သျှမ်းပြည် ကျောက်မဲနှင့်နောင်ချိုမြို့အကြားရှိ ဂုတ်တွင်းလမ်းပိုင်းတွင် စစ်ကောင်စီတပ်နှင့် TNLA ၊ မန္တလေး-PDF ပူးပေါင်းတပ်ဖွဲ့တို့ တိုက်ပွဲပြင်းထန်ကာ နှစ်ဘက်ထိခိုက် သေဆုံးမှုရှိကြောင်း စုံစမ်းသိရသည်။
ကျောက်မဲမြို့နယ် ဂုတ်တွင်းလမ်းပိုင်းတွင် နေရာယူထားသော စစ်ကောင်စီတပ်စခန်းအား TNLA တပ်ဖွဲ့နှင့် မန္တလေး-PDF ပူးပေါင်းတပ်ဖွဲ့တို့သည် ယနေ့ (နိုဝင်ဘာလ ၆ ရက်) နံနက် ၈ နာရီခွဲခန့်မှ စတင်တိုက်ခိုက်ခဲ့ကြောင်း နောင်ချိုဒေသခံများက ပြောသည်။
“ဂုတ်တွင်းထဲမှာ ရှိနေကြတဲ့ စစ်ကောင်စီတပ်နဲ့ ညီနောင်မဟာမိတ်တပ်တွေ မြေပြင်မှာအရင် ထိတွေ့တိုက်ပွဲ ဖြစ်တယ်ကြားတယ်။ ဒီမနက် ၁၀ နာရီလောက်အထိ သေနတ်တွေ ကြားနေတာ။ နေ့လယ် ၁၂ နာရီလောက်ကျတော့ စစ်ကောင်စီတပ်ဘက်က လေကြောင်းစစ်ကူနဲ့ လာပစ်တယ်။ ဗုံးလာကျဲတာထင်တယ်၊ အသံတွေ အကျယ်ကြီးကြားနေရတာ။ ဂုတ်တွင်းထဲမှာ လေယာဉ်နဲ့ လာဝဲနေတာ ၁ နာရီလောက်တောင် ကြာတယ်”ဟု နောင်ချိုမြို့ဒေသခံတစ်ဦးက သျှမ်းသံတော်ဆင့်ကို ပြောသည်။
ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသည့် စစ်ကား ၄၀ စီးခန့်နှင့် သံချပ်ကာ ၂ စီးပါ စစ်ကောင်စီယာဉ်တန်းကိုလည်း TNLA တပ်ဖွဲ့နှင့် မန္တလေး-PDF ပူးပေါင်းတပ်ဖွဲ့တို့သည် နောင်ချိုမြို့နယ် အုမ္မသီးလမ်းခွဲနှင့် ရေမောင်းတန်းကျေးရွာတို့တွင် ဖြတ်တောက်တိုက်ခိုက်ရာ စစ်ကောင်စီတပ်မှာ ရှေ့မတိုးနိုင်ဖြစ်သဖြင့် လေကြောင်းမှ နေ့ရောညပါ ဗုံးကျဲတိုက်ခိုက်နေသည်။
“ဒီနေ့ (နိုဝင်ဘာ ၆ ရက်)မှာ နောင်ချို ဒါမှမဟုတ် ကျောက်မဲဘက်ကို စစ်ကောင်စီတပ်တွေ ရအောင် ဝင်လာမယ်လို့ ပြောသံကြားရတယ်ပေါ့နော်။ ကျောက်ကြမ်းတို့ ရွှေညောင်ပင်တို့မှာ အရင်ချနေကြတာ၊ အဲ့ကနေ ဂုတ်တွင်းဘက် ရောက်လာတာပဲလေ။ ဘယ်လိုပဲဖြစ်ဖြစ် သူတို့ကတော့ ဘယ်ဘက်ကမှ ဂုတ်တွင်းကိုကျော်ပြီး သျှမ်းမြောက်ဘက်ကို ပေးမတက်လောက်ဘူး။ အခု ဂုတ်တွင်းမှာ ချနေတာကြလဲ စစ်ကောင်စီဘက်ကရော၊ TNLA နဲ့ PDF ဘက်ကရော နှစ်ဘက်အကျအဆုံးရှိတယ် ပြောတယ်”ဟု နောင်ချိုမြို့မှ ၎င်းဒေသခံက သျှမ်းသံတော်ဆင့်ကို ဆက်ပြောသည်။
လက်ရှိတွင် မန္တလေး-လားရှိုး ပြည်ထောင်စုလမ်းမကြီးရှိ ဂုတ်တွင်းလမ်းပိုင်းကို TNLA တပ်ဖွဲ့နှင့် မန္တလေး-PDF ပူးပေါင်းတပ်ဖွဲ့တို့က ကျောက်မဲဘက်ခြမ်းတွင် မြောင်းတူးကာ လမ်းပိတ်ဆို့ထားပြီး သျှမ်းမြောက်သို့ ထိုးစစ်ဆင်ရန် အင်အားဖြည့်တင်းလာသည့် စစ်ကောင်စီတပ်များကို နောင်ချိုမြို့နယ်တွင် ဖြတ်တောက်တိုက်ခိုက်နေသည်ဟု သိရသည်။
