သျှမ်းပြည် နောင်ချိုမြို့နယ်အတွင်း စစ်ကောင်စီတပ် နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ကြား ခွဲစိတ်မွေးဖွားစ မိခင်၏ ဒဏ်ရာပိုးဝင်မှုကြောင့် အကူအညီလိုအပ်နေကြောင်း စုံစမ်းသိရသည်။
အဆိုပါ ခွဲစိတ်မွေးဖွားစ မိခင်သည် အသက် ၂၉နှစ်အရွယ်သာရှိပြီး တိုက်ပွဲမဖြစ်ခင် ရက် ၂၀ တွင် ကလေးကို ဗိုက်ခွဲပြီးမွေးဖွားခဲ့ရသူတစ်ဦးဖြစ်သည်။
ထိုမွေးဖွားပြီးနောက်ပိုင်း အောက်တိုဘာ ၂၀ ရက်တွင် သူမနေထိုင်သည့် နောင်ချိုမြို့နယ်အတွင်း တိုက်ပွဲ ဖြစ်ပွားကာ ထွက်မပြေးနိုင်ဘဲ ၎င်းတို့နေအိမ်အတွင်း ပုန်းခိုနေစဉ် လက်နက်ကိုင်တပ်ဖွဲ့တစ်ခုမှ ဝင်ရောက်တွေ့ရှိသွားပြီး အဆိုပါနေအိမ်မှ ထွက်ခွာသွားရန် ဖိအားပေးခဲ့သည်။
ထိုနေအိမ်မှ ထွက်မသွားပါက သေနတ်ဖြင့် ပစ်ခတ်မည်ဟု ဆိုကာ ခြိမ်းခြောက်ခဲ့သဖြင့် ထွက်ပြေးတိမ်းရှောင်
လာခဲ့ရကြောင်း ၎င်းကိုသွားရောက်ကူညီခဲ့သည့် အမျိုးသားတစ်ဦးက ပြောသည်။
“ သူကရွာထဲမှာ ဒီလို နေနေတာ။ သူများတွေလိုလည်း မပြေးနိုင်ဘူး။ ကလေးလည်း ငယ်သေးတယ်၊ ဒဏ်ရာလည်း ဖြစ်တယ်ဆိုတော့ ရွာထဲမှာနေနေတဲ့အချိန် စစ်သားတွေ ထွက်ဖို့လာပြောတာပေါ့။ နင်တို့မပြေးရင် ပစ်မယ်။ ဘာဖြစ်တယ်၊ ညာဖြစ်တယ် ဆိုပြီးပြောတော့ ထွက်ပြေးလာရတာ “ ဟု ၎င်းကိုသွားရောက် ကူညီခဲ့သည့် အမျိုးသားတစ်ဦးက ပြောသည်။
ထိုအချိန်တွင် ဗိုက်ခွဲကလေးမွေးဖွားရသည့် ဒဏ်ရာက မကျက်သေးပေ။ ထိုဒဏ်ရာမကျက်ဘဲ ထွက်ပြေးတိမ်းရှောင် လာရသဖြင့် ချုပ်ထားသော ချုပ်ရိုးဖြည်သွားပြီး ပိုးဝင်သဖြင့် ဆေးကုသနေရကြောင်း၊ ၎င်း၏ မွေးကင်းစ ကလေးငယ်လည်း အသားဝါ ဖြစ်နေကြောင်း သွားရောက်ကူညီသူက ရှင်းပြသည်။
“မွေးပြီးတဲ့ ၂၀ ရက်နေ့ ကျော်တဲ့အချိန်က သူတို့ရွာမှာ တိုက်ပွဲဖြစ်တယ်။ ပြေးလွှားရင်းနဲ့ ချုပ်ရိုးက အကုန်ပြန် ဖြေသွားတာ။ သူတို့စစ်ရှောင်ဆိုတော့ စစ်ရှောင်စခန်းမှာလည်း သွားနေသေးတယ်။ သွားနေတဲ့အချိန်မှာ ဂရုမစိုက်မိတော့ အထဲမှာ ပိုးနည်းနည်းဝင်သွားတယ်။ ပစ္စည်းတွေ၊ ဘာတွေက သယ်သေးတယ်။ သူ့ ကလေးကလည်း အသားဝါ နည်းနည်းဝင်နေတယ်။ သူ့အမေကိုတော့ ဒဏ်ရာကိုမနေ့က ပြန်ချုပ်ထားတယ် “ ဟု သွားရောက်ကူညီသူတစ်ဦးက ထပ်လောင်းပြောသည်။
ထို့အပြင် (နိုဝင်ဘာလ ၁၅ ရက်)တွင်လည်း နောင်ချိုမြို့နယ်တွင် စစ်ကောင်စီတပ်မှ ရမ်းသမ်းပစ်ခတ်သည့် လက်နက်ကြီးသည် သုံးဆယ်အုပ်စု ဇီးဖြူရေကျေးရွာအတွင်း ကျရောက်ပေါက်ကွဲခြင်းကြောင့် မိသားစုဝင် ကလေးငယ် ၂ ဦး ပွဲချင်းပြီး သေဆုံးကာ ကလေးငယ် ၁ ဦးနှင့် မိခင်ဖြစ်သူတို့ ၂ ဦးထိခိုက် ဒဏ်ရာရရှိသည်။
လက်ရှိ နောင်ချိုမြို့နယ်တွင် တိုက်ပွဲကြောင့် ထွက်ပြေးတိမ်ရှောင်နေရသည့် စစ်ရှောင် စုစုပေါင်း ၂ ထောင်မှ ၃ ထောင်အထိ ရှိနေသည်
Leave a Comments