သျှမ်းပြည် သီပေါမြို့တွင် စစ်ကောင်စီတပ်က လက်နက်ကြီး ရမ်းသမ်းပစ်ခတ်နေခြင်းကြောင့် သီပေါဒေသခံ ၅၀၀ ကျော် ထွက်ပြေးတိမ်းရှောင်နေရကြောင်း စုံစမ်းသိရသည်။
ယနေ့ (နိုဝင်ဘာ ၂၂ ရက်) နံနက် ၅ နာရီအချိန်ခန့်မှစ၍ သီပေါမြို့တွင် လက်နက်ကြီးသံများ စတင်ကြားရပြီး စံဖိတ်ကွက်သစ် ရပ်ကွက်အတွင်း လက်နက်ကြီး ကျရောက်ပေါက်ကွဲခဲ့ရာ လုံခြုံရေးစိုးရိမ်ခြင်းကြောင့် ဒေသခံများ ထွက်ပြေးတိမ်းရှောင်နေရကြောင်း သီပေါဒေသခံများက ပြောသည်။
“မနက်က လက်နက်ကြီး စံဖိတ်ကွက်သစ်ထဲကျလို့ တချို့တွေ ဘိုးတော်ကျောင်းကို စစ်ရှောင်လာကြတယ်။ စံဖိတ်တံတားနဲ့ နီးတဲ့ အိမ်တွေပေါ့။ နောက်ပြီး ပန်းတိမ်တောင်ရပ်ကွက်ရယ်၊ ရဲစခန်းနဲ့ ထောင်တွေနဲ့နီးတဲ့ အိမ်တွေ ရှောင်လာကြတယ်။ ဝမ်မိုင်၊ တုန်စင့်၊ လောင်ခွန်နဲ့ နားမုံရွာက လူတွေ စုစုပေါင်း ၃၀၀ နီးပါး ရှိမယ်”ဟု သီပေါမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။
အလားတူ သီပေါမြို့ စံဖိတ်ကျောင်း နဲ့ ရွှေမောင်း သီလရှင်ကျောင်းတို့တွင်လည်း စစ်ဘေးရှောင်ဦးရေ ၂၀၀ ကျော် ထွက်ပြေးတိမ်းရှောင်နေရပြီး သောက်သုံးရေနှင့် စားနပ်ရိက္ခာများ လိုအပ်နေကြောင်း သီပေါမြို့ ဒေသခံများထံမှ သိရသည်။
ယနေ့ (နိုဝင်ဘာ ၂၂ ရက်) နံနက် ၁၀ နာရီခန့်ကလည်း သီပေါမြို့ စံဖိတ်ကွက်သစ် ရပ်ကွက်အတွင်း လက်နက်ကြီးကျရောက်ပေါက်ကွဲခဲ့ခြင်းကြောင့် ပြည်သူ ၁ ဦး ပွဲချင်းပြီး သေဆုံးပြီး အမျိုးသား ၄ ဦးနှင့် အမျိုးသမီး ၃ ဦး ထိခိုက်ဒဏ်ရာရခဲ့ကြောင်း သီပေါဒေသခံများက ပြောသည်။
ထို့အပြင် သီပေါမြို့နယ် နားလွယ်ဘုန်းကြီးကျောင်းအနီး လယ်ကွင်းသို့ လက်နက်ကြီး ကျရောက်ပေါက်ကွဲခဲ့ရာ စပါးရိတ်နေသူတစ်ဦး ဗုံးဆံထိမှန်ခဲ့ပြီး လောင်ခွန်ကျေးရွာအုပ်စုတွင်လဲ လူနေအိမ်ရှေ့ လက်နက်ကြီး ကျရောက်ပေါက်ကွဲခဲ့သေးသည်။
“လက်နက်ကြီးသံကတော့ ဘယ်ဖက်ကမှန်းမသိဘူး။ အခုက အသံက တစ်ဖက်ထဲကပဲ ကြားနေရသေးတယ်။ တချို့တွေ ပြောတာကလဲ လက်နက်ကြီးဆိုရင် ကျောက်မဲတပ်ထဲကနေ ချိန်ပစ်လာတာလဲ ဖြစ်နိုင်တယ်ပေါ့။ သီပေါကနေ လားရှိုးအထွက် သီပေါတံတားမှာလဲ စစ်ကောင်စီတပ်က စခန်းချထားတာလဲ ရှိတယ်။ မနက်ကလဲ သီပေါမြို့ဝင် မုခ်ဦးနားမှာလဲ မကွဲသေးတဲ့ လက်နက်ကြီး ၁ လုံး ကျသေးတယ်”ဟု သီပေါမြို့မှ ၎င်းဒေသခံက သျှမ်းသံတော်ဆင့်ကို ဆက်ပြောသည်။
သီပေါမြို့တွင် စစ်ကောင်စီတပ် ခလရ-၂၃ ၊ ခမရ-၅၀၃/၅၀၄ တပ်ရင်းတို့ အခြေစိုက်ပြီး ပြင်ဦးလွင်မှ ထိုးစစ်ဆင်ရန် အင်အားဖြည့်တင်းလာသည့် စစ်ကောင်စီယာဉ်တန်းသည် ကျောက်မဲမြို့သို့ နိုဝင်ဘာ ၁၉ ရက် တွင်ရောက်ရှိလာပြီး ၎င်းတို့အထဲမှ စစ်ကား ၁၀ စီးခန့်သည် သီပေါမြို့သို့ ဆက်လက်ထွက်ခွာနေသည်ဟု ကျောက်မဲဒေသခံများက ပြောသည်။
