သျှမ်းပြည် နမ့်ခမ်းမြို့နယ်ရှိ စစ်ကောင်စီတပ်၏ စခန်းသစ်ကုန်းကို သိမ်းပိုက်နိုင်ရန် တအာင်း (ပလောင်)အမျိုးသားလွတ်မြောက်ရေးတပ်မတော် (TNLA) က အပြင်းအထန် ထိုးစစ်ဆင် တိုက်ခိုက်နေကြောင်း စုံစမ်းသိရသည်။

နမ့်ခမ်းမြို့နယ်တွင် အခြေစိုက်သည့် စစ်ကောင်စီတပ် စခန်းသစ်ကုန်းကို သိမ်းပိုက်နိုင်ရန်အတွက် TNLA က မြေပြင်ထိုးစစ်နှင့် ဒရုန်းတို့ဖြင့် နိုဝင်ဘာ ၂၂ ရက်တွင် ထပ်မံအပြင်းအထန် ထိုးစစ်ဆင် တိုက်ခိုက်နေကြောင်း နမ့်ခမ်းမြို့ ဒေသခံများက ပြောသည်။

“မနေ့ကနဲ့ ဒီနေ့မနက်အထိ ထပ်ပြီး ထိုးစစ်ဆင်နေတုန်းပဲ။ မနေ့ကတော့ တိုက်ပွဲအပြင်းထန်ဆုံးလို့ ပြောရမှာ။ အကုန်လုံးပဲ ပစ်နေကြတာ သေနတ်နဲ့ကော စက်သေနတ်ကြီးကော အိမ်နားမှာဆို ကျည်ဆံခွံတွေကြီးပဲ။ လက်နက်ကြီးကော ဒရုန်းတွေနဲ့ကော TNLA က ပစ်နေတာ။ မနေ့ကတိုက်တာ ပြောရရင်တော့ သေနတ်သံက non-stop လို့ ပြောရမှာ။ စက်သေနတ်သံက တစ်မြို့လုံး ဆူညံနေတာ”ဟု နမ့်ခမ်းမြို့ တိုက်ပွဲကြားတွင် ပိတ်မိနေသည့် ဒေသခံတစ်ဦးက နိုဝင်ဘာ ၂၃ ရက်နေ့မှာ သျှမ်းသံတော်ဆင့်ကို ပြောသည်။

နမ့်ခမ်းမြို့နယ်ရှိ စစ်ကောင်စီတပ် စခန်းသစ်ကုန်းမှ ပြန်လည်ပစ်ခတ်လာသည့် ကျည်ဆံများသည် သာယာကုန်း၊ အောင်မင်္ဂလာ၊ ကုန်းကလားနှင့် ဟိုနောင်ရပ်ကွက်များအထိ ကျရောက်လာပြီး ပြည်သူနေအိမ် ထိခိုက်ပျက်စီးမှု များပြားကြောင်း နမ့်ခမ်းဒေသခံများက ပြောသည်။

“မနေ့က TNLA တပ်က စခန်းသစ်ကုန်းကို ထပ်ပြီးထိုးစစ်ဆင်တာ။ TNLA တပ်က ရပ်ကွက်ထဲ ရွာတွေထဲမှာ နေရာယူပြီး စခန်းသစ်ဘက်ကို ဒရုန်းတွေ လွှတ်တင်တာ။ ဆေးရုံအပေါ်ဘက် ကုန်းပေါ်ကနေလဲ လက်နက်ကြီး ထောင်ပစ်နေတာရှိတယ်။ စခန်းသစ်ကုန်းပေါ်ကိုလဲ မြေပြင်ထိုးစစ်ဆင်တဲ့ TNLA တပ်သားတွေနဲ့ စစ်ကောင်စီတပ်တွေ အပြန်အလှန် တိုက်ကြတယ်။ အကျအရှုံးကတော့ တိုက်နေတဲ့ နှစ်ဘက်ကပဲ သိနိုင်မယ်”ဟု နှစ်ဖက်တိုက်ပွဲ အခြေအနေကို နမ့်ခမ်းမြို့ တိုက်ပွဲကြားတွင် ပိတ်မိနေသည့် ၎င်းဒေသခံက နိုဝင်ဘာ ၂၃ ရက်နေ့မှာ သျှမ်းသံတော်ဆင့်ကို ဆက်ပြောသည်။

နိုဝင်ဘာ ၂၂ ရက် က TNLA တပ်ဖွဲ့မှ စစ်ကောင်စီတပ် စခန်းသစ်ကုန်းသို့ မြေပြင်ထိုးစစ်ဆင် တိုက်ခိုက်ခဲ့သည့် နှစ်ဖက်တိုက်ပွဲအတွင်း ထိခိုက်ဒဏ်ရာရရှိသော TNLA တပ်သားများကို နမ့်ခမ်းမြို့ ဆေးရုံသို့ ခေါ်ဆောင်လာကာ ဆေးကုသပေးပြီး မကြာမီတွင် အခြားနေရာသို့ ပြန်လည်ခေါ်ဆောင်သွားကြောင်း နမ့်ခမ်းဒေသခံများထံမှ သိရသည်။

“နမ့်ခမ်းမြို့ တောင်ဘက်မှာ တောင်ကြောတွေရှိတယ်။ စခန်းသစ်က တောင်ကြောနဲ့ မြို့ကြားထဲမှာ ရှိတာ။ အခုက TNLA တပ်တွေက စခန်းသစ်ထက် ပိုမြင့်တဲ့ တောင်ကြောတွေပေါ်ကနေ မတိုက်ဘဲ အောက်ဘက်က မြို့နေပြည်သူတွေကို အကာအကွယ်ယူပြီး တိုက်နေတာ။ TNLA တပ်ရဲ့ ဒရုန်းတွေလဲ မြို့လယ်ကနေ တစ်နေကုန် တစ်ညလုံး အများကြီး ပျံနေတာ”ဟု နမ့်ခမ်းမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

ပြီးခဲ့သည့် နိုဝင်ဘာလ ၁၇/၁၈ ရက်ကလည်း နမ့်ခမ်းမြို့ စစ်ကောင်စီတပ် စခန်းသစ်ကုန်းအား TNLA တပ်ဖွဲ့မှ ထိုးစစ်ဆင်တိုက်ခိုက်ခဲ့ပြီး စခန်းသစ် လုံခြုံရေးကုန်းအား သိမ်းပိုက်နိုင်ခဲ့ရာ စစ်ကောင်စီတပ်မှ အဆိပ်ငွေ့ဗုံး အသုံးပြုကာ ပြန်လည်တိုက်ခိုက်ခဲ့သည်ဟု TNLA တပ်ဖွဲ့မှ သတင်းထုတ်ပြန်ထားသည်။

TNLA တပ်ဖွဲ့က နမ့်ခမ်းမြို့ပေါ်ရှိ စစ်ကောင်စီလက်အောက်ခံ ထွေအုပ်ရုံးနှင့် ရဲစခန်း အပါအဝင် အခြားသော ရုံးဌာနဆိုင်ရာများကို သိမ်းပိုက်ထားပြီး နမ့်ခမ်းမြို့နယ်ကို အလုံးစုံ ထိန်းချုပ်နိုင်ရန် အစွမ်းကုန် ကြိုးပမ်းလျက်ရှိရာ စစ်ကောင်စီတပ်၏ စခန်းသစ်ကုန်းအား စစ်ဆင်ရေး ၃ ပတ်ကျော် ကြာသည်အထိ သိမ်းပိုက်နိုင်ခြင်းမရှိသေးကြောင်း နမ့်ခမ်းဒေသခံများက ပြောသည်။

“၁၀၂၇ စစ်ဆင်ရေး”ကြောင့် နမ့်ခမ်းမြို့နယ်တွင် စစ်ဘေးရှောင်ဦးရေ ၆၀၀၀ ကျော်မှာ မြန်မာ – တရုတ် နယ်စပ်နှင့် မူဆယ်မြို့နယ်များသို့ ထွက်ပြေးတိမ်းရှောင်လျက်ရှိပြီး စားနပ်ရိက္ခာနှင့် အဝတ်အထည်များ လိုအပ်နေကြောင်း စစ်ဘေးရှောင် ကူညီနေသူများထံမှ သိရသည်။