သျှမ်းပြည် ကျောက်မဲနှင့် နောင်ချိုမြို့အကြားရှိ ဂုတ်တွင်းလမ်းပိုင်းတွင် စစ်ကောင်စီတပ်နှင့် TNLA ၊ မန္တလေး-PDF ပူးပေါင်းတပ်ဖွဲ့တို့ တိုက်ပွဲပြင်းထန်လျက်ရှိကြောင်း စုံစမ်းသိရသည်။
နောင်ချိုမြို့နယ် ဂုတ်တွင်းလမ်းပိုင်း တံတားအနီးတွင် စခန်းချထားသည့် စစ်ကောင်စီ တပ်စခန်းကို TNLA ၊ မန္တလေး-PDF ပူးပေါင်းတပ်ဖွဲ့တို့က ယနေ့ (နိုဝင်ဘာ ၈ ရက်) နံနက် ၇ နာရီဝန်းကျင်မှ စတင်တိုက်ခိုက်ခဲ့ပြီး နေ့လည် ၁ နာရီခန့်တွင် တိုက်ပွဲပိုမိုပြင်းထန်ခဲ့ကြောင်း နောင်ချိုဒေသခံများက ပြောသည်။
“ဂုတ်တွင်းထဲမှာတော့ မနေ့ည ၆ နာရီလောက်ကတည်းက အကြီး/အသေး အသံစုံကြားနေရတာ။ မနေ့ညက တစ်ညလုံးပဲ ပွဲကြမ်းနေတာ။ ညသန်းခေါင်ကြီး လေယာဉ်နဲ့ ၂ ခါ လာဝဲပြီး ပစ်သွားသေးတယ်။ ဒီမနက်ရောက်တော့လဲ ၇ နာရီလောက်ကတည်းက အသံပြန်ကြားနေရတယ်။ သတင်းကြားတာတော့ ဂုတ်ထိပ်ရှုခင်းသာမှာ နေရာယူထားတဲ့ TNLA နဲ့ မန္တလေး-PDF အဖွဲ့တွေက ဂုတ်တွင်းတံတားနားက စစ်ကောင်စီစခန်းကို သွားတိုက်တာ”ဟု ဂုတ်တွင်းအနီး နောင်ပိန်ဒေသခံတစ်ဦးက သျှမ်းသံတော်ဆင့်ကို ပြောသည်။
နောင်ချိုမြို့နယ် ဂုတ်တွင်းတံတားအနီးရှိ စစ်ကောင်စီ တပ်စခန်းကို TNLA နှင့် မန္တလေး-PDF ပူးပေါင်းတပ်ဖွဲ့တို့သည် ယမန်နေ့ (နိုဝင်ဘာ ၆ ရက်)မှ စတင်တိုက်ခိုက်ခဲ့ပြီး ထိုနေ့တွင် စစ်ကောင်စီဘက်မှ ဂျက်ဖိုက်တာ လေကြောင်းပစ်ကူဖြင့် ပြန်လည်တိုက်ခိုက်ခဲ့ခြင်းကြောင့် ကျောက်မဲဘက်ခြမ်းရှိ လုံကြိမ်ကျေးရွာ စာသင်ကျောင်း ဗုံးထိမှန်ပျက်စီးခဲ့သည်ဟု သိရသည်။
ယခုဖြစ်ပွားနေသော စစ်ကောင်စီတပ်နှင့် TNLA ၊ မန္တလေး-PDF ပူးပေါင်းတပ်ဖွဲ့တို့၏ ဂုတ်တွင်းတိုက်ပွဲများကြောင့် ကျောက်မဲမြို့နယ် နောင်ပိန်တိုက်နယ်အတွင်းရှိ နောင်ပစ်၊ လုံကြိမ်၊ ပင်ပေါ၊ ခဲလုံ၊ ပန်မလွတ်နှင့် ဇီးပင်စခန်းကျေးရွာတို့မှ ဒေသခံပြည်သူ ၅၀၀ ကျော်သည် နောင်ပိန် အောင်ဓမ္မာရုံနှင့် ရှမ်းစာပေယဉ်ကျေးမှုခန်းမတို့တွင် ထွက်ပြေးတိမ်းရှောင်နေရသည်ဟု နောင်ပိန်ဒေသခံများက ပြောသည်။
အလားတူ ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသည့် စစ်ကား ၄၀ စီးခန့်နှင့် သံချပ်ကာ ၂ စီးပါ စစ်ကောင်စီယာဉ်တန်းကိုလည်း TNLA နှင့် မန္တလေး-PDF ပူးပေါင်းတပ်ဖွဲ့တို့က နောင်ချိုမြို့နယ် အုမ္မသီးနှင့် ရွှေညောင်ပင်ရွာတွင် ဖြတ်တောက်တိုက်ခိုက်လျက်ရှိရာ စစ်ကောင်စီတပ်၏ သံချပ်ကာ ၁ စီး ဖျက်စီးထားနိုင်သည်ကို တွေ့ရကြောင်း နောင်ချိုဒေသခံများက ပြောသည်။
နောင်ချိုမြို့နယ် အုမ္မသီးလမ်းခွဲနှင့် ရွှေညောင်ပင်ရွာတို့တွင် တပ်စွဲထားသည့် စစ်ကောင်စီတပ်သည် ဆမ္မဆယ်အုပ်စု ကျေးရွာများမှ စစ်ဘေးရှောင်မည့် ဒေသခံပြည်သူများကို ချောင်းမြောင်းပစ်ခတ်ပြီး ကျေးရွာအတွင်းမှ လူငယ်များကို လူသားဒိုင်းကာအဖြစ် အတင်းအဓမ္မ ဖမ်းဆီးခေါ်ဆောင်သွားမှုများလည်း ရှိနေသည်ဟု နောင်ချိုဒေသခံများက ပြောသည်။
လက်ရှိတွင် နောင်ချိုမြို့နယ်အတွင်း “၁၀၂၇ စစ်ဆင်ရေး”ကြောင့် စစ်ဘေးရှောင်ဦးရေ ၂၅၀၀ ကျော် ရှိလာပြီး သဖန်းကိုင်း၊ သုံးဆယ်၊ ငို့ကလေး၊ အင်းဝိုင်း၊ ဘန့်ဘွေးနှင့် ပြင်ဦးလွင်မြို့များရှိ ဘုန်းကြီးကျောင်းများတွင် ထွက်ပြေးတိမ်းရှောင်နေရသည်ဟု သိရသည်။
