သျှမ်းပြည် လားရှိုးမြို့အခြေစိုက် အရှေ့မြောက် တိုင်းစစ်ဌာနချုပ်က မာရှယ်လော ထပ်မံကြေညာပြီးနောက် စစ်ကောင်စီက အရပ်သား ၄ ဦးထက်မနည်း ပစ်သတ်ခဲ့ကြောင်း စုံစမ်းသိရသည်။
အရှေ့မြောက် တိုင်းစစ်ဌာနချုပ် (ရမခ)မှ လားရှိုးမြို့နယ်တွင် နိုဝင်ဘာလ ၁၅ ရက်တွင် မာရှယ်လော စတင်ထုတ်ပြန်ခဲ့ပြီး ည ၆ နာရီမှ နံနက် ၆ နာရီအတွင်း ညမထွက်ရအမိန့် မလိုက်နာသူများကို ဖမ်းဆီးအရေးယူလျက်ရှိရာ တစ်ပတ်အတွင်း လူ ၄ ဦးကို စစ်ကောင်စီက ပစ်သတ်ခဲ့ကြောင်း လားရှိုးဒေသခံများက ပြောသည်။
“သူတို့စစ်တပ်က ညမထွက်ရ ကြေညာပြီးနောက်တစ်ရက် နိုဝင်ဘာ ၁၆ ရက်နေ့ မနက်စောစောမှာ လူ ၂ ယောက် ပစ်သတ်ခံရတယ်။ မနက်ဈေး စောစောသွားတဲ့လူလို့ ပြောကြတယ်။ နောက်တစ်ယောက်က ဗူးခွံလိုက်ကောက်တဲ့လူ။ နောက်ထပ် ၂ ယောက်က နိုဝင်ဘာ ၁၈ ရက်မှာ ပစ်သတ်ခံရတာ။ သူတို့က အလုပ်ကနေ အိမ်အပြန် ဗျူဟာလမ်းမှာ ပစ်သတ်ခံရတာ”ဟု အမည်မဖော်လိုသည့် လားရှိုးဒေသခံတစ်ဦးက သျှမ်းသံတော်ဆင့်ကို ပြောသည်။
လားရှိုးမြို့ ဗျူဟာလမ်းတွင် သေနတ်ပစ်သတ်ခံရသူ ၂ ဦးမှာ အလုပ်မှ အိမ်အပြန် အိမ်ခြံဝင်းတံခါးသို့ ရောက်နေစဉ် ည ၆ နာရီကျော် အချိန်ရှိနေ၍ စစ်ကောင်စီတပ်သားများမှ တစုံတရာ မေးမြန်းခြင်းမရှိဘဲ ပစ်သတ်ခဲ့ရာ အိမ်ခြံဝင်းအဝင်ဝတွင် ပွဲချင်းပြီး သေဆုံးသွားကြောင်း လားရှိုးမြို့မှ ၎င်းဒေသခံက သျှမ်းသံတော်ဆင့်ကို ဆက်ပြောသည်။
စစ်ကောင်စီ၏ သေနတ်ပစ်သတ်ခံရပြီး သေဆုံးသူ ၄ ဦးစလုံးသည် အသက် ၃၀ မှ ၄၀ ကြားရှိ အမျိုးသားများ ဖြစ်သည်ဟု သိရပြီး လားရှိုးမြို့ပေါ်ရှိ ပြည်သူများမှာ ညမထွက်ရ အမိန့်ကြောင့် လတ်တလော သွားလာရေး ခက်ခဲနေကြောင်း လားရှိုးမြို့ဒေသခံများက ပြောသည်။
“ဒီလိုဆိုရင်တော့ ဈေးမှာရောင်းတဲ့ ကုန်စိမ်းသည်တွေ၊ သားငါးရောင်းတဲ့သူတွေ အခက်အခဲ ဖြစ်တာပေါ့။ သူတို့အရင်က အချိန်မသတ်မှတ်တုန်းကတောင် သွားလာရ ခက်နေတာ။ ခုကျတော့ မနက် ၆ ည ၆ ဆို ပိုဆိုးပြီပေါ့။ မနက်ခင်းရောင်းတဲ့ ဈေးသည်လေးတွေဆိုရင် မနက် ၄ နာရီ ကတည်းက ထရတာရှိတယ်။ ဒီပုံစံနဲ့ဆိုရင်တော့ ငတ်ရုံပဲရှိတော့မှာ”ဟု လားရှိုးမြို့မှ ဈေးသည်တစ်ဦးက သျှမ်းသံတော်ဆင့်ကို ပြောသည်။
ယခုကဲ့သို့ ညမထွက်ရအမိန့်ကြောင့် ည ၆ နာရီမှစ၍ စစ်ကောင်စီတပ်သားများမှ မြို့တွင်းလမ်းများတွင် ကင်းစောင့်၍ ကားများကို စစ်ဆေးနေပြီး ကားသမားများကို ဖမ်းဆီးခေါ်ဆောင်သွားခြင်းကြောင့် ဒေသခံပြည်သူများမှာ သွားလာရေးအတွက် စိုးရိမ်ထိတ်လန့်နေကြောင်း လားရှိုးဒေသခံများက ပြောသည်။
ပြီးခဲ့သည့် နိုဝင်ဘာ ၁၇ ရက်နေ့ကလည်း နမ့်ခမ်းမြို့နယ်တွင် မူဆယ်-နမ့်ခမ်း လမ်းမကြီးရှိ မန်ခမ်း-နောင်စမ့်တွင် TNLA တပ်ဖွဲ့မှ လမ်းပိတ်ဆို့တားမြစ်ခဲ့ရာ ဒေသခံပြည်သူများမှာ သွားလာရေးခက်ခဲနေသည်ဟု သိရသည်။
အရှေ့မြောက် တိုင်းစစ်ဌာနချုပ် (ရမခ) လက်အောက်ခံ လားရှိုး၊ ကွတ်ခိုင်၊ သိန္နီ၊ မူဆယ်၊ နမ့်ခမ်းနှင့် ကွမ်းလုံမြို့နယ်တို့တွင်လည်း မာရှယ်လော ကြေညာထားပြီး ည ၆ နာရီမှ နံနက် ၆ နာရီအထိ ညမထွက်ရအမိန့် ထုတ်ပြန်ထားသည်။
