သျှမ်း-ကရင်နီ နယ်စပ်တစ်လျှောက် ၁၁.၁၁ စစ်ဆင်ရေးကြောင့် ထွက်ပြေးလာသည့် စစ်ဘေးရှောင်များ ကို အောင်ပန်းဂိတ် ဖြတ်ကျော်ခွင့်မပေးကြောင်း စုံစမ်းသိရသည်။
နိုဝင်လာလ ၁၁ ရက်နေ့မှ စတင်ခဲ့သည့် ၁၁.၁၁ စစ်ဆင်ရေးကြောင့် သျှမ်း-ကရင်နီနယ်စပ် တစ်လျှောက် အပါအဝင် တိုက်ပွဲများဖြစ်နေပြီး မြို့ပေါ် လူနေရပ်ကွက်များကို စစ်ကောင်စီမှ လေယာဉ်ဖြင့် ဗုံးကျဲတိုက်ခိုက်ခဲ့သည်။
ထိုတိုက်ပွဲကြောင့် ပြည်သူလူထုများ အရေးပေါ်ထွက်ပြေး တိမ်းရှောင်လာရပြီး ထိုစစ်ရှောင်များကို စစ်ကောင်စီဂိတ် ဖြစ်သည့် အောင်ပန်းကားဂိတ်မှ ဖြတ်ကျော်ခွင့်မပြုကြောင်း ဒေသခံများက သျှမ်းသံတော်ဆင့်ကို ပြောသည်။
“ဟုတ်တယ်တဲ့ စစ်ဘေးရှောင်တွေကို တောင်ကြီးဖက်ကို ပေးမဝင်ဘူး။ အခု စစ်ရှောင်တွေ လမ်းမှာ ပိတ်မိနေတယ်”ဟု အောင်ပန်းမြို့ ဒေသခံတစ်ဦးကပြောသည်။
၁၁.၁၁ စစ်ဆင်ရေး တိုက်ပွဲများကြောင့် အောင်ပန်း၊ ဖယ်ခုံ၊လင်ဖုံလေးရွာတွင် ကားများ ရာနှင့်ချီ ပိတ်မိနေကြောင်း သိရသည်။
“ကျနော်က ခုဖယ်ခုံပိတ်မိတာ ၅ညအိပ်၆ရက်ရှိနေပြီး။ကားသမားတွေနဲ့ စုပြီးနေ နေရတာ။အကိုတို့ဘယ်မှကို သွားလို့မရဘူး။ထွက်သွားတဲ့ကားသမား တွေလည်း ခုထိ အဆက်အသွယ်ကို ပြန်မရသေးဘူး။”ဟု လမ်းတွင် ပိတ်မိနေသည့် လွိုင်ကော်-မန္တလေး ကားသမားတစ်ဦး က သျှမ်းသံတော်ဆင့်ကို ပြောသည်။
လွိုင်ကော်မြို့ နှင့် မြို့အစွန် ရပ်ကွက်တို့တွင်လည်း တိုက်ပွဲများကြောင့် မြို့ထဲတို့ စစ်ဘေးရှောင်လာ သူများရှိနေသည်။
“ကျနော်တို့ကတော့ သတိနဲ့နေ နေရတာပေါ့ မြို့အစွန်နားက ရပ်ကွက်တွေကနေ စပြီးပစ်နေကြတာ။ တခြားရပ် ကွက်နေကတော့ ကျနော်တို့စစ်ဘေးလာရှောင်နေတာရှိတယ်။ကျနော်တို့ကတော့ မြို့ပြင်ကို မထွက်ရဘူး၊ မြို့ပေါ်မှာရှိတဲ့ ဆိုင်တွေ အနည်းကျဉ်းတော့ ဆိုင်တွေဖွင့်ထားပါသေးတယ်” လွိုင်ကော်မြို့ ဒေသခံ အမျိုးသားတစ်ဦးက ပြောသည်။
ပြီခဲ့သည့် (နိုဝင်ဘာလ ၁၃ ရက်နေ့ ) လွိုင်ကော်မြို့နယ်၊ နာနတ်တောရပ်ကွက်ဖက်မှာ စစ်ကောင်စီ ပစ်ခတ်တဲ့လက်နက်ကြီးတစ်လုံးကြောင့် ပရဟိတအသင်းဝင်တစ်ဦး သေဆုံးခဲ့ကြောင်းသိရသည်။
သျှမ်-ကရင်နီနယ်စပ်တစ်လျှောက် ၁၁.၁၁ စစ်ဆင်ရေးသည် ပြီးခဲ့သည့် နိုဝင်ဘာလ ၁၁ ရက်မှ စတင်ခဲ့ပြီး စစ်ကောင်စီတပ်မှ လေကြောင်း၊ လက်နက်ကြီးဖြင့် ပစ်ခတ်မှုကြောင့် အရပ်သား နှင့် ကလေးအပါအဝင် ၃၈ ဦးနှင့် အထက် သေဆုံးမှုရှိပြီး၊ ထိခိုက်ဒဏ်ရာရသူဦးရေ ၃၀ ဝန်းကျင်ထိရှိကြောင်းသိရသည်။
