မြန်မာ – တရုတ်နယ်စပ်ဒေသ မူဆယ်မြို့နယ် စယ်လန့်ကျေးရွာတွင် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) နှင့် တအာင်း (ပလောင်) အမျိုးသားလွတ်မြောက်ရေးတပ်မတော် TNLA တို့ ထိတွေ့တိုက်ပွဲဖြစ်ပွားခဲ့ကြောင်း သတင်းသိရှိရသည်။
ယနေ့ (နိုဝင်ဘာလ ၇ ရက်) မနက်ပိုင်းအချိန်တွင် မူဆယ် – နမ့်ခမ်းကြားရှိ စယ်လန့်ကျေးရွာတွင် SSPP နှင့် TNLA တို့ ထိတွေ့တိုက်ပွဲဖြစ်ပွားခဲ့ကြောင်း ဒေသခံများထံမှ သိရသည်။
ရှမ်းပြည်တိုးတက်ရေးပါတီ (SSPP/SSA) အရာရှိတစ်ဦးက “ စစ်ကြောင်းထိုးရင်း နားလည်းမှုလွှဲပြီး မှားပစ်မိတာပါ။ တိုက်ပွဲကြီးဖြစ်တာတော့ မဟုတ်ဘူး။ အခု ဗဟိုအချင်းချင်း ဖြေရှင်းနေပါတယ် “ ဟု သျှမ်းသံတော်ဆင့်ကို ပြောသည်။
အဆိုပါ ထိတွေ့တိုက်ပွဲအတွင်း SSPP ဘက်မှ ၂ ဦး သေဆုံးပြီး ထိခိုက်ဒဏ်ရာရသူအချို့ရှိကြောင်း သိရှိရသော်လည်း သီခြားအတည်ပြု၍ မရပေ။
တစ်ဖက်တွင်လည်း တအာင်း (ပလောင်) အမျိုးသားလွတ်မြောက်ရေး တပ်မတော် TNLA တို့က “ ၁၀၂၇ စစ်ဆင်းရေး “ ဖြင့် စစ်ကောင်စီကို ဆင်နွှဲနေလျက်ရှိသည်။
