သျှမ်းပြည် ကျောက်မဲနှင့် သီပေါမြို့ကြားရှိ ကျင်သီတံတားကို TNLA တပ်ဖွဲ့က ယနေ့ (နိုဝင်ဘာ ၁၂)ရက် နံနက် ၄နာရီခွဲတွင် ဗုံးခွဲဖျက်ဆီးခဲ့ကြောင်း စုံစမ်းသိရသည်။
ကျောက်မဲမြို့နှင့် သီပေါ ဘော်ကြို ကြားရှိ ကျင်သီတံတားကို ယနေ့ (နိုဝင်ဘာ ၁၂ ရက်) နံနက် ၄ နာရီခွဲ အချိန်တွင် TNLA တပ်ဖွဲ့က ဗုံးခွဲဖျက်စီးထားပြီး တံတားအခန်း ၁ ခန်း ပဲ့ကျမှုကြောင့် သွားလာ၍ မရတော့ကြောင်း သီပေါ်မြို့ ဒေသခံများက ပြောသည်။
“၄ နာရီအချိန်လောက်က ကျင်သီတံတားရဲကင်းမှာ စောင့်တဲ့ စစ်သားတွေ လမ်းလျှောက်ပြီး ကျောက်မဲဘက် ထွက်သွားတယ်ပြောတယ်။ ခဏလေးနေတော့ TNLA တပ်သားတွေ သေနတ်သံ အချက်ပေးပြီး ဝင်လာတယ်။ အဲ့နောက်ပိုင်း တံတားမှာ ဗုံးထောင်တယ်ထင်တယ်။ အခုထိတော့ ဗုံးအများစုက ကျောက်မဲဘက် စစ်တပ်ကနေ ပစ်လာတာ။ ဘော်ကြိုနားက ဖိုင်ကန်၊ မူးလေးဘက်ကနေလဲ TNLA တပ်တွေက ပြန်ပစ်လာတာ ရှိတယ်။ သေနတ်သံတော့ မကြားရသေးဘူး”ဟု သီပေါမြို့ ဘော်ကြိုဒေသခံတစ်ဦးက သျှမ်းသံတော်ဆင့်ကို ပြောသည်။
TNLA တပ်ဖွဲ့က ဗုံးခွဲဖျက်စီးခဲ့သည့် သီပေါ ဘော်ကြိုရှိ ကျင်သီတံတားမှာ အလုံးစုံပျက်စီးသွားခြင်း မဟုတ်ဘဲ တံတားအခန်း ၁ ခန်း ပဲ့ကျမှုကြောင့် သွားလာ၍ မရတော့ကြောင်း၊ လက်ရှိအချိန်ထိ ကျင်သီတံတားနှင့် စံဖိတ်တံတားတို့တွင် TNLA တပ်သားများ နေရာယူထားကြောင်း ဘော်ကြိုဒေသခံများက ပြောသည်။
“အခုထိ သူတို့TNLA တပ်သားတွေ ကျင်သီတံတားပေါ်မှာ ရှိနေတုန်းပဲ။ စစ်တပ်ထောက်ပို့ကို လမ်းကြောင်းဖြတ်ဖို့ သီပေါကို ဝင်မယ့် ကျင်သီတံတားကိုလဲ သိန္နီမြို့ဝင်တံတားလို သွားလို့မရအောင် ဖျက်မှာထင်တယ်။ အခုလဲ တံတားမှာ မိုင်းထောင်ဖို့ ဘက်ထရီမရှိလို့ ဟိုခိုရွာကနေ သွားတောင်းလာတယ်လို့ ပြောသံကြားတယ်”ဟု ၎င်းဘော်ကြိုဒေသခံက သျှမ်းသံတော်ဆင့်ကို ဆက်ပြောသည်။
ကျောက်မဲမြို့အခြေစိုက် စစ်ကောင်စီတပ် ခမရ-၅၀၁/၅၀၂ တို့မှလည်း သီပေါနှင့် ကျောက်မဲအကြားရှိ ဘော်ကြို၊ ကျင်သီ၊ နောင်အန်း၊ ချောင်းချောက်၊ လွယ်ခေါ်နှင့် နားခေါ်ရွာများဘက်သို့ လက်နက်ကြီးများဖြင့် ပစ်ခတ်နေကြောင်း သီပေါဒေသခံများက ပြောသည်။
ယမန်နေ့ (နိုဝင်ဘာ ၁၀/၁၁ ရက်)တွင် ကျောက်မဲမြို့အခြေစိုက် ခမရ-၅၀၁/၅၀၂ သို့ စစ်ကောင်စီတပ်မှ စစ်ရဟတ်ယာဉ်ဖြင့် စစ်အင်အား၊ လူအင်အားဖြည့်တင်းခြင်းများ ပြုလုပ်လျက်ရှိကြောင်း ကျောက်မဲဒေသခံများထံမှ သိရသည်။
ထို့အပြင် နောင်ချိုမြို့နယ် အုမ္မသီးလမ်းခွဲနှင့် ရွှေညောင်ပင်ကျေးရွာတို့တွင် တပ်စွဲထားသည့် စစ်ကား ၄၀ စီးခန့်နှင့် သံချပ်ကာ ၄ စီးခန့်မှာ ကျောက်မဲ၊ သီပေါ၊ လားရှိုးသို့ အင်အားဖြည့်တင်းရန် စတင်ချီတက်လျက်ရှိရာ နောင်ချိုဂုတ်တွင်းလမ်းပိုင်းတွင် စစ်ကောင်စီတပ်မှ လေကြောင်းပစ်ကူနှင့်အတူ တိုက်ပွဲပြင်းထန်နေပြီး ကျောက်မဲမြို့တွင်လဲ သေနတ်ပစ်ခတ်သံများ စတင်ကြားနေရကြောင်း ကျောက်မဲဒေသခံများက ပြောသည်။
Leave a Comments