သျှမ်းပြည် သိန္နီမြို့နယ် နမ့်စလပ်ကျေးရွာအုပ်စုတွင် စခန်းချနေထိုင်သည့် စစ်ကောင်စီတပ်က မိသားစုဝင် (၃)ဦးကို သေနတ်ပစ်ခဲ့ရာ အမျိုးသား တစ်ဦး ပွဲချင်းပြီးသေဆုံးပြီး၊ အမျိုးသမီးနှင့် ကလေးငယ် ကျည်ထိမှန် ဒဏ်ရာရရှိခဲ့ကြောင်း စုံစမ်းသိရသည်။
ပြီးခဲ့သည့် နိုဝင်ဘာလ ၄ ရက်နေ့က သိန္နီမြို့နယ် နမ့်စလပ်ကျေးရွာတွင် စစ်ဘေးရှောင်နေသည့် မိသားစု ၃ ဦးသည် အဝတ်အစားယူရန် ကွန်ကောက်ကျေးရွာအုပ်စု ဝမ်ကောင်းကျေးရွာသို့အပြန် နမ့်စလပ်ဆေးရုံအနီးတွင် စစ်ကောင်စီတပ်၏ ပစ်သတ်ခြင်းကို ခံခဲ့ရသည်ဟု သိန္နီမြို့ နမ့်စလပ်ဒေသခံများက ပြောသည်။
“မန်ကောင်းရွာမှာ ပစ်သတ်ခံရတာ။ သူတို့လင်မယားက စစ်ရှောင်လာတဲ့အချိန် အဝတ်အစားမရလာလို့ အိမ်ပြန်ယူမယ်လို့ပြောတာ၊ သူတို့မိသားစု ၃ ယောက် ဆိုင်ကယ်နဲ့ပြန်ကြတာ။ နမ့်စလပ်ဆေးရုံနားလေးက ကုန်းဆင်းသွားတဲ့လမ်းမှာ သေနတ်နဲ့ ပစ်တာ။ သူ့ယောကျာ်းကိုထိပြီး မသေခင် အသက်ငင်နေတုန်းမှာ ပိုက်ဆံ ၄ သိန်းနဲ့ ဖုန်းကို သူ့မိန်းမဆီပေးတော့ စစ်ကောင်စီ စစ်သားတွေက လုယူလိုက်တာ၊ မိန်းမနဲ့ ကလေးလည်း ကြောက်လန့်ပြီး ငိုကြတာပေါ့”ဟု သိန္နီမြို့နယ် နမ့်စလပ်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (နိုဝင်ဘာလ ၅ ရက်) နံနက်ပိုင်း အချိန်ကလည်း သိန္နီမြို့အထွက်ရှိ ပန့်ဆီဆိုင်တွင် ပြည်သူများ ဓာတ်ဆီဝယ်ယူရန် တန်းစီစောင့်ဆိုင်းနေစဉ် ဟိုတာ့ကျေးရွာထဲရှိ စစ်ကောင်စီတပ်မှ ပစ်ခတ်လာသည့် လက်နက်ကြီး ထိမှန်မှုကြောင့် အမျိုးသား ၁ ဦးထိခိုက်ဒဏ်ရာ ရခဲ့သည်ဟု သိန္နီမြို့ဒေသခံများက ပြောသည်။
“သိန္နီမှာ ပန့်ဆီဆိုင်တွေက ၁ ရက်ကို ၁ နာရီပဲ ရောင်းပေးတာ။ အရင်တစ်ရက် (နိုဝင်ဘာ ၅ ရက်) က ပြည်သူတွေ ဓာတ်ဆီသွားဝယ်ဖို့ တန်းစီစောင့်နေတဲ့ အချိန်မှာ ဟိုတာရွာထဲမှာ တပ်စွဲထားတဲ့ စစ်ကောင်စီတပ်က လက်နက်ကြီးနဲ့ ပစ်လာတာ။ လက်နက်ကြီးက လူအုပ်နားလေး ကျပြီးပေါက်ကွဲတော့ အမျိုးသား ၁ ယောက်ထိပြီး ကျန်တဲ့လူတွေ ဗုံးဆံမှန်တာလည်းရှိတယ် ”ဟု သိန္နီဒေသခံတစ်ဦးက သျှမ်းသံတော်ဆင့်ကို ပြောသည်။
ထို့အပြင် သိန္နီမြို့နယ်တွင် “၁၀၂၇ စစ်ဆင်ရေး” ၁၂ ရက်အတွင်း လက်နက်ကြီးထိမှန်မှုကြောင့် အပြစ်မဲ့ပြည်သူ ၁၀ ဦးထက်မနည်း သေဆုံးပြီး ၂၀ ဦးကျော် ထိခိုက်ဒဏ်ရာ ရရှိခဲ့သည်ဟု သိန္နီမြို့ ဒေသခံများထံမှ သိရသည်။
“တိုက်ပွဲဖြစ်လာတဲ့ ၁၀ ရက်ကျော် အတောအတွင်းမှာ နမ့်စလပ်မှာရှိတဲ့ စစ်ကောင်စီတပ်ထဲကနေ ကျေးရွာတွေဘက်ကို လက်နက်ကြီးနဲ့ပစ်လို့ နမ့်စလပ်တိုက်နယ်ထဲက အပြစ်မဲ့ပြည်သူ ၉ ဦးမက သေတယ်။ ဒါက ကျနော် သိသလောက် ပြောတာနော်။ ထပ်ပြီးတော့ မန်ကောင်း၊ ပန်စုံ အဲ့ဘက်တကြောက ဘယ်နှယောက်သေလဲဆိုတာ သတင်းတိတိကျကျ မသိရသေးဘူး၊ ဖုန်းလိုင်းမရတော့ အဆက်အသွယ်ပြတ်နေတာ”ဟု ၎င်းသိန္နီဒေသခံတစ်ဦးက သျှမ်းသံတော်ဆင့်ကို ဆက်ပြောသည်။
သိန္နီမြို့နယ်တွင် “၁၀၂၇ စစ်ဆင်ရေး”စတင်သည့် အောက်တိုဘာလ ၂၇ ရက်မှ စ၍ စစ်ကောင်စီဘက်က ဖုန်းလိုင်းနှင့် အင်တာနက်ကွန်ယက်များ ဖြတ်တောက်ထားပြီး လမ်းပန်းဆက်သွယ်ရေး ပြတ်တောက်နေခြင်းကြောင့် စစ်ဘေးရှောင်ဦးရေ ၁ သောင်းခန့်အတွက် စားနပ်ရိက္ခာ အရေးပေါ်လိုအပ်နေသည်ဟု သိရသည်။
