သျှမ်းပြည် လောက်ကိုင်မြို့တွင် စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့၏ နှစ်ဖက်တိုက်ပွဲအတွင်း လက်နက်ကြီးပစ်ခတ်မှုကြောင့် ပြည်သူနေအိမ် ၄၀ ကျော် ထိခိုက်ပျက်စီးကြောင်း စုံစမ်းသိရသည်။

လောက်ကိုင်မြို့အထွက် ပါစင်ကျော်ကျေးရွာအနီးတွင် နိုဝင်ဘာ တတိယပတ်မှစ၍ စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့၏ နှစ်ဖက်တိုက်ပွဲအတွင်း လက်နက်ကြီး ရမ်းသမ်းပစ်ခတ်မှုကြောင့် ပြည်သူနေအိမ် ၄၀ ကျော် ထိခိုက်ပျက်စီးကြောင်း လောက်ကိုင်ဒေသခံများက ပြောသည်။

“စစ်ကောင်စီနဲ့ ကိုးကန့်တပ်တွေ တိုက်ကြတော့ လက်နက်ကြီးရမ်းပစ်လို့ လောက်ကိုင်အထွက် ပါစင်ကျော်ရွာထဲကို ကျကွဲတာရှိတယ်။ အဲ့မှာ အိမ် ၄၀ ကျော်က ရစရာမရှိတော့အောင် ကြေမွသွားတယ်။ ရွာကလည်း လမ်းမကြီးဘေးမှာဆိုတော့ ကားတွေနဲ့ ဆိုင်ကယ်တွေလဲ စုတ်ပြတ်သတ်ပြီး လမ်းဘေးမှာ ပြန့်ကြဲနေတာ။ ရွာသားတွေတော့ ထွက်ပြေးကုန်ကြပြီ”ဟု လောက်ကိုင်မြို့ ပါစင်ကျော်ဒေသခံတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် နိုဝင်ဘာလ ၂၂ ရက်တွင်လည်း လောက်ကိုင်မြို့အထွက် တုန်ချိန်အနီးတွင် နေရပ်ပြန်မည့် စစ်ဘေးရှောင်ကားများပေါ်သို့ လက်နက်ကြီး ၂ နေရာ ကျရောက်ပေါက်ကွဲခဲ့ရာ ကားပေါ်တွင် လိုက်ပါလာသည့် စစ်ဘေးရှောင် ၁၄ ဦးသေဆုံးကြောင်း ကိုးကန့်တပ်ဖွဲ့ MNDAA က ယမန်နေ့ (နိုဝင်ဘာ ၂၃ ရက်)တွင် ထုတ်ပြန်ထားသည်။

ယမန်နေ့ နိုဝင်ဘာလ ၂၂ ရက်နေ့ နံနက်ပိုင်းက လောက်ကိုင်မြို့မှ ထွက်ပြေးလာသည့် စစ်ဘေးရှောင်ကားပေါ်သို့ ကျရောက်ပေါက်ကွဲသည့် လက်နက်ကြီးကို စစ်ကောင်စီမှ ပစ်ခတ်ခဲ့ခြင်းဖြစ်ကြောင်း ကိုးကန့်တပ်ဖွဲ့ MNDAA က ထုတ်ပြန်ထားသည်။

အလားတူ စစ်ကောင်စီတပ်၏ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ကိုးကန့်တပ်ဖွဲ့ MNDAA မှ အကြောင်းမဲ့ ရှော့တိုက်ဒုံး ပစ်ခတ်မှုကြောင့် လောက်ကိုင်မြို့ တုန်ချိန်ရှိ ကားထိမှန်ပြီး စစ်ဘေးရှောင်များ သေဆုံးခြင်းဖြစ်ကြောင်း ပြန်လည်တုံ့ပြန်ထားသည်။

ကိုးကန့်တပ်ဖွဲ့ MNDAA သည် “၁၀၂၇ စစ်ဆင်ရေး” တစ်လနီးပါး ကာလအတွင်း စစ်ကောင်စီ၏ တပ်စခန်း ၁၅၀ ကျော်နှင့် ချင်းရွှေဟော်မြို့ကို တိုက်ခိုက်သိမ်းပိုက်နိုင်ခဲ့ပြီး လက်ရှိတွင် လောက်ကိုင်မြို့ကို ဝိုင်းရံပိတ်ဆို့လျက်ရှိကာ အလုံးစုံထိန်းချုပ်နိုင်ရန်အတွက် စစ်အင်အား အများအပြား ဖြန့်ကျက်ထားကြောင်းလည်း သိရသည်။