သျှမ်းပြည် ပန်ဆိုင်းမြို့တွင် စစ်ကောင်စီ နှင့် ကိုးကန့်တပ်ဖွဲ့ (MNDAA ) တို့ တိုက်ပွဲများကြောင့် သံဃာတော်များပါ မူဆယ်မြို့သို့ ထွက်ပြေးတိမ်းရှောင်နေရကြောင်း စုံစမ်းသိရသည်။

သျှမ်းပြည် ပန်ဆိုင်းမြို့ စစ်ကောင်စီ နှင့် ကိုးကန့်တပ်ဖွဲ့ MNDAA တို့ တိုက်ပွဲများတွင် အချိန်မရွေးသေဆုံးနိုင်သည့်အတွက် ပြည်သူများအပြင် သံဃာတော်များပါ ကျောင်းဆောင်ကို စွန့်ခွာ၍ (နိုဝင်ဘာလ ၂၂ ရက်) တွင် မူဆယ်မြို့တို့ ထွက်ပြေးတိမ်းရှောင်နေရကြောင်း သိရသည်။

“ခု ဘုန်းကြီးကျောင်းကို စစ်တပ်က နေရာယူကြတော့ ကျောင်းကို ခုတုံးလုပ်ပြီး တိုက်တာဖြစ်တဲ့အတွက်ကြောင့် ပြည်သူတွေ ဘုန်းကြီးတွေ ပြေးနေရတာပေါ့။ လူနေအိမ်မှာရှိတဲ့ ပြည်သူတွေရဲ့ အဝတ်အစားတွေကို ဝတ်ပြီး အရပ်ဝတ် အပြည့်နဲ့ ရုပ်တွေဖြတ်ထားတာကြောင့် ပြည်သူတွေကပါ ကိုယ့်အိမ်မှာ မနေရဲတော့ဘူး”ဟု ဒေသခံ အမျိုးသားတစ်ဦးက ပြောသည်။

တိုက်ပွဲများ ဆက်လက်ပြင်းထန်နေပြီး စစ်ကောင်စီမှ လေကြောင်းများဖြင့် ပစ်ခတ်တိုက်ခိုက်ခြင်း ၊ MNDAA မှ ဒရုန်းများဖြင့် ဗုံးကြဲမှုကြောင့် ဘုန်းကြီးများ စိုးရိမ်သည့် အတွက် စစ်ဘေးရှောင်လာခဲ့ကြောင်း သိရသည်။

“ဟုတ်တယ် ကိုရင်လေးတွေက များတာပေါ့ ဘုန်းကြီးတွေရော စုစုပေါင်း ၈၀ ကျော်တယ်။ အခုတော့ သီလရှင်တွေနဲ့ ပြည်သူတွေ ဝိုင်းပြီး ချက်ပြုတ်ပြီး ကူညီရတာပေါ့။”ဟု ဒေသခံ အမျိုးသားတစ်ဦးက ပြောသည်။

မူဆယ်မြို့နယ် မိုင်းယု (၁၀၅) မိုင် အောက်နမ့်ဟွယ်ကျေးရွာရှိ ဇေယျမင်္ဂလာကျောင်းတိုက် အတွင်းတွင်
ပြီးခဲ့သည့် (နိုဝင်ဘာလ ၂၂) ရက်၌ ဒရုန်းဗုံးပြုတ်ကျ ပေါက်ကွဲမှုကြောင့် ကိုရင်ကြီး တစ်ပါး ပေါင်နှစ်ဖက် ထိမှန်ပြီး ဒဏ်ရာ ရရှိခဲ့ကာ၊ အဆောက်အဦး ၃ ခုနှင့် ကား ၂ စီး ပျက်စီးဆုံးရှုံးခဲ့ကြောင်း သိရသည်။

မူဆယ်မြို့နယ် စယ်လန့်ကျေးရွာ ကောင်းနောင်ရပ်ကွက် ယနေ့ (နိုဝင်ဘာ ၂၄ ရက်) တွင်လည်း တိုက်ပွဲတစုံတရာ ဖြစ်ပွားခြင်းမရှိဘဲ စစ်ကောင်စီတပ်က ဂျက်တိုက်လေယာဉ်ဖြင့် ပေါင် ၅၀၀ ဗုံး ၂ လုံး ကြဲချခဲ့ခြင်းကြောင့် နေအိမ် ၁၀ လုံးကျော် ထိခိုက်ပျက်စီးပြီး ကားများပါ ပျက်စီးခဲ့သည်။

“၁၀၂၇ စစ်ဆင်ရေး”အတွင်း မူဆယ်ခရိုင် မူဆယ်မြို့ နှင့် နမ့်ခမ်းမြို့နယ်တို့တွင် စစ်ကောင်စီနှင့် ညီနောင်မဟာမိတ် ၃ ဖွဲ့တို့၏ နှစ်ဖက်တိုက်ပွဲကြောင့် ပြည်သူနေအိမ် ၆၀ ကျော် ထိခိုက်ပျက်စီးခဲ့ပြီး နမ့်ခမ်းမြို့နယ်မှ စစ်ဘေး‌ရှောင်ဦးရေ ၆၀၀၀ ကျော်မှာ မြန်မာ – တရုတ် နယ်စပ် နှင့် မူဆယ်မြို့ပေါ်သို့ ထွက်ပြေးတိမ်းရှောင်နေရကြောင်း ဒေသခံများထံမှ သိရသည်။