သျှမ်းပြည် မူဆယ်ခရိုင် မုံးကိုးမြို့အတွင်း ကိုးကန့်တပ်ဖွဲ့ (MNDAA) သည် ဘုန်းကြီးကျောင်းမှ ဆရာတော် အပါအဝင် ဒေသခံပြည်သူများကိုပါ စစ်သားစုဆောင်းမှု ပြုလုပ်နေကြောင်း စုံစမ်းသိရှိရသည်။
“၁၀၂၇ စစ်ဆင်ရေး” စတင်ပြီးနောက် MNDAA တပ်ဖွဲ့သည် မုံးကိုးမြို့ ဘုန်းကြီးကျောင်းရှိ ကိုရင်များကို လူဝတ်လဲပြီး စစ်သားစုဆောင်းမှု ပြုလုပ်ခြင်း၊ အချို့ဘုန်းကြီးကျောင်းမှ ကိုရင်များ၏ မိဘများသည် ၎င်းတို့၏ သားကို ပြန်လာခေါ်ပြီး ထွက်ပြေးသွားကြောင်း မုံးကိုးဒေသခံ သတင်းရင်းမြစ် တစ်ဦး က သျှမ်းသံတော်ဆင့် ကိုပြောသည်။
“တောင်ပေါ်ကျောင်းက ကိုရင်တွေတော့ ထွက်ပြေးလွတ်မြောက်သွားတာရှိတယ်။ သူတို့ မိဘတွေ လာခေါ်ပြန်သွားတယ်။ လူဝတ်လဲပြီး တခြားနေရာမှာ ထွက်ပြေးသွားတာရှိတယ်။ မိန်းလုံဘုန်းကြီးကျောင်းတော့ မမှီလိုက်ဘူး။ စစ်သားတွေ ဝင်သွားပြီး ကိုရင်တွေကို လူဝတ်လဲပြီး စစ်သားလုပ်ခိုင်းလိုက်တယ်။ ကိုရင်ဘယ်နှပါး လူဝတ်လဲရလဲဆိုတာ အတိအကျတော့ မသိသေးဘူး။ ကျောင်းထိုင် ဆရာတော်ကတော့ တရုတ်ဘက်ကို ထွက်ပြေးသွားပြီလို့ ကြားတယ်။ ဆရာတော်က ဘာမှတောင် မပါသွားလိုက်ရဘူး။” ဟု မုံးကိုးဒေသခံ သတင်းရင်းမြစ် တစ်ဦး က ပြောသည်။
လက်ရှိ MNDAA တပ်ဖွဲ့သည် မုံးကိုးမြို့ ရပ်ကွက်တွင်းရှိ ဒေသခံ အိမ်ထောင်စု စာရင်းများ ကောက်ယူလျက်ရှိပြီး သက်ကြီးပိုင်းများကို ၎င်းတို့တပ်အတွင်း ချက်ပြုတ်ခိုင်းစေကြောင်း သိရှိရသည်။
“ခုတော့ အိမ်ထောင်စုစာရင်းတွေ ရပ်ကွက်တိုင်း ကောက်နေတယ်။ ပြီးရင် ယောကျာ်းလေး ဘယ်နှယောက်ရှိလဲ။ အိမ်မှာနေတာ ဘယ်လောက်ရှိလဲဆိုတာ သူတို့ စစ်ဆေးတယ်။ အိမ်တစ်အိမ်မှာ ယောကျာ်းလေးမရှိရင် မိန်းကလေးယူတယ်။ အမျိုးသားကော အမျိုးသမီးကော လူငယ်တွေမရှိရင် အသက် (၅၀) ကျော် (၆၀) က လူကြီးတွေကို ခေါ်ပြီး သူတို့ဝတ်စုံကိုဝတ်ခိုင်းပြီး သူတို့ကို ချက်ပြုတ်ပေးခိုင်းတယ်။”ဟု သတင်းရင်းမြစ် တစ်ဦး ကပြောသည်။
ညီနောင်မဟာမိတ် (၃) ဖွဲ့က စစ်ကောင်စီ ကို “၁၀၂၇ စစ်ဆင်ရေး” စတင်ပြီးနောက် သျှမ်းမြောက် တကြော စစ်ရေးပြင်းထန်မှု ရှိပြီး ဒေသခံပြည်သူ ၅ သောင်းကျော် စစ်ဘေးတိမ်းရှောင်နေရသည်။
MNDAA တပ်ဖွဲ့သည် စစ်ဆင်ရေးကာလအတွင်း စစ်ကောင်စီ၏ တပ်စခန်းပေါင်း (၁၅၀) ဝန်းကျင် တိုက်ခိုက်နိုင်ခြင်း၊ ချင်းရွှေဟော်မြို့ကို ထိန်းချုပ်နိုင်ခြင်း၊ လက်ရှိ လောက်ကိုင်မြို့ကို ထိန်းချုပ်နိုင်ရန်အတွက် လောက်ကိုင်မြို့အနီးဝန်းကျင်မှာ MNDAA စစ်အင်အားများ ဖြန့်ကျက်ထားကြောင်းလည်း သိရသည်။
