သျှမ်းပြည် လားရှိုးမြို့နယ်အတွင်းရှိ စစ်ကောင်စီတပ်၏ အခိုင်အမာခံစစ်စခန်းတစ်ခုဖြစ်သည့် မိုင်းကျက်တပ်စခန်းကို စစ်ကောင်စီ လေကြောင်းပစ်ကူပေးနေသည့်ကြားမှပင်နိုဝင်ဘာ၂၃ ရက် ညသန်းခေါင်ယံတွင် TNLA ဘက်မှ သိမ်းပိုက်နိုင်ခဲ့ကြောင်း တအာင်းအမျိူးသားလွတ်မြောက်ရေးတပ်မတော် ၏ ထုတ်ပြန်ချက်အရ သိရသည်။

တပ်မဟာ(၆)နယ်မြေ၊လားရှိုးမြို့နယ်အတွင်းရှိ စစ်ကောင်စီ၏ မိုင်းကျက်တပ်စခန်းကို ၁၀၂၇ စစ်ဆင်ရေးစတင်သည့် အောက်တိုဘာလ ၂၇ ရက်မှစတင် တိုက်ခိုက်ခဲ့ရာ တစ်လနီးပါးအကြာ နိုဝင်ဘာ ၂၃ရက် ညသန်းခေါင် ၁၂ နာရီ ၅ မိနစ်အချိန်ခန့်က အပြီးသတ်သိမ်းပိုက်နိုင်ခဲ့ခြင်းဖြစ်ပြီး ဟောင်ဝှစ်ဇာအမြှောက်များနှင့် လက်နက်ခဲယမ်းများပါ သိမ်းပိုက်ရရှိကြောင်း ထုတ်ပြန်ချက်အရ သိရသည်။

“စစ်တပ်က လေကြောင်းကနေ ဗုံး‌ချ ပြီးလက်နက်ကြီးတွေနဲ့ လာကူပစ်‌တာ၊ဒါပေမယ့် ည ၁၂နာရီလောက်မှာ ကျနော်တို့အဖွဲ့က အကုန်ရှင်းလင်းသိမ်းပိုက်မိတယ် စခန်းထဲရှိတဲ့ ဟောင်ဝှစ်ဇာနဲ့ လက်နက်ကြီးတွေပါ ရထားတယ်”ဟု TNLA ရဲဘော်တစ်ဦးမှ သျှမ်းသံတော်ဆင့်သို့ ပြောသည်။

တိုက်ပွဲဖြစ်ပွားရာ မိုင်းကျက်နယ်မြေသို့ စစ်ကောင်စီမှ Y12 လေယာဉ်ဖြင့် ဗုံး ၂ကြိမ် ကြဲချခြင်း၊ဂျက်ဖိုက်တာ ဖြင့် ၅ကြိမ်ထက်မနည်း ‌ လက်နက်ကြီးများဖြင့် ပစ်ခတ်ခဲ့ရာ နှစ်ဖက်ကျဆုံးမှုများလည်း ရှိခဲ့ကြောင်း သိရသည်။

သျှမ်းပြည်မြောက်ပိုင်း ညီနောင်မဟာမိတ်အဖွဲ့များ၏ ၁၀၂၇ စစ်ဆင်ရေး တွင် စတင်ချိန်မှ ယနေ့အချိန်အထိ မြို့ ၈ မြို့နှင့် စစ်ကောင်စီ တပ်စခန်းပေါင်း ၂၁၀ ကျော်ကို ညီနောင်မဟာမိတ်အဖွဲ့များမှ သိမ်းပိုက်ရရှိထားကြောင်း TNLA၏ ထုတ်ပြန်ချက်များအရ သိရသည်။