သျှမ်းပြည် အောင်ပန်းမြို့သို့ လာရောက်ခိုလှုံနေသည့် စစ်ဘေးရှောင်များ စားဝတ်နေရေးအခက်အခဲနှင့် အနွေးထည်များလိုအပ်နေကြောင်း စုံစမ်းသိရသည်။
သျှမ်း-ကရင်နီတကြော “၁၁.၁၁ စစ်ဆင်ရေး”ကြောင့် နိုဝင်ဘာလ ၁၅ ရက်မှထွက်ပြေးလာပြီး၊ လက်ရှိမှာ သျှမ်းပြည် အောင်ပန်းမြို့ရှိ ဘုန်းကြီးကျောင်းများနှင့် ဆွေမျိုးအိမ်များသို့ လာရောက် စစ်ဘေးရှောင်နေကြပြီး စားဝတ်နေရေး နှင့် အနွေးထည်များ လိုအပ်နေကြောင်း စစ်ဘေးရှောင်ကူညီနေသူတစ်ဦးက သျှမ်းသံတော်ဆင့်ကို ပြောသည်။
“စားဝတ်နေရေးနဲ့ ဆေးတွေကတော့ အခက်အခဲများတာပေါ့။ဘုန်းကြီးနဲ့ သူတို့နဲ့ ဝိုင်းပြီးချက်စားနေရတာပေါ့။ ဆောင်းရာသီ ရောက်လာတဲ့အတွက် အနွေးထည်လိုတယ်။ အခုက စစ်ရှောင်တွေကို ကူညီပေးတဲ့သူ သိပ်မရှိဘူး” ဟု စစ်ဘေးရှောင် ကူညီနေသူ တစ်ဦးက ပြောသည်။
ထိုပြင် အချို့သော စစ်ဘေးရှောင်များလည်း ငွေကြေးအခက်အခဲများ၊ စားဝတ်နေရေးအခက်အခဲများ ကြောင့် ခြံအလုပ်များလိုက်လုပ်ကာ ရှာဖွေစားသောက် နေရသည်။
“အခက်ခဲတော့ရှိတာပေါ့။ စစ်ရှောင်တာက လူပဲရှောင်လို့မရဘူးလေ။ ပိုက်ဆံလည်းလိုတာပေါ့။ နိုင်ငံရေးမကောင်း၊ စီပွားရေးက မကောင်း ခုစိုက်ပျိုးထားတာကလည်း ဘာမှမလုပ်ရ လယ်ထဲမှာလည်းစပါးတွေ ဒီတိုင်းထားထားတုန်း ၊ရိတ်လည်းမရိတ်ရသေးဘူး။” ဟု စစ်ဘေးရှောင်လာသူ တစ်ဦးက ပြောသည်။
ကရင်နီ (ကယားပြည်) တွင်လည်း လွိုင်ကော်မြို့တွင် ဖုန်းလိုင်းများဖြတ်တောက်ထားကြောင်း၊ သျှမ်း-ကရင်နီ နယ်စပ်တကြောနှင့် လွိုင်ကော်မြို့ တို့တွင် ၁၁.၁၁ စစ်ဆင်ရေးတွင် လက်နက်ကြီး၊ လေကြောင်း တိုက်ခိုက်မှုနှင့် ပစ်ခတ်သတ်ဖြတ်ခံရသူ ၇၀ ဝန်းကျင် ရှိကြောင်း သိရသည်။
