သျှမ်းပြည်နယ် တောင်ပိုင်း ဆီဆိုင်မြို့သို့ စစ်ရှောင်လာသော စစ်ရှောင်အမျိုးသမီးများသည် လစဉ်သုံး ပစ္စည်းများ (၇)လနီးပါး ပြတ်လပ်နေေသဖြင့် အရေးပေါ်လိုအပ်နေကြောင်း စုံစမ်းသိရသည်။
လက်ရှိမှာ အမျိုးသမီး စစ်ရှောင်များအတွက် အသုံးအဆောင်ပစ္စည်းများကို လာရောက်လှူဒါန်းမှုရှိသော်လည်း အမျိုးသမီးဦးရေသည် ထောင်ဂဏန်းထိ ရှိတာကြောင့် အချိန်တို အတွင်း ကုန်ဆုံးသွားကြောင်း စစ်ရှောင်အမျိုးသမီး တစ်ဦးက သျှမ်းသံတော်ဆင့်ကိုပြောသည်။
“ အလုပ်လည်း မရှိဘူးလေ။ ဝယ်ဖို့လည်း အခက်ခဲဖြစ်တာပေါ့။ တစ်ခါတလေ မဝယ်နိုင်ရင် ရှိတဲ့ သူနားက ချေးငှားရတယ်။ အလုပ်ရလို့ ပိုက်ဆံရှိရင် ပြန်ဝယ်ပြီး ပြန်ပေးရတာပေါ့” ဟု စစ်ရှောင် အမျိုးသမီးတစ်ဦးက ပြောသည်။
အချို့ ပိုက်ဆံရှိသည့် မိသားစုထဲမှ အမျိုးသမီးသည် လစဥ်သုံးပစ္စည်းများကို ဝယ်ယူရန်အဆင်ပြေသော်လည်း အချို စစ်ရှောင်များသည် ငွေမရှိတာကြောင့် ဝယ်ယူရန် အဆင်မပြေကြောင်း သိရသည်။
“ တစ်ချို့ကပိတ်စတွေ၊ အဝတ်စားစတွေနဲ့ အသုံးပြုရတယ်။ တချို့ကတော့ မသုံးတော့ဘူး ဒီတိုင်းပဲ နေလိုက်တာပေါ့။ အဆင်တော့ မပြေဘူးလေ မတတ်နိုင်ဘူး။ လစဉ်သုံးက အရင်က ငါးရာလောက်ပဲ ရှိတာ အခုက တစ်ထောင်ကျော်၊ နှစ်ထောင်လောက် ရှိတော့ ဝယ်ဖို့ ခက်တယ်” ဟု ၎င်း စစ်ရှောင်အမျိုးသမီးက ထပ်မံပြောပါသည်။
အဆိုပါ စစ်ရှောင်များသည် ကရင်နီပြည်နှင့် သျှမ်းတောင် ဖယ်ခုံ၊မိုးဗြဲမြို့ မှ ဒေသခံများဖြစ်ကြပြီး၂၀၂၁ခုနှစ် အစောပိုင်းကတည်းက စစ်ပွဲများကြောင့် လာရောက်ခြင်းဖြစ်ကာ စစ်ရှောင်ကာလ၂နှစ် ကျော်ပြီဖြစ် ကြောင်းသိရသည်။
စစ်ရှောင်လာချိန်တွင်အိမ်ကို စွန့်ခွာပြီး အဝတ်တစ်ထည် ကိုယ်တစ်ခုဖြင့်သာ ထွက်လာခြင်းကြောင့် အရာရာ အလှူရှင်ကို အားကိုး အားထားနေကြရသည်။
နော်လာဝါမှ ပေးပို့သည်။
Leave a Comments