သျှမ်းပြည် သီပေါမြို့ရှိ စံဖိတ်ရပ်ကွက်တွင် လက်နက်ကြီး ကျရောက်ပေါက်ကွဲခြင်းကြောင့် ပြည်သူ ၁ ဦး ပွဲချင်းပြီး သေဆုံးကာ ၄ ဦး ထိခိုက်ဒဏ်ရာ ရရှိကြောင်း စုံစမ်းသိရသည်။
ယနေ့ (နိုဝင်ဘာ ၂၂ ရက်) နံနက် ၁၀ နာရီခွဲခန့် သီပေါမြို့ စံဖိတ်ကွက်သစ် ရပ်ကွက်တွင် လက်နက်ကြီးကျရောက်ပေါက်ကွဲခြင်းကြောင့် အသက် ၄၉ နှစ်အရွယ်ရှိ ဦးဉာဏ်ဌေး ဆိုသူ ပွဲချင်းပြီး သေဆုံးပြီး၊ အရပ်သား ၄ ဦး ထိခိုက်ဒဏ်ရာ ပြင်းထန်ကြောင်း သီပေါ်မြို့ဒေသခံများက ပြောသည်။
“မနက် ၁၀ နာရီ မထိုးခင်လေးတင်ပါ။ အိမ်ခေါင်ကနေ ထိတာ၊ တစ်အိမ်လုံး စုတ်ပြတ်ကုန်တာ။ ဆုံးသွားတဲ့ ဦးလေးက ပေါင်နဲ့ ရင်ဘတ်ကို မှန်သွားတာ၊ ပွဲချင်းပြီးပါပဲ။ မိသားစုဝင်တွေတော့ မထိကြဘူး။ ရပ်ကွက်ထဲက ၄ ယောက်ထိတယ်၊ နောက်တစ်ယောက်လည်း အခြေအနေ မကောင်းဘူး”ဟု သီပေါမြို့မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
သီပေါမြို့အနီး TNLA တပ်ဖွဲ့နှင့် စစ်ကောင်စီတပ်တို့ လက်နက်ကြီးဖြင့် အပြန်အလှန် ရမ်းသမ်းပစ်ခတ်နေခြင်းကြောင့် စံဖိတ်ရပ်ကွက်အတွင်း ကျရောက်ပေါက်ကွဲကာ နေအိမ် ၇ လုံးထက်မနည်း ထိခိုက်ပျက်စီးပြီး ထိခိုက်ဒဏ်ရာ ရရှိသည့် အမျိုးသား ၄ ဦးကို လားရှိုးသို့ ဆေးကုသရန် ပို့ဆောင်နေကြောင်း ၎င်းအမျိုးသမီးက ဆက်ပြောသည်။
လက်ရှိတွင် သီပေါမြို့ မုခ်ဦးအကျော်ရှိ စံဖိတ်တံတားအနီး၌ TNLA တပ်ဖွဲ့များ နေရာယူထားပြီး တံတားပေါ်မှ ဖြတ်သန်းသွားလာခွင့် မပေးတော့ဘဲ စံဖိတ်ကွက်သစ်ရပ်ကွက်ရှိ ပြည်သူများမှာ တိုက်ပွဲအတွင်း ပိတ်မိလျက်ရှိကာ ထွက်ပြေးတိမ်းရှောင်ရန် အခက်အခဲဖြစ်နေကြောင်း သီပေါဒေသခံများက ပြောသည်။
“လက်နက်ကြီးသံတော့ ဘယ်ဘက်ကမှန်း မသိဘူး၊ အစောပိုင်းကတော့ မြို့ထဲပြေးတဲ့လူပြေးပေါ့။ စံဖိတ်ကျောင်းနဲ့ ရွှေမောင်း သီလရှင်ကျောင်းမှာ ရှောင်နေကြတယ်။ အခုက တံတားလဲ ပေးမဖျက်တော့ ပြေးစရာမြေ မရှိကြဘူး။ TNLA တပ်သားတွေက သင်္ချိုင်းအကူး တံတားနားမှာ နေရာယူထားတာ။ အခုတောင် ရပ်ကွက်ထဲ ပေးမဝင်တော့ဘူး”ဟု သီပေါမြို့မှ ဒေသခံတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် နိုဝင်ဘာ ၁၉ ရက်တွင် ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသည့် စစ်ကား ၄၀ စီးကျော်နှင့် သံချပ်ကာ ၁ စီးတို့သည် ကျောက်မဲမြို့သို့ ရောက်ရှိလာပြီး စစ်ကား ၁၀ စီးခန့်မှာ သီပေါမြို့သို့ ဆက်လက်ထွက်ခွာနေသည်ဟု ကျောက်မဲဒေသခံများက ပြောသည်။
နိုဝင်ဘာ ၁၂ ရက်ကလည်း စစ်ကောင်စီမှ ကျောက်မဲ၊ သီပေါနှင့် လားရှိုးမြို့များသို့ အင်အားဖြည့်တင်းလာသည့် ထောက်ပို့ယာဉ်တန်းကို ဖြတ်တောက်နိုင်ရန်အတွက် ကျောက်မဲနှင့် သီပေါကြားရှိ ကျင်သီတံတားကို TNLA တပ်ဖွဲ့က ဗုံးခွဲဖျက်ဆီးခဲ့ခြင်းကြောင့် ထက်ပိုင်းကျိုးသွားခဲ့ပြီး သွားလာ၍ မရတော့ကြောင်း သိရသည်။
