သျှမ်းပြည် ရွာငံမြို့နယ်တွင် စစ်ကောင်စီ က အရပ်သားကားများကို အသုံးပြုပြီး ထောက်ပို့ ပြုလုပ်နေကြောင်း စုံစမ်းသိရသည်။
ယခုလ နိုဝင်ဘာ ၂ ရက်မှစပြီး စစ်ကောင်စီသည် အရပ်သား ကားများကို တစ်ရပ်ကွက်လျှင် ကား၂ စီး အလှည့်ကျ ဂိတ်တွင် ထားပေးရပြီး စစ်ယာဥ်တန်း အဖြစ် ထောက်ပို့ အနေဖြင့် အသုံးပြု လုပ်ဆောင်နေကြောင်း ဒေသခံများက သျှမ်းသံတော်ဆင့်ကို ပြောသည်။
“ရွာတိုင်းရွာတိုင်း ကားစာရင်း လုပ်ထားရတယ်၊ ရပ်ကွက်လိုက်ပေါ့ ကား နှစ်စီး သွားထားပေးရတယ်၊ နှစ်ပတ် တိတိ ထားပေးရတာပေါ့၊ နှစ်ပတ်ပြည့်လို့မှ သူတို့ မလို လို့ရှိရင် သွားယူခွင့်ရှိတာ၊ ပြီးနောက်ထပ် နှစ်စီးပြန်သွားထားပေးရတာပေါ့နော်” ဟု ရွာငံဒေသခံ အမျိုးသမီးတစ်ဦးက ပြောသည်။
ရွာငံမြို့နယ်ရှိ သိမ်ကုန်းကျေးရွာ၊ အင်းကြီးကျေးရွာ၊ ထန်းလှပင်ကျေးရွာ စသည့် ရွာငယ်များကအစ စာရင်းကောက်ထားကြောင်း၊ ယူသုံးထားသည့် ကားများ တစ်စုံတစ်ရာဖြစ်ခဲ့လျှင်လည်း စစ်ကောင်စီမှ တာဝန်ယူ ပြုပြင်ပေးခြင်းမရှိသလို ဒေသခံများက ဆီအပြည့်ပါ ထည့်ပေးရကြောင်း သိရသည်။
ရွာငံမြို့နယ်အတွင်း လှုပ်ရှားနေသည့် စစ်ကောင်စီသည် အရပ်သားပြည်သူများကို နည်းမျိုးစုံ လူ့အခွင့်အရေးချိုးဖောက်မှုများ ပြုလုပ်နေကြောင်း သိရသည်။
