သျှမ်းပြည် မြောက်ပိုင်းတွင် ၁၀၂၇ စစ်ဆင်ေရးနှင့် ကရင်နီပြည်တွင် ၁၁.၁၁ စစ်ဆင်ရေး ဆင်နွှဲနေချိန် တိုက်ပွဲများ ဖြစ်ပွား ပြင်းထန်လျက်ရှိသော်လည်း သျှမ်းပြည် တောင်ပိုင်း တောင်ကြီးမြို့တွင် ခရီးသွား ဧည့်သည် များပြားပြီး တည်းခိုခန်းနှင့်ဟိုတယ်များတွင် အခန်းများ ပြည့်လျက်ရှိကြောင်း စုံစမ်းသိရသည်။
သျှမ်းတောင်ရှိ ဒေသများသို့ နှစ်စဥ်နှစ်တိုင်း ဆောင်းဦးရာသီအတွင်း ခရီးသွား ဧည့်သည် လာရောက် မှု ပိုမိုများပြီး အဓိကအားဖြင့် တောင်ကြီးမြို့တွင် ကျင်းပမည့် တန်ဆောင်တိုင်ပွဲနှင့် ကလော၊ အင်းလေး ဒေသများသို့ သွားလာ လည်ပတ်ကြောင်း ခရီးသွားလုပ်ငန်း လုပ်ကိုင်သူ တစ်ဦးထံမှ သိရှိရသည်။
“အခုက ခရီးသွားရာသီလည်း ဖြစ်တော့ ဟိုတယ်တွေမှာ ဧည့်သည်တွေက အပြည့်ပဲ။ နယ်ဝေးကနေ ကြိုပြီး ဘွတ်ကင် ယူထားကြတာလည်း ရှိသလို ရောက်နေကြတဲ့သူတွေလည်း အများကြီးပါပဲ။ တန်ဆောင်တိုင်ပွဲအတွက် လာကြတာပေါ့။ တန်ဆောင်တိုင်ပြီးတဲ့အထိ နေကြဖို့များတယ်။ ပွဲချိန်ပြီးရင်တော့ ကလော၊ အင်းလေးတို့ကို ဆက်သွားလည်ကြတယ်။” ဟု ၎င်းမှ ပြောသည်။
ခရီးသွားဧည့်သည်များမှာ နေရာအနှံ့ ပြည်နယ်အနှံ့မှ ဖြစ်ကြောင်း သိရှိရသည်။ ယခုကဲ့သို့ တိုက်ပွဲများဖြစ်ပွားပြီး လမ်းခရီး အခြေအနေ မကောင်းသော်လည်း ခရီးသွားလာမှု များသည့်အပေါ် ဒေသခံများမှ ဝေဖန်မှုလည်း ရှိနေသည်။
“တန်ဆောင်တိုင်ပွဲက သုံးနှစ်လောက် နားထားတာ၊ အခု စစ်ကောင်စီက ပွဲကို စည်စည်ကားကား ပြန်လုပ်ခိုင်းနေတာပေါ့။ မနှစ်က ပွဲလုပ်သေးပေမယ့် မစည်ဘူး။ လက်ရှိ အခြေအနေတွေကလည်း သိပ်မကောင်းတော့ ကျမတို့တော့ မသွားရဲဘူး။ နယ်ဝေးက သူတွေလည်း လာလည်ကြသလို ဒီအနီးအနား ဒေသက သူတွေဆို မြို့ပေါ်က အသိ၊ ဆွေမျိုးအိမ်တွေမှာ ပွဲလည်ဖို့ လူအုပ်လိုက်ကြီး လာနေတာတွေလည်း ရှိတယ်” ဟု ဒေသခံ တစ်ဦးမှ ထပ်လောင်းပြောပြသည်။
ယခုလက်ရှိတွင် စစ်ကောင်စီမှ ဦးဆောင်၍ တောင်ကြီး တန်ဆောင်တိုင်ပွဲကို နိုဝင်ဘာ (၂၁) ရက် မှ (၂၇)ရက်နေ့အထိ ကျင်းပမည်ဖြစ်ပြီး ထိုပွဲသို့ ပြည်သူများ ပါဝင်ခြင်းမပြုရန် တော်လှန်ရေးလုပ်နေသူများနှင့် ပြည်သူ့ကာကွယ်ရေးတပ်ဖွဲ့များမှ တောင်းဆိုထားသည်။
နော်လာဝါ မှ သတင်းပေးပို့သည်။
