကွဲတယ်။ အိမ်လယ်ခေါင် တည့်တည့်မှာ ကျလာတယ်။ ကျနော်တို့ တံခါးတွေ အားလုံး ပျက်စီးကုန်တယ်။ မျက်နှာကြပ်တွေ ဘာတွေ အားလုံးပျက်စီးသွားတယ်။

မေး။ ။ နောက်ရက်တွေမှာလဲ လက်နက်ကြီး က ကားဝပ်ရှော့ဖွင့်ထားတဲ့ဆိုင်မှာ ကျပေါက်ကွဲတာတွေ ရှိတယ်။ ဘယ်နေရာတွေမှာ ပျက်စီးသွားပါသလဲ။

ဖြေ ။ ။ ဟုတ်ကဲ့ပါ။ နေ့တိုင်းနီးပါး လေယာဥ်နဲ့ပစ်တာ။ ဒရုန်းနဲ့ဗုံးချတာ။ အပြန်အလှန် လက်နက်ကြီးထုတာတွေရှိပါတယ်။ ကျနော်အိမ်ရှေ့ကို ကျပေါက်ပြီး နောက်ရပ်မှာပဲ အောင်ချမ်းသာ ရပ်ကွက်ထဲက ကျနော် ကား ဝပ်ရှော့ပ်မှာပေါက်တယ်။ အဲ့မှာက ကျနော်တို့ မနေဘူး။ ပစ္စည်းတွေပဲ ထားတာ။ အဲ့မှာက တိုက်ခန်းတွေဖြစ်တယ်။ အဲ့မှာ လက်နက်ကြီးကျတော့ ကျနော်တို့ဆိုင်လည်း ပျက်စီးသွားတယ်။

မေး။ ။ အဲ့ဒီ ပျက်စီးဆုံးရှုံးမှု တန်ဖိုးက ခန့်မှန်းခြေ ဘယ်လောက်ရှိပါသလဲ။

ဖြေ။ ။ အားလုံးပေါင်းလိုက်ရင် အနည်းဆုံး သိန်း (၄၀) လောက်တော့ ရှိမယ်။

မေး ။ ။ လက်နက်ကြီးကျတဲ့နေ့က ထိခိုက်ဒဏ်ရာ ရရှိသူရှိပါသလား။

ဖြေ ။ ။ ထိခိုက်ဒဏ်ရာ ရရှိသူတော့ မရှိဘူး။ ဒါပေမယ့် ကျနော်တို့ ပတ်ဝန်းကျင်က ၅ အိမ် ၆ အိမ်လောက် ပျက်စီးကုန်တယ်။

မေး ။ ။ စစ်ကောင်စီနဲ့ TNLA တွေ နမ့်ခမ်းမှာ တိုက်ပွဲစဖြစ်တော့ ဒေသခံတွေက ဘယ်ကို ထွက်ပြေး တိမ်းရှောင် သွားကြလဲ။

ဖြေ ။ ။ နောင်ခမ်းဘက်တွေ၊ မူဆယ်တွေဘက်မှာ ထွက်ပြေးတိမ်းရှောင်နေတယ်။

မေး။ ။ ဒီလို ထွက်ပြေးရတော့ ဘယ်လို အခက်အခဲတွေ ကြုံတွေ့ရပါသလဲ။

ဖြေ ။ ။ အားလုံး အခက်အခဲ ဖြစ်တာပေ့ါ။ နေထိုင် စားသောက်ရေးအပိုင်းတွေ လဲ အခက်အခဲ ဖြစ်ပါတယ်။

မေး။ ။ နောက်ဆုံးအနေနဲ့ ဘာများ ဖြည့်စွက်ပြောချင်ပါသလဲ။

ဖြေ။ ။ ကျနော်ပြောချင်တာက တိုက်ပွဲတွေ ရပ်ပေးစေချင်ပါတယ်။ အခုဖြစ်နေတာကလည်း မြို့ပေါ် ပျက်စီးမှုတွေကလည်းများနေပြီ။ ပြည်သူတွေ အထိနာဆုံးပါပဲ။ ပြည်သူလူထုတွေက ဘယ်သူမဆို ဒီလို တိုက်ပွဲတွေ မလိုလားဘူး။ မြန်မြန် အေးချမ်းချင်တယ်။ အိမ်လည်း ပြန်ချင်နေပါပြီ။