သျှမ်းပြည် ကျောက်မဲ- နောင်ချိုအကြားရှိ နောင်ပိန်ဂုတ်တွင်းအနီးတွင် လာရောက်ပစ်ခတ်နေသည့် တိုက်ခိုက်ရေး စစ်ကောင်စီ ရဟတ်ယာဉ်တစ်စင်း နောက်မြီး ကျည်ရှပ်ထိ၍ မီးခိုးထွက်ကာ ပြန်လှည့်သွားရကြောင်း စုံစမ်းသိရသည်။

ကျောက်မဲမြို့နယ်ဘက်ရှိ နောင်ပိန်ဂုတ်တွင်းအနီးတွင် ယနေ့ (နိုဝင်ဘာလ ၁၄ ရက်) ၁၁ နာရီဝန်းကျင်၌ စစ်ကောင်စီတပ်မှ တိုက်ခိုက်ရေး ရဟတ်ယာဉ် ၂ စီးဖြင့် လာရောက် ဗုံးကျဲတိုက်ခိုက်ခဲ့ရာ TNLA နှင့် မန္တလေး-PDF ပူးပေါင်းတပ်ဖွဲ့တို့မှ ပြန်လည်ပစ်ခတ်ခဲ့ခြင်းကြောင့် ရဟတ်ယာဉ်တစ်စီး၏ နောက်မြီးသို့ ကျည်ရှပ်ထိ၍ မီးခိုးထွက်ကာ ပြင်ဦးလွင်ဘက်သို့ ပျံသန်းသွားကြောင်း စုံစမ်းသိရသည်။

“ဟုတ်တယ်၊ မနက် ၁၀ နာရီကျော်ကတည်းက စစ်တပ်က ရဟတ်ယာဉ် ၂ စီးနဲ့ ပစ်နေတာ။ လေယာဉ်ပေါ်ကလဲ အောက်ကိုပစ်၊ အောက်က PDF ပူးပေါင်းအဖွဲ့တွေကလည်း ပြန်ပစ်။ ဒီနေ့တော့ အရမ်းကိုကြမ်းနေတာ။ အောက်က ပွိုင့်ဖိုက် စက်သေနတ်နဲ့ ပြန်ပစ်တာ ရဟတ်ယာဉ်တောင်ပံလား အမြီးလားမသိဘူး ရှပ်ထိတော့ မီးခိုးအူထွက်လာပြီး မေမြို့ဘက် ပြန်ပျံသွားတယ်”ဟု နောင်ချိုမြို့ဒေသခံတစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့နယ် ဂုတ်တွင်းဘက်ခြမ်း လုံကြိမ်ကျေးရွာအနီးတွင် စခန်းချတပ်စွဲထားသည့် TNLA နှင့် မန္တလေး-PDF ပူးပေါင်းတပ်ဖွဲ့တို့ကို နိုဝင်ဘာလ ဒုတိယပတ်မှစပြီး စစ်ကောင်စီတပ်က လေကြောင်းဖြင့် ခပ်စိပ်စိပ် ဗုံးကျဲတိုက်ခိုက်လာပြီး နောင်ချိုနှင့် ကျောက်မဲတပ်များမှလည်း နောင်ပိန်ဘက်သို့ လက်နက်ကြီးများဖြင့် ရမ်းသမ်းပစ်ခတ်နေကြောင်း နောင်ပိန်ဒေသခံများက ပြောသည်။

“ဒီတခေါက်လာတဲ့ ဟက်စကီးက ထိသွားတယ်ထင်တယ်။ အောက်ကနေ PDF ပူးပေါင်းအဖွဲ့တွေက ပွိုင့်ဖိုက် စက်သေနတ်ကြီးနဲ့ ပြန်ပစ်တာ။ ပြီးခဲ့တဲ့ လေးငါးရက်က လာပစ်တဲ့တစ်ခေါက်ကလဲ လေယာဉ်အမြီးပိုင်း ထိသွားတယ်၊ ပျက်တော့မကျဘူး။ ထိတဲ့အချိန်ဆို လေယာဉ်သံက ဟန်ချက်ပျက်သွားတယ်။ ရဟတ်ယာဉ်က စက်သံမမှန်ဘဲနဲ့ ရုန်းနေရတာမျိုး။ အခုလဲ နောင်ချိုနဲ့ ကျောက်မဲတပ်တွေကနေ လက်နက်ကြီးနဲ့ နောင်ပိန်ဘက်ကို ပစ်လာနေတယ်”ဟု ကျောက်မဲမြို့ နောင်ပိန်ဒေသခံတစ်ဦးက သျှမ်းသံတော်ဆင့်ကို ပြောသည်။

နောင်ချို-ကျောက်မဲကြားရှိ ဂုတ်တွင်းလမ်းပိုင်းတွင် ယခုဖြစ်ပွားနေသော တိုက်ပွဲများကြောင့် နောင်ပိန်တိုက်နယ်အတွင်း စစ်ဘေးရှောင်ဦးရေ ၁၅၀၀ ကျော်သည် အောင်ဓမ္မာရုံ၊ ပုဗ္ဗာရုံ၊ ကုန်းညောင်၊ ထန်းတပင်၊ ခေးနင်း၊ လွယ်ကုံ စသည့် နီးစပ်ရာ ကျေးရွာဘုန်းကြီးကျောင်းများတွင် ထွက်ပြေးတိမ်းရှောင်နေရကြောင်း သိရသည်။

ထို့အပြင် ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသော စစ်ကား ၄၀ စီးကျော်နှင့် သံချပ်ကာယာဉ် ၄ စီးတို့သည် ကျောက်မဲ၊ သီပေါ၊ လားရှိုးမြို့များသို့ ချီတက်နိုင်ရန်အတွက် စစ်ကောင်စီတပ်မှ ဂုတ်တွင်းလမ်းပိုင်းကို အစွမ်းကုန် ထိုးဖောက်လျက်ရှိရာ TNLA နှင့် မန္တလေး-PDF ပူးပေါင်းတပ်ဖွဲ့တို့နှင့် တိုက်ပွဲပြင်းထန်နေသည်။