သျှမ်းပြည် ကျောက်မဲမြို့နယ် မန်ကောင်းမူးရွာနေ အမျိုးသားတစ်ဦးသည် ခြံသွားနေစဥ် မြေမြုပ်မိုင်း နင်းမိပြီး ပွဲချင်းပြီး သေဆုံးသွားကြောင်း စုံစမ်းသိရသည်။
သျှမ်းပြည် ကျောက်မဲမြို့နယ် မန်ကောင်းမူးရွာ ယမန်နေ့ (နိုဝင်ဘာလ ၉ ရက်) နံနက် ၁၀ နာရီခွဲဝန်းကျင်တွင် အမျိုးသားတစ်ဦး ခြံသွားနေစဥ် မြေမြုပ်မိုင်းနင်းမိကာ ထိုနေရာတွင် ပွဲချင်းပြီး သေဆုံးသွားကြောင်း အိုမ်တမာဝ်း လူမှုကူညီရေး အသင်းတွင် တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။
“ အဲ့အမျိုးသားက ငှက်ပျောရွက်သွားခုတ်မလို့ သွားနေချိန်မှာ မိုင်းနင်းမိတာ။ မိုင်းနင်းမိပြီး ခဏပဲ အသက်ရှူပြီး သေသွားတယ်” ဟု ၎င်းက ပြောသည်။
မိုင်းနင်းမိပြီး သေဆုံးသွားသူသည် အသက် ၆၅နှစ်အရွယ် ရှိ ဦးအိုက်လွန် ဖြစ်ပြီး ကျောက်မဲမြို့နယ် မန်ကောင်းမူးကျေးရွာတွင်နေထိုင်သူဖြစ်သည်။
ကျောက်မဲမြို့နယ်အတွင်း လက်နက်ကိုင်ပေါင်းစုံ လှုပ်ရှားသည့်နေရာဖြစ်ပြီး၊ စစ်ရေး မကြာခဏ ဖြစ်ပွားသည့် ဒေသတစ်ခုလည်းဖြစ်ကာ မြေမြုပ်မိုင်းများ မကြာခဏ နင်းမိပြီး အသက်သေဆုံးမှုရှိကြောင်း သိရသည်။
ကျောက်မဲမြို့နယ် ဂုတ်တွင်းလမ်းပိုင်းတွင် နေရာယူထားသော စစ်ကောင်စီတပ်စခန်းအား TNLA တပ်ဖွဲ့နှင့် မန္တလေး-PDF ပူးပေါင်းတပ်ဖွဲ့တို့သည် ပြီးခဲ့သည့် (နိုဝင်ဘာလ ၆ ရက်)တွင် စတင်တိုက် ခိုက်ခဲ့ကြောင်း နောင်ချိုဒေသခံများက ပြောသည်။
Leave a Comments