သျှမ်းပြည်တောင်ပိုင်းရှိ မြို့နယ်နှင့် ကျေးရွာများတွင် ကရင်နီ (ကယား) ပြည်အတွင်း တိုက်ပွဲကြောင့် ထွက်ပြေးတိမ်းရှောင်လာရသည့် စစ်ဘေးရှောင်များ နေ့စဉ် ရာနှင့်ချီရှိနေသော်လည်း စစ်ကောင်စီက လက်မခံရန် ညွှန်ကြားထားသဖြင့် အကူအညီပေးနေသူများ အခက်အခဲဖြစ်နေကြောင်း စုံစမ်းသိရသည်။

ယခုရက်ပိုင်းအတွင်း သျှမ်း-ကရင်နီ (ကယား) ပြည် နယ်စပ်တလျှောက်တွင် စစ်ကောင်စီတပ်နှင့် ကရင်နီ တော်လှန်ရေး ပူးပေါင်းတပ်ဖွဲ့များတို့အကြား တိုက်ပွဲပြင်းထန်နေပြီး အဆိုပါ တိုက်ပွဲကြောင့် မိမိနေရပ်အိုးအိမ် စွန့်ပစ်ပြီး ထွက်ပြေးတိမ်းရှောင်နေရသည့် စစ်ရှောင်များ နေ့စဉ်ရှိနေသည်။

လက်ရှိ စစ်ရှောင်များသည် သျှမ်းပြည် တောင်ကြီးခရိုင် တောင်ကြီးမြို့၊ ညောင်ရွှေမြို့နယ်၊ ပင်လောင်းမြို့နယ်၊ နောင်တရားမြို့နယ် (ခွဲ) နှင့် ဆီဆိုင်မြို့နယ်ရှိ ရပ်ကွက်များ၊ ကျေးရွာများတွင် လာရောက် ခိုလှုံနေထိုင်ရပြီး အချို့လည်း ဆွေမျိုးမိတ်ဆွေများနှင့်အတူ နေထိုင်ရသည်။

ထိုကဲ့သို့ ထွက်ပြေးတိမ်းရှောင်လာသည့် စစ်ရှောင်များကို လက်မခံထားရန် သက်ဆိုင်ရာမြို့နယ်ရှိ စစ်ကောင်စီ လက်အောက်ခံ အုပ်ချုပ်ရေးမှူးမှ ညွှန်ကြားထားသဖြင့် ပေါ်ပေါ်ထင်ထင် အကူအညီတောင်းခံခြင်းနှင့် နေရာချထားပေးရန် အခက်အခဲဖြစ်နေကြောင်း ဆီဆိုင်မြို့ စစ်ရှောင်ကော်မတီဝင်တစ်ဦးက သျှမ်းသံတော်ဆင့်ကိုပြောသည်။

“ တချို့ဆိုရင် ဘယ်သွားရမှန်း၊ ဘာလုပ်ရမှန်း မသိဘူးဖြစ်နေတယ်။ လုပ်ရကိုင်ရတာလည်း ပေါ့ပေါ့ပါးပါးမရှိဘူး။ ကျနော်တို့ နေရာပေးချင်တယ်၊ ဒီနေရာလွှတ်တယ်၊ ပေးနေဖို့သင့်တယ်ဆိုရင် သူတို့က အရင်လို လှိုက်လှိုက်လဲလဲမရှိတော့ ကျနော်တို့ကူညီပေးတဲ့လူ ကြားထဲမှာ နည်းနည်းဒုက္ခရောက်တာပေါ့။ အရင်ပုံစံလိုမျိုး ပေါ်ပေါ်ထင်ထင် မလုပ်ရဲတာတို့၊ လိုင်းပေါ်မှာ ဆက်သွယ်ရမယ့် ဖုန်းနံပါတ် မတင်ရဲတာတို့ပေါ့။ ကျနော်တို့လည်း စိတ်မကောင်းဘူး” ဟု ၎င်းကော်မတီဝင် တစ်ဦးက ပြောသည်။

ယင်းကဲ့သို့ စစ်ရှောင်များအတွက် လူသားချင်းစာနာထောက်ရေး ကိစ္စကို လွတ်လပ်စွာ မလုပ်ကိုင်နိုင်အတွက် အကူအညီရရှိရန်လည်း အခက်အခဲဖြစ်နေကြောင်း ၎င်းက ဆက်ပြောသည်။

ထို့အတူ အင်းလေးဒေသရှိ ကျေးရွာများတွင်လည်း ရပ်ကွက်လူကြီးများမှ ဦးဆောင်၍ ကရင်နီ စစ်ဘေးရှောင်များ လက်မခံရန် အသံချဲ့စက်ဖြင့် ညွှန်ကြားနေကြောင်း ဒေသခံများထံမှ သိရသည်။

“ အင်းလေး၊ မင်းချောင်းရှေ့ရွာမှာ ရပ်ကွက်လူကြီးက စစ်ရှောင်တွေကို လက်မခံဖို့ အသံချဲ့စက်နဲ့ အော်နေတယ်။ အခု နေနေတဲ့ စစ်ရှောင်တွေကိုလည်း တစ်ရက်၊ နှစ်ရက်ပဲ နေခွင့်ပြုနိုင်မယ် ပြောတယ်။ ပြီးရင် ပြန်ကြဖို့ ဖိအာပေးနေတယ်။ လူလူချင်းတောင် အပြန်အလှန် ကူညီလို့မရတဲ့ ခေတ်ဖြစ်နေပြီ။ စစ်ရှောင်တွေကို လက်မခံတာ တမင်တကာ သေတွင်းထဲ ပို့နေတာနဲ့ အတူတူပဲ “ ဟု အင်းလေးဒေသခံ အမျိုးသမီးတစ်ဦးက ပြောသည်။

အလားတူ တောင်ကြီးမြို့နယ်အတွင်းရှိ စစ်ကောင်စီရေး စစ်ဆေးရေးဂိတ်များတွင်လည်း စစ်ဆေးမှု တင်းကြပ်နေပြီး လွိုင်ကော်၊ ဖယ်ခုံနှင့် မိုးဗြဲ စသည့် မှတ်ပုံတင် (၂/) ကိုင်ဆောင်ထားသူများကို ဖြတ်သန်းသွားလာခွင့် ပိတ်ပင်ထားသည်။

ပင်လောင်းမြို့ စစ်ရှောင်ကူညီသူ ကော်မတီတစ်ဦးက “ အခုက နီးစပ်ရာဆွေမျိုးတွေ၊ ရွာတွေ၊ မြို့တွေပေါ်မှာ အများကြီးရောက်လာတယ်။ လောလောဆယ် စာရင်းပြုစုနေတာတွေတော့ စနေပြီလို့ပြောတယ်။ လမ်းမှာလည်း ကားတွေအများကြီးပဲ ထွက်ပြေးလာကြတာ “ ဟု ၎င်းကပြောသည်။

နိုဝင်ဘာလ ၁၁ ရက်မှ စတင်ခဲ့သည့် “၁၁.၁၁ စစ်ဆင်ရေး” ကြောင့် သျှမ်း-ကရင်နီ နယ်စပ် တစ်လျှောက် အပါအဝင် တိုက်ပွဲများဖြစ်နေပြီး မြို့ပေါ် လူနေရပ်ကွက်များကို စစ်ကောင်စီမှ လေယာဉ်ဖြင့် ဗုံးကျဲတိုက်ခိုက်မှုများ နေ့စဉ်ဆိုသလို ကြုံတွေ့နေရကြောင်းသိရသည်။

ကရင်နီပြည်ထဲ စစ်ကောင်စီက ပစ်ခတ်သည့် လက်နက်ကြီးနှင့် လေယာဥ်မှ ဗုံးကျဲချမှုများကြောင့် ကလေးငယ်အပါအဝင် လူဦးရေ ၅၀ နီးပါးသေဆုံးခဲ့ကြောင်း ကရင်နီလူ့အခွင့်အရေးအဖွဲ့ ဒါရိုက်တာ ဦးဗညားက သျှမ်းသံတော်ဆင့်ကို ပြောဆိုထားသည်။