သျှမ်းပြည် တောင်ကြီးမြို့နယ်တွင် တန်ဆောင်ပွဲ နီးကပ်လာသဖြင့် ပွဲတော် ကျင်းပရာ အဝေရာမီးပုံပျံကွင်းနားရှိ ဆိုင်ခန်း ငှားရမ်းခ ဈေးနှုန်းများမှာ နှစ်ဆနီးပါး တိုးမြင့်လာကြောင်း စျေးရောင်းချသူများထံ စုံစမ်းသိရသည်။

“မီးပုံးပျံကွင်းနဲ့ နည်းနည်းလှမ်းတဲ့ ဒီလို (၆)ပေပတ်လည် ဆိုင်ခန်း‌ေတွဆို ခါတိုင်း (၄)သိန်း‌ကျော်ပဲ ရှိတာ။ အခုနှစ်ကတော့ ၇ညကို ငှားခ (၈)သိန်းလို့ ပြောတယ်၊ တစ်ညကို တစ်သိန်းကျော်ကျသွားတာပေါ့။ မီးပုံပျံကွင်းနားက ဆိုင်ခန်းတွေဆို အရင်က သိန်း(၇၀)လောက်ရှိတာ။ အခုနှစ်ကတော့ ရာဂဏန်းထိ ရှိတယ်” ဟု အဆိုပါ စျေးရောင်းချသူမှ ပြောပြသည်။

ထိုကဲ့သို့ ငှားရမ်းခ‌ ဈေးနှုန်းများ မြင့်တက်လာမှုကြောင့် ဈေးရောင်းချသူများ အနေဖြင့် ဆိုင်ခန်းများ ငှားရန် အခက်တွေ့နေကြောင်း သိရှိရသည်။

“ဆိုင်ခန်းငှားခတွေ အရမ်းဈေးမြင့်‌နေတော့ ဆိုင်ကြီးတွေကတော့ အဆင်ပြေနိုင်ပေမယ့် ကျမတို့လို ကိုယ်ထူကိုယ်ထ ဈေးရောင်းတဲ့သူ‌တွေအတွက်က အဆင်မပြေဘူးပေါ့။ ဈေးကြီးကြီးနဲ့ ငှားပြီးမှ လူစည် မစည်လည်း မသိ‌သေးတော့ အရင်းနဲ့ အမြတ်ရော တွက်ချေကိုက်ပါ့မလားလည်း စိတ်ပူတယ်” ဟု ၎င်းမှ ဆက်ပြောသည်။

တန်ဆောင်တိုင်ကွင်း အနီးအနားတစ်လျှောက်တွင်ပွဲတော်ရက်အတွင်း ရောင်းချရန် ဆိုင်ခန်းများကို အကွက်ချ သတ်မှတ်ထားပြီး ၎င်းဆိုင်ခန်းများကို မငှားရမ်းပါက ယခုလက်ရှိ ဈေးရောင်းချနေ‌သော နေရာများမှ ဖယ်ပေးရမည် ဖြစ်‌ကြောင်းလည်း သိရှိရသည်။

သျှမ်းပြည်‌ တောင်ကြီးမြို့တွင် စစ်ကောင်စီမှ ဦးဆောင်၍ တန်ဆောင်တိုင်ပွဲတော်ကို အဝေရာမီးပုံးပျံကွင်းတွင် နိုဝင်ဘာလ (၂၁)ရက်နေ့မှ (၂၇)ရက်နေ့ထိ (၇)ရက်ကြာအောင် ကျင်းပသွားမည်ဖြစ်ပြီး လက်ရှိအချိန်တွင် မီးပုံးပျံပွဲကျင်းပရန် ပြင်ဆင်မှုများ လုပ်ဆောင်နေကြောင်း သိရှိရသည်။