သျှမ်းမြောက် နမ့်ခမ်းမြို့ကို ညီနောင်မဟာမိတ် (၃) ဖွဲ့ နှင့် ပူးပေါင်းတပ်ဖွဲ့တို့ သိမ်းပိုက်နိုင်ပြီး TNLA အုပ်ချုပ်မှုအောက်မှာ ပုံမှန်လည်ပတ်နိုင်ပြီးဟု ကြေညာပြီးနောက် ယနေ့ (နိုဝင်ဘာ ၁၀) ရက် ညတွင် လက်နက်ကြီး ပစ်ခတ်သံများ ကြားနေရပြီး နေအိမ်(၁၀) လုံးခန့် မီးလောင် ပျက်စီးနေကြောင်း စုံစမ်းသိရှိရသည်။
ယနေ့ နိုဝင်ဘာ (၁၀) ရက် ည ၁၀ နာရီကျော်အချိန်မှာ နမ့်ခမ်းမြို့ သာယာကုန်းရပ်ကွက်ရှိ နေအိမ်တစ်လုံး လက်နက်ကြီးကျည် ထိမှန်ရာမှ မီးလောင်သွားကြောင်း စုံစမ်းသိရှိရသည်။
“မီးညွှန့်တွေက မကျိုးသေးဘူး။ မီးသတ်တွေလဲ အခုကာလမှာ ဘယ်ရပ်ကွက်မှ လှုပ်ရှားရဲမှာ မဟုတ်ဘူး။ ဘယ်အဖွဲ့က ပစ်လိုက်တဲ့ လက်နက်ကြီးမှန်းတော့ မသိရဘူး” ဟု နမ့်ခမ်းဒေသခံ တစ်ဦး ကပြောသည်။
လက်ရှိ သတင်းရေးသားချိန်ထိ လက်နက်ကြီးကြောင့် နေအိမ် (၁၀) အိမ်နီးပါးခန့် မီးကူးလောင်နေကြောင်း ဒေသခံတစ်ဦးထံမှ သိရှိရသည်။
“ခု အိမ်တွေ (၁၀) အိမ်လောက်ရှိနေပြီ မီးကူးလောင်တာ။ ဘယ်သူမှ မသွားရဲဘူး အဲ့ဘက် ဖုန်းလိုက်ဆက်လည်း ဘယ်သူမှ မရှိဘူး။” ဟု နမ့်ခမ်းဒေသခံ တစ်ဦး ကပြောသည်။
TNLA မှ နမ့်ခမ်းမြို့ကို နိုဝင်ဘာ (၁၀) ရက်နေ့မှ သေချာစွာ ထိန်းချုပ်နိုင်ပြီး ပြည်သူများလည်း ပုံမှန် အရောင်းအဝယ် လုပ်ကာ မြို့ထဲ စည်ကားနေပြီဟု ပြောဆိုသော်လည်း နမ့်ခမ်းမြို့သည် မြို့ပျက်သဖွယ် ဖြစ်ပွားကာ ထိတ်လန့်ဖွယ်ရာ ဖြစ်နေကြောင်း ဒေသခံ တစ်ဦး က သျှမ်းသံတော်ဆင့် ကိုပြောသည်။
“ကျနော်တို့ ဒီနေ့ နမ့်ခမ်းမြို့ပုံကို သတင်းတွေမှာ မြင်နေရတာက ဒီနေ့ ကပုံမဟုတ်ဘူး။ မြို့ထဲ မပစ်ခင်တဲ့နေ့က ပုံတွေနဲ့ မြို့ထဲစဝင်လာတဲ့နေ့က ပုံတွေဖြစ်ပါတယ်။ မြို့ထဲလမ်းမ မှာ အမှိုက်ပြည့်နှက်နေတယ်၊ ပြီးတော့ စျေးနဲ့ မြို့လယ်ဘုရားကြား လမ်းမတလျောက် လက်နက်ကြီးထိတဲ့အိမ်တွေလဲ ပျက်ဆီးနေတာမြင်နေရတော့ မြို့ပျက်ကြီးလိုပဲ လို့”ဟု အမည်မဖော်လိုသူ နမ့်ခမ်းဒေသခံ တစ်ဦး ကပြောသည်။
နမ့်ခမ်းမြို့ကို နိုဝင်ဘာ (၃) ရက်မှ စပြီး ညီနောင်မဟာမိတ် (၃) ဖွဲ့ နှင့် စစ်ကောင်စီ တို့ တိုက်ပွဲပြင်းထန်စွာ ဖြစ်ပွားခဲ့ပြီး လက်ရှိချိန်ထိ စစ်ကောင်စီ တပ်စခန်း (၁) ခန်း ကျန်ရှိနေသေးကြောင်း သိရှိရသည်။
အလားတူ သျှမ်းပြည်မြောက်ပိုင်း မိုင်းရယ်မြို့နယ်တွင်လည်း လက်နက်ကြီးပစ်ခတ်သံများ (၁၀) ချက်ထက်မနည်း ကြားနေရပြီး လေယာဥ်များလည်း ပျံဝဲနေကြောင်း စုံစမ်းသိရှိရသည်။
ညီနောင်မဟာမိတ် (၃) ဖွဲ့ နှင့် စစ်ကောင်စီတို့ သျှမ်းမြောက်မှာ တိုက်ပွဲပြင်းထန်စွာ ဖြစ်ပွားပြီး စစ်ရှောင်များ မိုင်းရယ်မြို့နယ်သို့ ထွက်ပြေးတိမ်းရှောင် (၅၀၀) ကျော် ရောက်ရှိထားသည်။
