သျှမ်းပြည် လွိုင်လင်ခရိုင်၊ မိုင်းရှူးခရိုင်၊ နမ့်စန်ခရိုင်(တောင်)တို့တွင် ပြောင်းစိုက်ပျိုးသည့် တောင်သူများသည် စိုက်ပျိုးခင်ကာလက ကုန်ကျသည့်စရိတ် ပြန်မရလောက်အောင် အရှုံးပေါ်နေကြောင်း စုံစမ်းသိရသည်။
နိုင်ငံရေးရှုပ်ထွေးမှု၊ ကုန်စျေးနှုန်းမြင့်တက်မှုကြောင့် ဓာတ်မြေသြဇာစျေးနှုန်းမှာ အလိုအလျောက် စျေးတက်နေသော်လည်း ပြောင်းစျေးမှာ တစ်ပိဿာလျှင် ကျပ် ၁၀၀၀ အောက်အထိ စျေးကျနေကြောင်း ပြောင်းစိုက်တောင်သူများက ပြောသည်။
“ရှုံးတာပေါ့၊ ဒီနှစ်က ဓာတ်မြေသြဇာတွေ ဈေးတက်တာလေ။ တချို့တွေဆို ပြောင်း ၁ အိတ်ကို ၃ သောင်းကျော်လောက် ရမယ်လို့ မှန်းထားတာ”ဟု မိုင်းရှူးမြို့နယ်မှ ပြောင်းစိုက်တောင်သူတစ်ဦးက သျှမ်းသံတော်ဆင့်ကို ပြောသည်။
ထို့အပြင် ပြောင်းစိုက်တောင်သူများသည် ပြောင်းကို သိုလှောင်ထားရန် ပြင်ဆင်နေပြီး ပြောင်းစျေးတက်လာမှ ရောင်းရန်လည်း စီစဉ်နေကြကြောင်း ပြောင်းစိုက်တောင်သူများက ပြောသည်။
“နည်းနည်းစိုက်တဲ့ သူကတော့ရှုံးတယ်၊ များများစိုက်တဲ့သူကတော့ ကျန်တာနည်းတာပေါ့၊ ကုန်ဈေးနှုန်းတွေ တက်တာနဲ့ဆိုတော့ တော်တော်များများ ရှုံးကြတယ်။ ကျတော်ကတော့ ဒီဇင်ဘာလလောက်မှ ရောင်းမှာ၊ နှစ်ကုန်ခါနီး အချိန်တွေဆိုရင် ပြောင်းဈေးက တက်လေ့ရှိတယ်လေ”ဟု ခိုလမ်မြို့နယ်မှ ပြောင်းစိုက်တောင်သူတစ်ဦးက သျှမ်းသံတော်ဆင့်ကို ပြောသည်။
မိုင်းရှူး၊ ပင်လုံ၊ ခိုလမ်၊ ဆီဆိုင်မြို့တို့တွင် ပြောင်းများကို ဝယ်ယူသူများမှာ မရှိသလောက် ရှားပါးနေပြီး ဝယ်နေကြသူများလည်း သိပ်မဝယ်ရဲဘဲ ဖြစ်နေကာ ပြောင်းစိုက် တောင်သူများကလည်း ဈေးကောင်းရရန် စောင့်မျှော်နေခြင်းကြောင့် အရှုံးခံနေရကြောင်း ဒေသခံများကပြောသည်။
ပြီးခဲ့သည့် ၂၀၂၂ ခုနှစ် စက်တင်ဘာလတွင် ပြောင်းဖူး ပိဿာ ၃၀ တစ်အိတ်ကို ၂၈၀၀၀ ကျပ်မှ ၂၉၀၀၀ ကျပ်အထိ ဈေးပေါက်သော်လည်း ယခု ၂၀၂၃ ခုနှစ်တွင် ပိဿာ ၃၀ တစ်အိတ်ကို ၂၆၀၀၀ မှ ၂၇၀၀၀ ကျပ်ခန့်သာ ဈေးရှိကြောင်း သိရသည်။
