သျှမ်းပြည် ကျောက်မဲမြို့ တရုတ်သုသာန်တွင် ပိုင်ရှင်မဲ့အမျိုးသားအလောင်းတစ်လောင်းတွေ့ရှိခဲ့ကြောင် စုံစမ်းသိသည်။
သျှမ်းပြည် ကျောက်မဲမြို့ ရပ်ကွက် ၁ ယနေ့ (နိုဝင်ဘာလ ၂၄ ရက်) နေ့လည်ပိုင်းတွင် တရုတ်သုသာန်၌ ပိုင်ရှင်မဲ့ အမျိုးသားအလောင်းတစ်လောင်း တွေ့ရှိခဲ့ပြီး နမ့်ခုံးပရဟိတအသင်းခွဲ မှ အေးချမ်းသာ သုသာန်သို့ ကူညီ ပို့ဆောင် သင်္ဂြိုဟ်ပေးခဲ့ကြောင်း တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။
“သေတာ ဟုတ်တယ်။သူ့လက်မှာတော့ ဆေးထိုးတဲ့ အရာတွေတော့ရှိတယ်။ ရာသီဥတုကအေးတယ်လေ မူးယစ်ဆေးဆိုတော့ ရှော့ဖြစ်ပြီးသေးတာပေါ့ ။”ဟု ၎င်းကပြောသည်။
အဆိုပါ သေဆုံးသွားသူသည် အိမ်ခြေရာမဲ့သူဖြစ်ပြီး၊ ပိုင်ရှင်မဲ့ အလောင်းဖြစ်ကြောင်း၊ ကျောက်မဲမြို့ တွင် ပိုင်ရှင်မဲ့အလောင်းဖြင့်သေဆုံးသူ အများစုသည် မူးယစ်ဆေးသုံးစွဲသူများဖြစ်ကြောင်း ကျောက်မဲဒေသခံများက ပြောသည်။
ယမန်နေ့ (နိုဝင်ဘာ ၂၃)ရက်တွင်လည်း ပြောင်းခြံထဲ ပိုင်ရှင်မဲ့အလောင်းတွေ့ရှိခဲ့သေးကြောင်း နမ့်ခုံးပရဟိတ အသင်းမှ တာဝန်ရှိသူတစ်ဦးကပြောသည်။
စစ်အာဏာသိမ်းပြီး ၂ နှစ်ကျော် ကာလအတွင်း သျှမ်းပြည် နေရာအများအပြား ပိုင်ရှင်မဲ့အလောင်း အများအပြားရှိကြောင်းသိရသည်။
