သျှမ်းပြည် ကွတ်ခိုင်မြို့နယ်တွင် တိုက်ပွဲကြောင့် စစ်ဘေးရှောင် ၁ထောင်ကျော် စားဝတ်နေရေး ခက်ခဲနေကြောင်း စုံစိမ်းသိရသည်။

သျှမ်းပြည် ကွတ်ခိုင်မြို့နယ် မုန်းစီကျေးရွာတွင် (အောက်တိုလာလ ၂၈ ရက်မှ နိုဝင်ဘာလ ၁၀ ရက်)ထိ တိုက်ပွဲများကြောင့် ထွက်ပြေး လာရောက် တိမ်းရှောင်နေသူ စစ်ဘေးရှောင် ၁ထာင်ကျော် ရှိနေပြီ နမ့်မော၊နမ့်ဝမ်း၊နမ့်ဆာ စသည့် ကျေးရွာ ၁၀ ရွာတွင် လာရောက် စစ်ဘေးရှောင်နေကြကြောင်း စစ်ဘေးရှောင်ကူညီသူ အမျိုးသမီးတစ်ဦးက သျှမ်းသံတော်ဆင့် ကိုပြောသည်။

“စစ်ဘေးရှောင်တွေ တော်တော်များများကတော့ သျှမ်းရွာက နေလာကြတာ။ တချို့တွေက တော့ ရွာနဲ့ နီးတဲ့ ဘုန်းကြီးကျောင်းမှာ စုနေကြတာ။” ဟု စစ်ဘေးရှောင်ကူညီသူ အမျိုးသမီးတစ်ဦးက ပြောသည်။

ယင်းကဲ့သို့ တိုက်ပွဲ ကာလအတွင်း ထွက်ပြေးတိမ်းရှောင်နေရသည့် စုစုပေါင်း စစ်ရှောင်ဦးရေ ၁၇၃၀ ဝန်းကျင်အထိ ရှိလာပြီး၊ စားဝတ်နေရေး ခက်ခဲနေကြောင်း စစ်ဘေးရှောင် ကူညီနေသည့် အမျိုးသမီး တစ်ဦး ကဆိုသည်။

“စားဝတ်နေရေးအခက်အခဲကတော့ လှူလာတဲ့ ဟာတွေကို ခွဲပြီး ဆန်နဲ့ ဟင်နဲ့ ဝယ်ထားတာပေါ့။ တနေ့ကို နှစ်နပ်ပဲကျွေးတာ မနက်နဲ့ညပါပဲ နေ့လည်တော့ မကျွေးပါဘူး။ လာကူညီနေတဲ့ ဟာတွေကလဲ စစ်တပ်နဲ့ဝေးတဲ့ရွာကနေ လာကူနေရတာ။ ကျေးရွာအချင်းချင်း ရှိတာ ကူညီကြတဲ့သဘောပါ။ဆန်၊ဆီ၊ ဆီတိုဖူး အခြောက်အခြမ်းတွေပေါ့ ” ဟု ၎င်းကပြောသည်။

အောက်တိုဘာ ၂၇ ရက်မှစ၍ “ ၁၀၂၇ စစ်ဆင်ရေး” ခေါင်းစဉ်ဖြင့် စတင်ခဲ့သည့် သျှမ်းမြောက် ဒေသတလျောက် တိုက်ပွဲကြောင့် စုစုပေါင်း စစ်ရှောင်ဦးရေ ၅ သောင်းခန့်အထိ ရှိလာပြီဖြစ်ကြောင်း သျှမ်သံတော်ဆင့်မှ ကောက်ထားသည့် စာရင်းအရ သိရသည်။