မြန်မာ-တရုတ်နယ်စပ် မူဆယ်မြို့နယ် ကျင်စန်းကျော့ ကုန်သွယ်ရေးဂိတ်တွင် ဗုံးကျရောက်ပေါက်ကွဲမှုကြောင့် ကုန်ကား ၁၀၀ စီးကျော် မီးလောင်ကျွမ်းနေကြောင်း စုံစမ်းသိရသည်။
ယနေ့ (နိုဝင်ဘာ ၂၃ ရက်) နံနက် ၉ နာရီခွဲဝန်းကျင်တွင် မူဆယ်မြို့နယ် ကျင်စန်းကျော့ ကုန်သွယ်ရေးဂိတ်တွင် ရပ်နားထားသည့် ကုန်တင်ယာဉ်တန်းများပေါ်သို့ ဗုံးကျရောက်ပေါက်ကွဲခြင်းကြောင့် ကုန်ကား အစီး ၁၀၀ ကျော် မီးလောင်ကျွမ်းနေကြောင်း မူဆယ်ဒေသခံများက ပြောသည်။
“မနက်က ကျင်စန်းကျော့ဂိတ်ဘက် ကုန်ကားတွေပေါ် ဗုံးပေါက်ကွဲလို့ မီးလောင်နေတာ အခုထိ မီးမငြိမ်းသေးဘူး။ ကားဝင်းထဲမှာ ရပ်ထားတဲ့ကားက စုစုပေါင်း အစီး ၃၀၀ ကျော်လောက်ရှိမယ်။ အခု မီးစွဲနေတာက အစီး ၁၀၀ ကျော်ရှိတယ်။ အဲ့ထဲမှာ တရုတ်ပြည်ကနေ ကုန်လာချိန်းတဲ့ ကားက ၈၀ ရာခိုင်နှုန်းလောက် မီးလောင်တဲ့အထဲ ပါသွားတယ်”ဟု မူဆယ်မြို့ ဒေသခံတစ်ဦးက သျှမ်းသံတော်ဆင့်ကို ပြောသည်။
မူဆယ်မြို့နယ် ကျင်စန်းကျော့ဂိတ် သွားမည့်လမ်းပေါ် ကောင်းခန်ကျေးရွာတွင် ကျရောက်ပေါက်ကွဲခဲ့သည့် ဗုံးမှာ မည်သည့်လက်နက်ကိုင်အဖွဲ့က ပစ်ခတ်လာသည်ဟု မသိရသေးဘဲ ယခုသတင်းရေးသားနေချိန်အထိ ၎င်းယာဉ်ရပ်နားရာနေရာရှိ ကားများမှာ မီးလောင်ကျွမ်းနေဆဲဖြစ်ကြောင်း သိရသည်။
လက်ရှိမှာ မူဆယ်မြို့နယ်တွင် ယခုရက်ပိုင်းအတွင်း ညီနောင်မဟာမိတ် ၃ ဖွဲ့နှင့် စစ်ကောင်စီတပ်တို့ အပြန်အလှန် တိုက်ပွဲဖြစ်ပွားနေသည်။
