သျှမ်းပြည် နမ့်ဆန်မြို့နယ် မြို့သစ်ကျေးရွာတွင် စစ်ကောင်စီမှ လေကြောင်းဖြင့် ဗုံးကြဲ တိုက်ခိုက်ခြင်းကြောင့် ကလေး ၂ ဦးအပါအဝင် အရပ်သား ၃ ဦးသေဆုံးခဲ့ကြောင်း စုံစမ်းသိရသည်။
ယမန်နေ့ (နိုဝင်ဘာ ၁၉ ရက်) ည ၁၁ နာရီကျော်တွင် စစ်ကောင်စီတပ်က နမ့်ဆန်မြို့နယ် မြို့သစ်ကျေးရွာသို့ လေကြောင်းမှ ပေါင် ၅၀၀ ဗုံးဖြင့် ကြဲချသဖြင့် ဦးဆန်နော၏ နေအိမ်ပေါ်သို့ ကျရောက်ပေါက်ကွဲခဲ့ပြီး ဦးဆန်နောနှင့် ကလေး ၂ ဦးမှာ ပွဲချင်းပြီး သေဆုံးသွားကြောင်း နမ့်ဆန်ဒေသခံများက ပြောသည်။
“မနေ့ညက ဗုံးလာကြဲသွားတာ ကလေး ၂ ယောက်နဲ့ လူကြီး ၁ ယောက် ဆုံးသွားတယ်။ ဗုံးက ဦးဆန်နောအိမ်နားမှာ ကျတာ၊ သူကတော့ ပွဲချင်းပြီးလို့ ပြောတယ်။ မြို့သစ်ဘက် အိမ်ခြေကတော့ ၂၀ ကျော်လောက် မီးလောင်ပြီး ပျက်သွားကုန်ပြီ”ဟု နမ့်ဆန်မြို့မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်မှ ယမန်နေ့ (နိုဝင်ဘာ ၁၉ ရက်) ညအချိန်က နမ့်ဆန်မြို့နယ် မြို့သစ်ကျေးရွာကို လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် ပြည်သူနေအိမ် ၂၀ ကျော် မီးလောင်ပျက်စီးခဲ့ပြီး အမျိုးသမီး ၆ ဦးနှင့် အမျိုးသား ၁ ဦး စုစုပေါင်း ၇ ဦး ထိခိုက်ဒဏ်ရာရရှိခဲ့ကြောင်း နမ့်ဆန်ဒေသခံများမှ သိရသည်။
လက်ရှိအချိန်တွင် နမ့်ဆန်မြို့ရှိ စစ်ကောင်စီတပ်မှ ကွန်ဟယ်ရွာဘက်သို့ တိုက်ပွဲတစုံတရာ ဖြစ်ပွားခြင်းမရှိဘဲ လက်နက်ကြီးများဖြင့် ရမ်းသမ်းပစ်ခတ်နေကြောင်း နမ့်ဆန်ဒေသခံများက ပြောသည်။
“နမ့်ဆန်မှာလဲ ဒီမနက် ပစ်နေတယ်ကော။ နမ့်ဆန်မှာ သေနတ်သံတော့ မကြားသေးဘူး၊ လက်နက်ကြီးအသံပဲ ကြားရတယ်။ နမ့်ဆန်တပ်ထဲကနေ တပ်ကုန်းဟိုဘက် ကွမ်ဟယ်ဘက်ကို ပစ်နေတယ်။ ဆေးရုံနားကနေ လှမ်းပစ်နေတာ” နမ့်ဆန်မြို့မှ ၎င်းဒေသခံအမျိုးသမီးက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် နိုဝင်ဘာလ ၁၈ ရက် နေ့လည် ၁၂ နာရီခွဲဝန်းကျင်တွင်လည်း နမ္မတူမြို့နယ် ပန်ဟိုင်းကျေးရွာတွင် စခန်းချနေသည့် စစ်ကောင်စီတပ်မှ ရမ်းသမ်းပစ်ခတ်သည့် လက်နက်ကြီးသည် မိုင်းရင်ကျေးရွာရှိ ပါ့ဆိုင်ယာ့၏ နေအိမ်သို့ ကျရောက်ပေါက်ကွဲခဲ့ပြီး ထိခိုက်ပျက်စီးခဲ့ကြောင်း နမ္မတူဒေသခံများထံမှ သိရသည်။
သျှမ်းပြည်မြောက်ပိုင်းတွင် “၁၀၂၇ စစ်ဆင်ရေး” စတင်လာသည့် ၃ ပတ်အတွင်း စစ်ကောင်စီမှ လက်နက်ကြီးနှင့် လေကြောင်းဗုံးကြဲ တိုက်ခိုက်မှုကြောင့် ပြည်သူနေအိမ် ၁၅၀ ထက်မနည်း ထိခိုက်ပျက်စီးခဲ့ပြီး နှစ်ဖက်တိုက်ပွဲများကြောင့် စစ်ဘေးရှောင်ဦးရေ ၅ သောင်းကျော် ထွက်ပြေးတိမ်းရှောင်နေရသည်။
Leave a Comments