သျှမ်းပြည် လောက်ကိုင်မြို့အခြေစိုက် ဒကစ လက်အောက်ခံတပ်ရင်းဖြစ်သည့် ခလရ-၁၂၉ တပ်ရင်း တစ်ရင်းလုံးသည် ညီနောင်မဟာမိတ် ၃ ဖွဲ့ထံသို့ ထပ်မံလက်နက်ချ အလင်းဝင်ရောက်လာကြောင်း စုံစမ်းသိရသည်။
ယမန်နေ့ (နိုဝင်ဘာ ၁၂ ရက်)တွင် လောက်ကိုင်မြို့နယ် ညံခွမ်း(ရန်ခွမ့်)ရွာတွင် အခြေစိုက်သည့် ခလရ-၁၂၉ (မူရင်းထုတ်ပြန်ချက် ခမရ-၁၂၉) တပ်ရင်းမှ တပ်ရင်းမှူး ဗိုလ်မှူးကျော်ရဲအောင် ဦးဆောင်သည့် တပ်ရင်းတစ်ရင်းလုံးနှင့် တပ်မိသားစုဝင်များ အားလုံးက ပြည်သူ့ရင်ခွင်သို့ အလင်းဝင်ရောက်လာခဲ့ကြောင်း ညီနောင်မဟာမိတ် ၃ ဖွဲ့က ယနေ့ (နိုဝင်ဘာ ၁၄ ရက်)တွင် သတင်းထုတ်ပြန်လာသည်။
ခလရ-၁၂၉ တပ်ရင်းမှ တပ်ရင်းမှူး ဗိုလ်မှူးကျော်ရဲအောင် ဦးဆောင်သည့် တပ်ဖွဲ့ဝင် ၁၂၆ ဦးနှင့် မိသားစုဝင် ၁၃၄ ဦး၊ စုစုပေါင်း ၂၆၂ ဦးတို့က ပြည်သူ့ရင်ခွင်သို့ ခိုလှုံခဲ့ခြင်းကြောင့် ညီနောင်မဟာမိတ် ၃ ဖွဲ့မှ တပ်သား ၁ ဦးလျှင် ၁၀ သိန်းနှင့် မိသားစုဝင်တစ်ဦးလျှင် ၁ သိန်းကျပ်စီ ချီးမြှင့်ပေးအပ်ခဲ့ပြီး ၎င်းတို့သွားလိုသည့် နေရာအသီးသီးသို့လည်း လုံခြုံစွာ ပို့ဆောင်ပေးခဲ့ကြောင်း ထုတ်ပြန်ပြောဆိုထားသည်။
လက်ရှိအချိန်ထိ ညီနောင်မဟာမိတ် ၃ ဖွဲ့ထံ ဆက်သွယ်ပြီး ပြည်သူ့ရင်ခွင်သို့ ဝင်ရောက်လာကြသည့် အရေအတွက်မှာ ၂၀၀ ကျော်အထိ ရှိကြောင်း သိရသည်။
ထို့အပြင် ပြည်သူ့ရင်ခွင်သို့ ထပ်မံ ဝင်ရောက်လာမည့် စစ်ကောင်စီလက်အောက်ခံ တပ်မတော်သားနှင့် ရဲတပ်ဖွဲ့ဝင်များအား မည်သည့် ညှဉ်းပန်းနှိပ်စက်မှုမျိုးမှ မပြုလုပ်ဘဲ အသက်လုံခြုံရေးကို အာမခံကာ လူ့ဂုဏ်သိက္ခာ မထိခိုက်အောင် ကူညီဆောင်ရွက်ပေးမည်ဟု ညီနောင်မဟာမိတ် ၃ ဖွဲ့က ထုတ်ပြန်သည်။
အလားတူ လွန်ခဲ့သည့် အောက်တိုဘာလ ၃၀ ရက်နေ့ကလည်း ကွမ်းလုံမြို့ ကာမိုင်းဒေသရှိ ခလရ-၁၄၃ မှ ဒု-တပ်ရင်းမှူးနှင့် တပ်ခွဲမှူးအပါအဝင် တပ်ဖွဲ့အင်အား ၄၁ ဦးတို့ကလည်း ညီနောင်မဟာမိတ် ၃ ဖွဲ့ထံ လက်နက်ချအလင်းဝင်ခဲ့ကြောင်း ကိုးကန့်မီဒီယာမှ ထုတ်ပြန်ထားသည်။
လောက်ကိုင်မြို့အခြေစိုက် ဒေသကွပ်ကဲမှု စစ်ဌာနချုပ် (ဒကစ) လက်အောက်တွင် ခလရ-၁၂၅ (ကုန်းကြမ်း)၊ ခလရ-၁၂၈ (ပါစင်ကျော်)၊ ခလရ-၁၂၉ (ညံခွမ်း)၊ ခလရ-၂၃၉ နှင့် ခလရ-၃၂၂ ဟူ၍ တပ်ရင်း ၅ ခုရှိရာ စစ်ကောင်စီက လောက်ကိုင်မြို့နှင့် ကုန်းကြမ်းမြို့နယ်တို့ကို စစ်အုပ်ချုပ်ရေး(မာရှယ်လော) ကျင့်သုံးရန် နိုဝင်ဘာ ၁၂ ရက်နေ့က ကြေညာအပြီး ယခုကဲ့သို့ ခလရ-၁၂၉ တပ်ရင်း တစ်ရင်းလုံးသည် ညီနောင်မဟာမိတ်ထံ လက်နက်ချ အလင်းဝင်ရောက်လာခြင်း ဖြစ်သည်။
ညီနောင်မဟာမိတ် ၃ ဖွဲ့မှ “၁၀၂၇ စစ်ဆင်ရေး” စတင်ဆင်နွှဲပြီး ၁၈ ရက်တာ ကာလအတွင်း စစ်ကောင်စီ၏ တပ်စခန်း အကြီးအသေး စုစုပေါင်း ၁၆၀ ကျော်နှင့် ချင်းရွှေဟော်၊ ဖောင်းဆိုင်၊ ပန်ဆိုင်း(ကြူကုတ်)၊ သိန္နီ၊ နမ့်ခမ်း၊ ကွမ်းလုံမြို့တို့ကို ထိန်းချုပ်ထားနိုင်ကြောင်း ညီနောင်မဟာမိတ် ၃ ဖွဲ့မှ ထုတ်ပြန်ထားသည်။
လက်ရှိအချိန်တွင် စစ်ကောင်စီတပ်ဖွဲ့တွင် စစ်သည်အင်အား အလွန်ချို့တဲ့နေပြီး တပ်ရင်း ၁ ရင်းလျှင် လူ ၁၀၀ ခန့်သာ ကျန်ရှိပြီး ထွက်ပြေးသူ၊ သေဆုံးသူများလည်း နေ့စဉ်နှင့်အမျှ ဆက်တိုက်တိုးပွားနေသည်။
