သျှမ်းပြည်မြောက်ပိုင်း ကွမ်းလုံမြို့ မြို့သိမ်းတိုက်ပွဲတွင် ဓနု PDF ရဲဘော် ၂ ဦး ကျဆုံးပြီး၊ ၃ ဦးထိဒဏ်ရာ ရရှိခဲ့ကြောင်း ၁၀၀၃ တပ်ရင်း ဓနုအခြေစိုက် ပြည်သူ့ကာကွယ်ရေးတပ်မတော်ထံမှ သိရသည်။

သျှမ်းပြည် ကွမ်းလုံမြို့ နိုဝင်ဘာလ ၁၀ ရက် စခန်းကုန်းတိုက်ပွဲကို အမှတ် ၁၀၀၃ ဓနုPDF တပ်ရင်း တို့သည် MNDAA အဖွဲ့နှင့်အတူ တိုက်ပွဲဝင်ခဲ့ပြီး ရဲဘော် မုန်တိုင်း(ခ) စိုးမိုးထွန်း နှင့် ရဲဘော် အောင်ပြူး (ခ) သိန်းထိုက်စိုးတို့ တိုက်ပွဲအတွင်း ကျဆုံးခဲ့ပြီး ရဲဘော် ၃ ဦး ဒဏ်ရာရရှိခဲ့ကြောင်း ၁၀၀၃ တပ်ရင်း ဓနုအခြေစိုက် ပြည်သူ့ ကာကွယ်ရေး တပ်မတော်က နိုဝင်ဘာလ ၁၁ ရက်တွင် ထုတ်ပြန်ခဲ့သည်။

ဓနု ရဲဘော်တို့သည် ကျဆုံးသွားသည့် ရဲဘော်တို့ကို အလေးနီပြု ဦးညွတ်ပြီး၊ ဓနုအခြေစိုက်ပြည်သူ့ ကာကွယ်ရေးတပ်မတော်မှ အာဇာနည်သူရဲကောင်းအဖြစ် မှတ်တမ်းကာ စစ်ကောင်စီနှင့် အပေါင်းအပါတွေကို အမြစ်ပြတ်သည်အထိ တိုက်ထုတ်သွားမယ်ဖြစ်ကြောင်းဆိုခဲ့သည်။

ဓနု PDF ရဲဘော်များတို့သည် ညီနောင်မဟာမိတ် ၃ ဖွဲ့မှ ဦးဆောင်နေသည့် ၁၀၂၇ စစ်ဆင်ရေးတွင် MNDAA ကွပ်ကဲမှုအောက်မှ မြေပြင်တိုက်ခိုက်ရေးအဖွဲ့ နှင့် ဝေဟင်တိုက်ခိုက်ရေး(ဒရုန်း)အဖွဲ့ အဖြစ်ပါဝင်ပြီး၊ မြေပြင် ဝေဟင် လက်တွေ့စစ်ပညာကိုများကို သင်ယူလေ့လာကာ တိုက်ပွဲဝင်နေကြောင်း ထုတ်ပြန်ချက်တွင် ဖော်ပြထား ပါသည်။

၁၀၀၃ တပ်ရင်း အခြေစိုက်ရာဒေသဖြစ်သည့် သျှမ်းပြည် ရွာငံဒေသရှိ လူငယ်များသည် အာဏာရှင်စနစ်ကို တော်လှန်တိုက်ခိုက်ရန် လွတ်မြောက်နယ်မြေအသီးသီးကို ရောက်ရှိခဲ့ကြောင်း၊ တပ်ရင်းရှိ ရဲဘော်များသည် စစ်ရေးလှုပ်ရှားမှုများတွင် တိုက်ပွဲတွေဝင်ပြီး အတွေ့အကြုံများယူပြီး ဒေသအတွင်းတွင်လည်း ပျောက်ကြားစနစ်ဖြင့် စစ်ရေးလှုပ်ရှားမှုများ ပြုလုပ်နေကြောင်းသိရသည်။