သျှမ်းပြည် သိန္နီမြို့မှ လားရှိုးမြို့သို့ တောလမ်းမှတစ်ဆင့် ထွက်ပြေးတိမ်းရှောင်သူများထံ လက်နက်ကိုင်တပ်ဖွဲ့မှ ဆက်ကြေးကောက်ခံနေကြောင်း သတင်းသိရှိရသည်။

“ ၁၀၂၇ စစ်ဆင်ရေး “ တိုက်ပွဲကြောင့် သိန္နီမြို့အတွင်း ပိတ်မိနေကြသူများနှင့် စစ်ရှောင်များသည် ယခုရက်ပိုင်းအတွင်း ကျေးလက်ဒေသ ကျေးရွာတစ်ရွာမှတစ်ဆင့် နမ့်တူချောင်းကိုဖြတ်ကာ တောလမ်းအတိုင်း ခက်ခက်ခဲခဲဖြင့် လားရှိုးမြို့ဘက်သို့ ထွက်ပြေးတိမ်း ရှောင်နေကြကြောင်း ဒေသခံတစ်ဦးက ပြောသည်။

ယင်းကဲ့သို့ ထွက်ပြေးတိမ်းရှောင်နေစဉ် ကျေးရွာတစ်ရွာ အဝင်ရှိ လက်နက်ကိုင်တပ်ဖွဲ့ဝင် ( ဒေသတွင်း ပြည်သူ့စစ်အဖွဲ့ဝင်ဟောင်း) တစ်ဦးမှ ဦးဆောင်၍ စစ်ဘေးရှောင်ကားတစ်စီးကို ကျပ်ငွေ ၃ သိန်းခွဲ ကောက်ခံနေကြောင်း ၎င်းကဆက်ပြောသည်။

“ တိုက်ပွဲကြာလာတာနဲ့အမျှ သိန္နီမှာ မြို့ထဲပဲ ခိုလှုံနေတဲ့သူရှိသေးသလို မြို့ကနေစွန့်ခွာတဲ့သူလည်း နေ့တိုင်းရှိတယ်။ သိန္နီအရှေ့ဘက် ရွာထဲကို ဝင်ရတယ်။ အဲ့ကိုဝင်ရင် ကားတစ်စီးကို ကျပ်ငွေ ၃ သိန်းခွဲ ပေးရတယ်။ လာကောက်တဲ့သူက အရင်ကဒေသတွင်း ပြည်သူ့စစ်အဖွဲ့ဝင် တစ်ယောက်ပဲ။ မပေးရင် နမ့်တူချောင်း ပေးမဖြတ်ဘူး “ ဟု ၎င်းဒေသခံတစ်ဦးက ပြောသည်။

အဆိုပါ စစ်ရှောင်များသည် မြို့တွင်းတိုက်ပွဲကြောင့် လုံခြုံရေးစိုးရိမ်ကာ နဂိုမူလရှိ သိန္နီမြို့ စစ်ရှောင်စခန်းမှနေ၍ အခြားနေရာသို့ ထွက်ပြေးတိမ်းရှောင်ရန် ကြိုးစားသူများ ဖြစ်သည်။

အလားတူ ဒေသခံမြို့ဒေသခံ အသက် ၃၀ ကျော်အမျိုးသားတစ်ဦးက “ အခုသိန္နီမြို့က ပြည်သူတွေနဲ့ စစ်ရှောင်တွေ လမ်းကြောင်းပိတ်ထားတာကြောင့် အကူညီမရောက်ဘူး။ ဘယ်ကူညီမှု အဖွဲ့က မလာရဲ့၊ မသွားရဲတဲ့ အခြေအနေဖြစ်နေတယ်။ မြို့ထဲက ပိတ်မိနေတဲ့သူ အချင်းချင်း ပြန်ကူရတာ။ မြို့နဲ့ ၁၂ မိုင်ပတ်လည် စစ်ဇုန်တွေမို့ ဘယ်မှမထွက်ရဲကြဘူး “ ဟု ပြောသည်။

သျှမ်းမြောက်ဒေသ တိုက်ပွဲသည် အချိန်ကြာလာသည်နှင့်အမျှ စစ်နယ်မြေ ပိုမိုကျယ်ပြန့်လာကာ မြို့တိုင်းလိုပင် စခန်းသိမ်းတိုက်ပွဲဖြစ်ပွားခြင်း၊ လမ်းကြောင်းပိတ်ဆို့ခြင်း၊ ဖြတ်တောက်ခြင်းကြောင့် ဖြတ်သန်းသွားလာ၍ မရကာ သိန္နီမြို့တွင်းပိတ်မိနေသူ ပြည်သူများနှင့် စစ်ရှောင်းများသည် အရေးပေါ်အခြေအနေ ကြုံတွေ့လာပါက ထွက်မပြေးနိုင်သည့်စိန်ခေါ်မှုတစ်ရပ်နှင့် ကြုံတွေ့နေကြောင်း ဒေသခံများပြောချက်အရ သိရသည်။