သျှမ်းပြည် နမ့်ခမ်းမြို့အခြေစိုက် စစ်ကောင်စီတပ်၏ စခန်းသစ်မှနေ၍ နမ့်ခမ်းမြို့တွင်းသို့ လက်နက်ကြီးများဖြင့် ရမ်းသမ်းပစ်ခတ်နေကြောင်း စုံစမ်းသိရသည်။
ယနေ့ (နိုဝင်ဘာ ၁၂ ရက်) ည ၆ နာရီခန့်မှ စ၍ နမ့်ခမ်းမြို့ စခန်းသစ်ဗျူဟာကုန်းမှ စစ်ကောင်စီတပ်သည် နမ့်ခမ်းမြို့တွင်းသို့ လက်နက်ကြီးများဖြင့် ရမ်းသမ်းပစ်ခတ်ခဲ့ခြင်းကြောင့် နမ့်ခမ်းမြို့မ ရဲစခန်းအနောက်ဘက်ရှိ ပတ္တမြားခန်းမကို ထိမှန်ပြီး မီးလောင်ပျက်စီးသွားကြောင်း နမ့်ခမ်းဒေသခံများက ပြောသည်။
“စခန်းသစ်ဘက်က လက်နက်ကြီးနဲ့ ရမ်းပစ်လို့ ရဲစခန်းအနောက်က ပတ္တမြားခန်းမကို လာမှန်တာ၊ အဲ့မှာ မီးလောင်နေတယ်။ အခု မီးသတ်ကား ၂ စီး မီးငြိမ်းဖို့ သွားပြီ။ ဒီနှစ်ရက် သုံးရက်အတွင်း စစ်ကောင်စီပစ်တဲ့ လက်နက်ကြီးက အိမ်တွေပေါ်လာကျရင် ချက်ချင်း မီးတောက်လောင်တာ။ သူတို့ပစ်လာတာ ဘယ်လိုလက်နက် အမျိုးအစားလဲ မသိဘူး”ဟု နမ့်ခမ်းဒေသခံတစ်ဦးက သျှမ်းသံတော်ဆင့်ကို ပြောသည်။
ယနေ့ (နိုဝင်ဘာ ၁၂ ရက်) ည ၆ နာရီဝန်းကျင်မှ စပြီး ယခုသတင်းရေးသားနေသည့် ည ၉ နာရီ အချိန်အထိ စခန်းသစ် ဗျူဟာကုန်းမှနေ၍ နမ့်ခမ်းမြို့တွင်းသို့ ရမ်းသမ်းပစ်ခတ်နေသည့် လက်နက်ကြီးမှာ ၁၀ လုံးထက်မနည်း ရှိနေသည်ဟု သိရသည်။
“ခုနလေးတင် စေ့ဟိုင်းနဲ့ မန်ခမ်းဘက်ကို လက်နက်ကြီး နောက်ထပ် ၂ လုံး ထပ်ကျတယ်။ အဲ့ဒါတော့ ထိခိုက်ပျက်စီးမှု မသိရသေးဘူး၊ ရွာသားတွေတော့ ထွက်ပြေးကုန်ကြပြီ ပြောတယ်”ဟု ၎င်းနမ့်ခမ်းဒေသခံက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် နိုဝင်ဘာလ ၁၀ ရက်နေ့ ည ၁၀ နာရီခွဲ အချိန်ကလည်း နမ့်ခမ်းမြို့ မြောက်ဘက်ရှိ စခန်းသစ် ဗျူဟာကုန်းမှနေ၍ နမ့်ခမ်းမြို့တွင်းသို့ လက်နက်ကြီး ရမ်းသမ်းပစ်ခတ်ခဲ့ရာ သာယာကုန်းရပ်ကွက်အတွင်း ကျရောက်ပေါက်ကွဲခဲ့ပြီး ပြည်သူနေအိမ် ၃ လုံး မီးလောင်ပျက်စီးခဲ့ရသည်။
ယခု နိုဝင်ဘာလ ဒုတိယပတ်မှစ၍ နမ့်ခမ်းမြို့ရှိ စစ်ကောင်စီတပ်၏ စခန်းသစ်ဗျူဟာကုန်းသို့ TNLA တပ်ဖွဲ့မှ ညအချိန် ၁၀ နာရီနောက်ပိုင်း ညတိုင်းနီးပါးခန့် ဒရုန်းဖြင့် ဗုံးကျဲတိုက်ခိုက်မှုများကြောင့် စစ်ကောင်စီတပ်မှ မြို့တွင်းသို့ ရမ်းသမ်းပစ်ခတ်ခြင်း ဖြစ်နိုင်ကြောင်း နမ့်ခမ်းဒေသခံများက ပြောသည်။
TNLA တပ်ဖွဲ့က နမ့်ခမ်းမြို့အား နိုဝင်ဘာ ၃ ရက်နေ့မှ စတင်တိုက်ခိုက်လာပြီး အလုံးစုံထိန်းချုပ်နိုင်ရန် အစွမ်းကုန် ကြိုးစားလျက်ရှိကာ နှစ်ဘက်တိုက်ပွဲများကြောင့် စစ်ဘေးရှောင်ဦးရေ ၆၀၀၀ ကျော်မှာ တရုတ်နယ်စပ်နှင့် မူဆယ်မြို့နယ်တို့တွင် ထွက်ပြေးတိမ်းရှောင်နေရသည်ဟု သိရသည်။
Leave a Comments