မြန်မာ-တရုတ်နယ်စပ်ဒေသ မူဆယ်မြို့နယ် စယ်လန့်ကျေးရွာတွင် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) နှင့် တအာင်း (ပလောင်) အမျိုးသားလွတ်မြောက်ရေး တပ်မတော် TNLA တို့အကြား နားလည်မှုကွဲလွှဲခြင်းကြောင့် တိုက်ပွဲဖြစ်ပွားရကြောင်း သတင်းရရှိသည်။

ယမန်နေ့ ( နိုဝင်ဘာလ ၈ ရက် ) နံနက်ပိုင်းအချိန်တွင် ဖြစ်ပွားခဲ့သည့် စယ်လန့်ကျေးရွာအတွင်း တိုက်ပွဲတွင် SSPP ဘက်မှ တပ်သား ၁ ဦးကျဆုံးပြီး မြို့နယ်မှူးအပါအဝင် ၂ ဦးသတ်ဖြတ်ခံရကာ၊ TNLA ဘက်မှ တပ်သား ၄ ဦးကျဆုံးပြီး ၂ ဦးထိခိုက်ဒဏ်ရာရှိကြောင်း နှစ်ဖက်တပ်ဖွဲ့၏ ထုတ်ပြန်ချက်တွင် ရေးသားဖော်ပြထားကြသည်။

ယင်းကဲ့သို့ တိုက်ပွဲဖြစ်ပွားရခြင်းသည် စယ်လန့်ကျေးရွာအုပ်စုနေ စိုင်းမောဝ်အွန်ကို TNLA တပ်ဖွဲ့မှ ဖမ်းဆီးသွားခဲ့ကြောင်း သတင်းသိရှိရသဖြင့် SSPP/SSA မူဆယ်မြို့နယ်မှူး ဦးဆောင်သည့် လုံခြုံရေးတပ်သား ၇ ဦးက အကျိုးအကြောင်း သိရှိရန်သွားရောက်မေးမြန်းရာ TNLA ဘက်မှစတင်ပစ်ခတ်မှုကြောင့် အနီးကပ် တိုက်ပွဲဖြစ်ပွားခဲ့ရသည်ဟု SSPP မှ ထုတ်ပြန်ထားသည်။

တအာင်း ( ပလောင်) အမျိုးသားလွတ်မြောက်ရေးတပ်မတော် PSLF/ TNLA ဘက်မှ မိမိတို့စစ်ဆင်ရေး ဖော်ဆောင်နေစဉ်အတွင်း စိုင်းမောဝ်အွန်က ဓါတ်ပုံမှတ်တမ်းကူးယူခြင်း ပြုလုပ်နေသောကြောင့် အကြောင်းရင်းအား သိရှိရန်အတွက် ခဏတာခေါ်ယူမေးမြန်း စုံစမ်းခဲ့ကြောင်း၊ ထိုသို့ မေးမြန်းနေစဉ် SSPP မှ အရာရှိဖြစ်သူ စိုင်းလင်းနှင့်အဖွဲ့တို့ ရောက်ရှိလာပြီး စတင်ပစ်ခတ်တိုက်ခိုက်ခဲ့သည်ဟု ၎င်းတို့နှစ်ဖက်တပ်ဖွဲ့က အပြန်အလှန် စွပ်စွဲပြောဆိုထားသည်။

အလားတူပင် ယနေ့ ( နိုဝင်ဘာလ ၈ ရက်) တွင် ဖမ်းဆီးထားသည့် စိုင်းမောဝ်အွန်ကို ရပ်မိရပ်ဖထံ အပ်နှံပေးပြီး ဖြစ်ကြောင်း PSLF /TNLA ရဲ့ သတင်းနှင့် ပြန်ကြားရေးဌာနက ယနေ့တွင် ထုတ်ပြန်ထားသည်။

စိုင်းမောဝ်အွန်သည် သျှမ်းတိုင်းရင်းသားများ ဒီမိုကရေစီအဖွဲ့ချုပ် (SNDL) ၏ စယ်လန့်ကျေးရွာအုပ်စု အလုပ်အမှု ဆောင်ကော်မတီ အတွင်းရေးမှူးအဖြစ် တာဝန်ထမ်းဆောင်နေသူ ဖြစ်ကြောင်း၊ လက်နက်ကိုင် ပဋိပက္ခအတွင်း ပါဝင်နေသည့် မည်သို့သော အဖွဲ့အစည်းနှင့်မျှ ပတ်သက်ခြင်းမရှိဘဲ ဒေသတွင်း လူမှုကူညီရေးလုပ်ငန်းများကို လုပ်ဆောင်သူသာ ဖြစ်ပြီး ချွင်းချက်မရှိ အမြန်ဆုံး ပြန်လွှတ်ပေးကာ အိမ်တိုင်ရာရောက် ပို့ဆောင်ပေးရန် SLND က ထုတ်ပြန်ထားသည်။