မြန်မာ – တရုတ်နယ်စပ်ဒေသ နမ့်ခမ်းမြို့တွင် စစ်ကောင်စီတပ် နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့အကြား တိုက်ပွဲကြောင့် ဘုန်းကြီးကျောင်း အပါအဝင် နေအိမ် အများအပြား ပျက်စီးသွားခဲ့ကြောင်း စုံစမ်းသိရသည်။
ယနေ့ ( နိုဝင်ဘာလ ၇ ရက် ) နံနက် ၆ နာရီဝန်းကျင်တွင် နမ့်ခမ်းမြို့လယ်ဘုရားကျောင်းဝန်းတပ်စွဲထားသော စစ်ကောင်စီတပ်ဖွဲ့များအား အပြီးသတ် ရှင်းလင်းနိုင်ခဲ့ပြီး လက်နက် နှင့် စစ်အသုံးအဆောင်ပစ္စည်းများ သိမ်းဆည်းရမိကြောင်း TNLA က ထုတ်ပြန်ထားသည်။
အဆိုပါ တိုက်ပွဲထဲတွင် စစ်ကောင်စီတပ်မှ ဘုန်းကြီးကျောင်းအတွင်း ဝင်ရောက်တပ်စွဲနေထိုင်သောကြောင့် နှစ်ဖက် အပြန်အလှန် ပစ်ခတ်တိုက်ခိုက်ခဲ့ကြရာ ဘုန်းကြီးကျောင်း အပါအဝင် အနီးတဝိုက်ရှိ ကား၊ ဆိုင်ခန်း နှင့် နေအိမ် အများအပြား ထိမှန်ပျက်စီးသွားခဲ့သည်ဟု နမ့်ခမ်းမြို့ဒေသခံတစ်ဦးက ပြောသည်။
“ လျှပ်စစ်ဆိုင်တွေ၊ အိမ်တွေကော ထိတယ်။ အမိုးတွေ ပေါက်ကုန်တာ။ မြို့လယ်ဘုရားကျောင်းဝင်းကတော့ တော်တော်ထိသွားတယ်။ ဒီနေ့ မြို့လယ်ဘုရားကျောင်းမှာရှိတဲ့ စစ်ကောင်စီ တပ်သား (၁၅) ယောက်လောက်ကိုလည်း TNLA က အရှင်ဖမ်းသွားတာတွေ့တယ် “ ဟု ၎င်း ဒေသခံတစ်ဦးက ပြောသည်။
တိုက်ပွဲသည် ယမန်နေ့ (နိုဝင်ဘာလ ၆ ရက်) မွန်းလွဲ ၂ နာရီကျော် အချိန်မှစ၍ ဖြစ်ပွားကာ ၁၆ နာရီကျော်အကြာ နှစ်ဖက်တပ်ဖွဲ့ အပြန်အလှန် ပစ်ခတ်မှု ဖြစ်ပွားခဲ့ပြီးနောက် TNLA မှ ဝင်ရောက်သိမ်းပိုက်နိုင်ခဲ့သည်။
လက်ရှိမှာ နမ့်ခမ်းမြို့နယ် စခန်း ၁ ကုန်းမှလွဲ၍ တမြို့လုံးနီးပါးကို တအာင်း (ပလောင်) အမျိုးသားလွတ်မြောက်ရေး တပ်မတော် TNLA တို့က ထိန်းချုပ်ထားနိုင်သည့် အခြေအနေ ရောက်ရှိနေပြီ ဖြစ်ကြောင်း ခိုင်မာသည့် သတင်းရင်းမြစ်တစ်ဦးက ဆက်ပြောသည်။
“အခုမြို့လယ်ဘုရားကျောင်းမှာရှိတာက စစ်ကောင်စီ တပ်သားတချို့နဲ့ ပြည်သူ့စစ်တွေပဲရှိတယ်။ စစ်ကောင်စီ အင်အား ၁၀၀ ကျော်လောက်က နမ့်ခမ်းဖောင်ချောင်းအတိုင်းဆင်းပြီး စခန်း ၁ ကုန်းကို ရောက်ကုန်ပြီ။ ပြောချင်တာတော့ နမ့်ခမ်းမြို့တခုလုံးကို TNLA က ဝိုင်းထားပြီ။ စခန်း ၁ ကုန်းကို သွားမတိုက်တာပဲရှိတယ် “ ဟု ခိုင်မာသည့် သတင်းရင်းမြစ်တစ်ဦးက ပြောသည်။
ထို့အပြင် သျှမ်းမြောက်ဒေသ “ ၁၀၂၇ စစ်ဆင်ရေး “ ၁၁ ရက်ကြာ ကာလအတွင်း သံလွင်မြစ်အရှေ့ခြမ်းကို ညီနောင်မဟာမိတ် ၃ ဖွဲ့တို့က ထိန်းချုပ်ထားနိုင်ပြီဖြစ်ကြောင်း MNDAA မှထုတ်ပြန်ထားသည်။
Leave a Comments