သျှမ်းပြည် တောင်ကြီးခရိုင် ဆီဆိုင်မြို့နယ်တွင် “ ၁၁.၁၁ စစ်ဆင်ရေး “ တိုက်ပွဲကြောင့် ထွက်ပြေးတိမ်းရှောင်နေရသည့် စစ်ရှောင်များ ထပ်မံ ရောက်ရှိနေကြောင်း စစ်ရှောင်ကောင်မတီထံမှ စုံစမ်းသိရသည်။

ယခုရက်ပိုင်းကာလအတွင်း သျှမ်း-ကရင်နီ နယ်စပ် တလျောက်နှင့် ကရင်နီ (ကယား) ပြည်အတွင်း “ ၁၁.၁၁ စစ်ဆင်ရေး “ ခေါင်းစဉ်ဖြင့် စစ်ကောင်စီတပ်နှင့် ကရင်နီပူးပေါင်းတော်လှန်ရေးတပ်ဖွဲ့တို့ အကြား တိုက်ပွဲပြင်းထန်စွာ ဖြစ်ပွားမှုကြောင့် နေရပ်စွန့်ပြီး ထွက်ပြေးတိမ်ရှောင်ရသည့် စစ်ရှောင်များ ရှိနေသည်။

လက်ရှိ စစ်ရှောင်များသည် ဆီဆိုင်မြို့နယ် ကျေးရွာအတွင်းသို့ ရောက်နှင့်လာကြပြီး ဖြစ်သော်လည်း အချို့မှာ ထွက်ပြေးတိမ်းရှောင်လာစဉ် လမ်းတစ်ဝက်မှာ ရှိနေသေး ကြောင်း ဆီဆိုင်မြို့ စစ်ရှောင်ကော်မတီတစ်ဦး က ပြောသည်။

“ ဆီဆိုင်မှာ စစ်ရှောင်အသစ်တွေ ထပ်ရောက်လာတယ်။ ဘယ်လောက်ရှိလည်းတော့ မသိရသေးဘူး။ တချို့လည်း လာနေတုန်း လမ်းပိတ်နေတယ်။ တောလမ်းကနေတစ်ဆင့် လာတာမရောက်သေးဘူး၊ တချို့လည်း ရောက်နှင့်နေပြီ။ အခုရွာမှာရောက်နေကြတာ လောလောဆယ်တော့ လိုက်မကြည့်နိုင်သေးဘူး။ လူကတော့ တော်တော်များတယ် “ ဟု ၎င်းကော်မတီတစ်ဦးက ပြောသည်။

ယင်းကဲ့သို့ စစ်ရှောင်များ နေ့စဉ်နီးပါး ဝင်ရောက်တိမ်းရှောင်လာကြသဖြင့် လူဦးရေကို အတိမကျမရသေးကြောင်း ၎င်းက ဆိုသည်။

အလားတူ သျှမ်း-ကရင်နီ (ကယား) ပြည်နယ်စပ်ဒေသ ဖယ်ခုံမြို့တွင်လည်း “ ၁၁.၁၁ စစ်ဆင်ရေး “ ဖော်ဆောင်လာသည့်နောက်ပိုင်း ပစ်ခတ်သံများ မကြာခဏ ကြားနေရသည်ဟု ဖယ်ခုံမြို့စစ်ရှောင် အမျိုးသမီးတစ်ဦးက ပြောသည်။

“ နေ့တိုင်းပစ်နေကြတာပဲ။ ကျမတို့က တောမှာနေတဲ့အခါကျတော့ သေနတ်သံပဲ ကြားနေရတယ်။ စစ်ရှောင် အသစ်တွေလည်း ထပ်ရောက်လာတယ်။ မြိုးဗြဲဘက်ကလူတွေလည်း ဒီဘက်ဖယ်ခုံကိုပဲ ရှောင်လာကြတယ် “ ဟု ၎င်းအမျိုးသမီးတစ်ဦးက ပြောသည်။

ပြီးခဲ့သည့် (နိုဝင်ဘာလ ၁၁ ရက်) မှစ၍ သျှမ်း-ကရင်နီ တလျောက်နှင့် ကရင်နီ (ကယား) ပြည်တွင် “ ၁၁.၁၁ စစ်ဆင်ရေး “ ဟုဆိုကာ တော်လှန်ရေးတပ်ဖွဲ့များ ဖြစ်ကြသည့် KA၊ KNDF၊ KNPLF၊ DMO Local PDF မြို့ပြတော်လှန်ရေးတပ်ဦး (URF) အလယ်ပိုင်းတိုင်း ရှမ်းတောင်စစ်ဒေသခွဲနှင့် ကယား (ကရင်နီ) စစ်ဒေသခွဲ PDF တပ်ရင်းများ စုပေါင်း၍ စစ်ကောင်စီတပ်စခန်းများကို ဝင်ရောက်တိုက်ခိုက်ခဲ့သည်။

စစ်ဆင်ရေး ပထမရက်တွင် ဒီးမော့ဆို၊ မိုးဗြဲနှင့် လွိုင်ကော် မြို့နယ်များအတွင်းရှိ စစ်ကောင်စီတပ်များ ကာလကြာမြင့်စွာ အထိုင်ချတပ်စွဲထားသော စစ်စခန်း (၇) ခုကို သိမ်းယူနိုင်ခဲ့ပြီး လက်နက်ကြီး၊ လက်နက်ငယ် ပေါင်းစုံ (၁၀၀) နီးပါးနှင့် ခဲယမ်းကျည်ဆံများကို သိမ်းဆည်းနိုင်ခဲ့ကာ တိုက်လေယာဉ် ၁ စီးကိုလည်း ပစ်ချနိုင်ခဲ့ကြောင်း ဒီးမော့ဆို ပြည်သူ့ကာကွယ်ရေးတပ်မှ နိုဝင်ဘာလ ၁၂ ရက်တွင် ထုတ်ပြန်ထားသည်။