သျှမ်းပြည် မူဆယ်-နမ့်ခမ်းလမ်းကြား တစ်နေရာတွင် တိုက်ပွဲဖြစ်ပွားနေစဉ် ကာလအတွင်း အမျိုးသားတစ်ဦး ပျောက်ဆုံးနေပြီး လက်ရှိအချိန်ထိ အသတင်းအချက်အရမရှိသေးကြောင်း သတင်းသိရှိရသည်။
ဖြစ်စဉ်မှာ (အောက်တိုဘာလ ၂၈ ရက်)တွင် အသက် ၂၃ နှစ်အရွယ်ရှိ မောင်မရန်ယောင်ထန် ဆိုသည့် အမျိုးသားတစ်ဦးသည် မူဆယ်-နမ့်ခမ်းလမ်းပိုင်း ဖြတ်သန်းသွားလာစဉ်အတွင်း ပျောက်ဆုံးသွားခဲ့သည်ဟု ၎င်း၏ မိသားစုဝင်တစ်ဦးက သျှမ်းသံတော်ဆင့်ကို ပြောသည်။
၎င်းပျောက်ဆုံးနေစဉ်တွင် စစ်ကောင်စီတပ်နှင့် ညီနောင်မဟာမိတ်အဖွဲ့ဝင် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) အကြား တိုက်ပွဲဖြစ်ပွားပြီး၊ စစ်ရေးတင်းမာမှုနှင့် စစ်ဆေးမှု တင်းကြပ်နေသည့် အချိန်ကာလ ဖြစ်သည်။
“ သူ့က လွယ်ဂျယ်ကနေ ဆင်းလာတာ။ သူ့အမေကားဘီးပေါက်လို့ ဆိုပြီး သူက သွားကြိုနေချိန် လမ်းမှာ TNLA စစ်သားက သူ့ကိုခေါ်သွားလိုက်တာ။ သူ့ကို ၅ နာရီခွဲလောက်ကနေ ခေါ်သွားပြီး ၉ နာရီလောက်စစ်ဆေးပြီးတာ။ အဲ့နဲ့သူ့ကို ဖုန်းပြန်ကိုင်ခွင့်ပေးပြီး နက်ဖြန်မှပြန်ခိုင်းမယ်ပြောပြီးတော့ နောက်နေ့ ၂၉ ရက် မနက် ၁၀ နာရီ၊ ၁၁ နာရီဝန်းကျင် လောက်မှာ အဆက်သွယ်မရတော့ဘူး “ ဟု ပျောက်ဆုံးနေသူ၏ မိသားစုဝင်တစ်ဦးက ပြောသည်။
လက်ရှိအချိန်ထိ သတင်းအချက်အလက်မရရှိဘဲ ပျောက်ဆုံးနေသဖြင့် မိသားစုဝင်များက အလွန်စိုးရိမ်နေသည်။
ယင်းကိစ္စနှင့် ပတ်သက်၍ တအာင်း (ပလောင်) အမျိုးသားလွတ်မြောက်ရေး တပ်မတော် TNLA ရဲ့ ပြန်ကြားရေး တာဝန်ခံ ဒုဗိုလ်မှူးကြီး တားအိုက်ကျော်ထံ ဖုန်းဖြင့်ကြိုးစားဆက်သွယ်ခဲ့သော်လည်း မရခဲ့ပေ။
နမ့်ခမ်းမြို့တွင်း နိုဝင်ဘာ ၃ ရက်မှ စတင်ပြီးတိုက်ပွဲပြင်းထန်လာခဲ့သဖြင့် နမ့်ခမ်-မူဆယ် လမ်းကြောကို ယနေ့ (နိုဝင်ဘာ ၉)ရက်မှစပြီး TNLA ဘက်မှ ယာယီပိတ်ထားကြောင်း မူဆယ်ဒေသခံများပြောပြချက်အရ သိရသည်။
