သျှမ်းပြည် မြောက်ပိုင်းတွင် ညီနောင်မဟာမိတ်အဖွဲ့များနှင့် စစ်ကောင်စီတို့ တိုက်ပွဲများဖြစ်ပွားနေသော်လည်း သျှမ်းပြည်တောင်ပိုင်း တောင်ကြီးမြို့တွင် အစဉ်အလာမပျက် ရိုးရာမီးပုံးပျံပွဲတော်ကို ၇ ရက်ဆက်တိုက် ကျင်းပမည်ဖြစ်ကြောင်း ရိုးရာမီးပုံးပျံပညာရှင်များထံမှ စုံစမ်းသိရသည်.
သျှမ်းပြည်တောင်ပိုင်း တောင်ကြီးမြို့၏ အဝေရာ မီးပုံးပျံကွင်းတွင် နိုဝင်ဘာ ၂၁ ရက် မှ ၂၇ ရက်နေ့အထိ တန်ဆောင်တိုင်ပွဲတော်အား ၇ ရက်ဆက်တိုက် ကျင်းပမည်ဖြစ်ပြီး ယခုနှစ်တွင် ညလွှတ်မီးပုံးပျံမျိုးစုံ ၆၃ လုံးအထိ လွှတ်တင်သွားမည်ဖြစ်ကြောင်း သိရသည်။
” ဒီနှစ်က ဆုကြေးငွေများလို့ ပြိုင်ပွဲဝင်အသင်းတွေ များမယ်လို့ ယူဆတယ်။ အခုထိ စာရင်းလက်ခံနေရတုန်းပါ။မနှစ်က လုပ်တာ မပြည့်စုံခဲ့ဘူး၊ ဒီနှစ်တော့ ညပိုင်းအစီအစဉ်တွေ ပိုများအောင် ထည့်ထားပါတယ် မနှစ်ကထက် ပိုစည်လိမ့်မယ် ” ဟု ရိုးရာမီးပုံးပျံပညာရှင်အသင်းဝင်တစ်ဦးမှ သျှမ်းသံတော်ဆင့် သို့ ပြောသည်။
ပွဲတော်တွင် ညလွှတ်မီးပုံးပျံ ၆၃ လုံး အပြင် ညလွှတ်ညမီးကြီးမီးပုံးပျံ ၂၅ ပေ ၁၅ လုံး ၊ ၂၂ ပေ ၂၃ လုံး နှင့် စိန်နားပန်မီးပုံးပျံ ၁၈ ပေ ၂၅ လုံးများ ပါဝင်မည်ဖြစ်ပြီး နေ့လွှတ်မီးပုံးပျံတွင် ခြေလေးချောင်းအရုပ် နှင့် ခြေနှစ်ချောင်းအရုပ်များလည်း ပါဝင်ကြောင်း သိရသည်။
” သျှမ်းမြောက်အခြေအနေတွေက မကောင်းတော့ တချို့က မလုပ်စေချင်ကြဘူး။ ဒါပေမဲ့ ပွဲဖြစ်အောင်လုပ်ကြဖို့ တွန်းအားတွေကလည်း ရှိတာပေါ့လေနော့်၊ အာ့ကြောင့် ဆုကြေးလည်း မြှင့်ထားတယ်ကြားတယ်။ အသေးစိတ်တော့ မသိရဘူး ခင်ဗျ” လို့ တောင်ကြီးမြို့ခံတစ်ဦးမှ သျှမ်းသံတော်ဆင့် သို့ပြောကြားသည်။
မြန်မာနိုင်ငံအဝှမ်းသို့ ကိုဗစ်ရောဂါပိုးများ ပြန့်ပွားလာခဲ့သည့် ၂၀၂၀ ခုနှစ်နှင့် စစ်ကောင်စီ အာဏာသိမ်းယူခဲ့သည့် ၂၀၂၁ ခုနှစ်တို့တွင် ရိုးရာ တန်ဆောင်တိုင် မီးပုံးပျံပွဲတော်ကို လုံးဝရပ်နားထားခဲ့ရပြီး ၂၀၂၂ ခုနှစ်တွင် ပွဲတော်အား ပြန်လည်ကျင်းပချိန်၌ နေ့လွှတ်မီးပုံးပျံ တမျိုးတည်းသာ ယှဉ်ပြိုင်စေခဲ့သဖြင့် စည်ကားမှုမရှိခဲ့ကြောင်း သိရသည်။
Leave a Comments