ဆောင်ဦးဝင်စရာသီ ရောက်ရှိလာသည့်ဖြစ်သည့်အတွက် သျှမ်းပြည် ပင်းလောင်းမြို့နယ်သို့ ထွက်ပြေးတိမ်းရှောင်နေရသော စစ်ဘေးရှောင်များအတွက် အနွေးထည်များ၊ ဆေးဝါးများ လိုအပ်နေကြောင်း စစ်ရှောင်ကူညီပေးနေသည့် ကော်မတီများက ပြောကြားလိုက်သည်။
သျှမ်းပြည် တောင်ကြီးခရိုင် ပင်လောင်းမြို့နယ်တွင် ရာသီကူးပြောင်းချိန် စတင်နေ ပြီးဖြစ်သဖြင့် တစ်ရက်ထက်၊ တစ်ရက်ပိုအေး လာကာ စစ်ဘေးရှောင် ပြည်သူများ အတွက် စောင်နှင့် အနွေးထည်များ လိုအပ်နေကြောင်း စစ်ဘေးရှောင်ကူညီသူ တစ်ဦးက သျှမ်းသံတော်ဆင့်ကို ပြောသည်။
“ဒီတပတ်အတွင်း ကျနော်တို့ စောင်တွေ သွားပို့ပေးဖို့တော့ ရှိတယ်ဗျ။ လောက်ငှ အောင်တော့ မဟုတ်ပါဘူး။ အဓိကတော့ အသက်ကြီးပိုင်း ၆၀ နှစ်အထက်တွေ၊ သူတို့ အဝတ်အထည်တွေတော့ လုံလောက်မှု မရှိသေးဘူး ” ဟု စစ်ဘေးရှောင်ကူညီသူ အမျိုးသားတစ်ဦးကပြောသည်။
မိုးကာများဖြင့် တဲထိုးနေထိုင်သည့် သူများကို ဦးစားပေး ကူညီပေးသွားမည်ဖြစ်ကြောင်း၊ မိုးရာသီ နှင့် ဆောင်းရာသီ ကူးပြောင်း ချိန်ဖြစ်နေသည့် အတွက် ရာသီတုပ်ကွေး၊ ဖျားနာသူများ ရှိနေသဖြင့် ဆေဝါးများ လိုအပ်နေကြောင်း ဒေသခံများကပြောသည်။
“ရာသီဥတု အပြောင်းအလဲဆိုတော့ နှာစေး၊ချောင်းဆိုး တာတွေတော့ ရှိတာပေါ့။ ဆေးဝါးလုံလောက်မှု ကတော့ ဆေးဆိုင်တွေမှာ သွားဝယ် ရတာပေါ့။ ဆေးဝါတွေလာကူညီတာက သူတို့ တစ်လ၊ နှစ်လ တခါတော့ လာပေးပါတယ်”ဟု စစ်ဘေးရှောင်အမျိုးသမီးတစ်ဦးက ပြောသည်။
ပြီးခဲ့သည့် (အောက်တို့ဘလ) လကုန်လောက်တွင် ပင်လောင်း-ဖယ်ခုံ လမ်းကြောကို စစ်ကောင်စီနှင့် PNO တပ်ဖွဲ့တို့က စားနပ်ရိက္ခာတင်ဆောင်လာသည့် ကား၊ ကုန်တင်ကားများကို သွားလာခွင့်ပိတ်ထားသည့်အတွက်ကြောင့် စစ်ရှောင်စခန်းရှိ စစ်ရှောင်းများက စားနပ်ရိက္ခာ၊ဆေးဝါးများ အခက်အခဲဖြစ်နေကြောင်း သိရသည်။
