သျှမ်းပြည် နောင်ချိုမြို့ မှ ပြင်ဦးလွင်မြို့သို့လာရောက် တိမ်းရှောင်သည့် ပြည်သူများကို စစ်ကောင်စီမှ နေရပ် အတင်းအဓမ္မ ပြန်ခိုင်းကြောင်း စုံစမ်းသိရသည်။

ညီနောင်မဟာမိတ်(၃)ဖွဲ့နှင့် စစ်ကောင်စီ တို့ “၁၀၂၇ စစ်ဆင်ရေး” ကြောင့် နောင်ချိုမြို့မှ ပြင်ဦးလွင်မြို့သို့ ထွက်ပြေးတိမ်းရှောင်သည့် ပြည်သူများကို နိုဝင်ဘာ ၁၈ရက် နောက်ဆုံးထားပြီး အပြီးပြောင်းရွှေ့ခိုင်းသဖြင့် စစ်ဘေးရှောင်များ အခက်ကြုံတွေ့နေရကြောင်း စစ်ဘေးရှောင် ကူညီပေးနေသူတစ်ဦး က သျှမ်းသံတော်ဆင့်ကို ပြောသည်။

“၁၈ ရက်က အပြီးရွှေ့ပေးရတာ။ စစ်ဘေးရှောင်စခန်းတွေ အကုန်လုံးကိုရွှေ့ခိုင်းတာ။သူတို့ရွာထဲ ပြန်သွားတယ် ၁၇ ရက်နေ့က တိုက်ပွဲ ပြန်ဖြစ်တော့ တစ်ခါ ပြန်ထွက် ပြေးလာရပြန်တယ်။ ဒီဖက်က လက်မခံတော့ သူတို့မှာက ခက်ခက်ခဲခဲနဲ့သူတို့ ခိုပုန်းနိုင်တဲ့ နေရာလေးတွေမှာပဲနေရတာပေါ့ တော်တော်တော့ အခက်အခဲဖြစ်ပါတယ်၊ စားရေးသောက်ရေး နေရထိုင်ရတာ အဲ့လိုအခက်အခဲတွေ့တာပေါ့” ဟု ၎င်း ကပြောသည်။

စစ်ဘေးရှောင်များသည် နောင်ချို့မြို့နယ် ကျေးရွာရှိ ဆွေမျိုးအိမ်များ၊ ဘုန်းကြီးကြောင်းများတွင် ပြန်လည် ရွှေ့ပြောင်းခိုလှုံနေထိုင်နေရသည့် စစ်ဘေးရှောင်ဦးရေ စုစုပေါင်း ၆၀၀ ကျော်ရှိကြောင်း သိရသည်။

ညီနောင်မဟာမိတ် ၃ ဖွဲ့နှင့် စစ်ကောင်စီတို့၏ “စစ်ဆင်ရေး-၁၀၂၇”ကြောင့် နောင်ချိုမြို့နယ်အတွင်း စစ်ဘေးရှောင်ဦးရေ ၂၅၀၀ ကျော်အထိ ရှိလာပြီး သဖန်းကိုင်း၊ သုံးဆယ်၊ ငို့ကလေး၊ အင်းဝိုင်း၊ ဘန့်ဘွေးနှင့် ပြင်ဦးလွင်မြို့ရှိ ဘုန်းကြီးကျောင်းများတွင် ထွက်ပြေးတိမ်းရှောင်နေရသည်။