သျှမ်းပြည် နောင်ချိုမြို့နယ် ဆမ္မဆယ်ကျေးရွာအုပ်စုတွင် တပ်စွဲထားသည့် စစ်ကောင်စီတပ်က ကျေးရွာများမှ စစ်ဘေးရှောင်မည့် ပြည်သူများကို ပစ်သတ်ပြီး၊ လူငယ်များကို လူသားဒိုင်းကာ ပြုလုပ်ရန် ဖမ်းဆီးခေါ်ဆောင်သွားကြောင်း စုံစမ်းသိရသည်။
နောင်ချိုမြို့နယ် အုမ္မသီးလမ်းခွဲနှင့် ရေမောင်းတန်းကျေးရွာတို့၌ တပ်စွဲထားသည့် စစ်ကောင်စီတပ်က ယမန်နေ့ (နိုဝင်ဘာလ ၅ ရက်)တွင် ဆမ္မဆယ်အုပ်စု ကျေးရွာများမှ စစ်ဘေးရှောင်မည့် ပြည်သူများကို ချောင်းမြောင်းပစ်ခတ်ခဲ့ရာ အမျိုးသား ၁ ဦးသေဆုံးပြီး ၂ ဦးထိခိုက် ဒဏ်ရာရရှိခဲ့သည်ဟု တိုက်ပွဲအတွင်း ပိတ်မိနေသည့် နောင်ချိုဒေသခံတစ်ဦးက ပြောသည်။
“ရေမောင်းတန်းမှာရှိတဲ့ ကောင်လေးတစ်ယောက်ကို စစ်ကောင်စီတပ်က သေနတ်နဲ့ ပစ်သတ်လိုက်တာ။ အဲ့ဒီကောင်လေးက ရွာကနေ ထွက်ပြေးမလို့ ဆိုင်ကယ်နဲ့ထွက်သွားတာ၊ သေနတ်မှန်ပြီးတော့ သေသွားတယ်။ နောက်ထပ် သားအဖနှစ်ယောက်ကလည်း ဆိုင်ကယ်နဲ့ပဲ ထွက်သွားတာ။ အခြေအနေ သတိမထားမိဘူးထင်တယ်၊ စစ်သားတွေက သေနတ်နဲ့ပစ်တာ ခြေထောက်မှန်ပြီးတော့ အခု ဆေးရုံတင်ထားရတယ်။ စစ်သားတွေက အုမ္မသီးလမ်းခွဲ အိမ်တွေထဲကနေ ချောင်းပစ်တာ”ဟု နောင်ချိုမြို့နယ်မှ တိုက်ပွဲအတွင်း ပိတ်မိနေသည့် ဒေသခံတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်မှ သေနတ်ပစ်ခံရပြီး သေဆုံးသွားသူမှာ အသက် ၃၀ အရွယ် အမျိုးသားဖြစ်ပြီး ထိခိုက်ဒဏ်ရာရသူနှစ်ဦးမှာ ခြေသလုံးနှင့် ပေါင်တို့တွင် သေနတ်ထိမှန်ပြီး မန္တလေးသို့ ဆေးကုသရန် ပို့ဆောင်ထားသည်ဟု ၎င်းဒေသခံက ဆက်ပြောသည်။
ထို့အပြင် ယမန်နေ့ (နိုဝင်ဘာ ၄ ရက်)က အုမ္မသီးကျေးရွာအနီး နမ့်တိန်းဝမ်းနှင့် ဆိုက်ခေါင်ကျေးရွာတို့မှ လူငယ်များကိုလည်း လူသားဒိုင်းကာအဖြစ် စစ်ကောင်စီတပ်က ဖမ်းဆီးခေါ်ဆောင်သွားကြောင်း နောင်ချိုဒေသခံများက ပြောသည်။
“မနေ့က(နိုဝင်ဘာ ၅ ရက်) ညနေ ၅ ခွဲ ၆ နာရီလောက် အဲ့ချိန်ဆမ္မဆယ်မှာ တိုက်ပွဲ အရမ်းပြင်းနေတာ။ လေယာဉ်သံက အကျယ်ကြီး မကြားရဘူး။ အရင်ရက် (နိုဝင်ဘာ ၄ ရက်)ကလည်း စစ်ကောင်စီတပ်က စစ်ဆေးရေး အရမ်းကြမ်းတာ။၊ အုမ္မသီး နမ့်တိန်းဝမ်းဘက်က ပြည်သူ ၁၁ ယောက်ကို ဖမ်းသွားပြီး သူတို့ လူသားဒိုင်းကာ လုပ်နေတာ။ ကျေးရွာ ၂ ရွာက လူတွေကိုလဲ ဖမ်းသွားတယ်။ လက်နက်ကြီးနဲ့လဲ ရွာထဲကို သုံးခါ လေးခါ ပစ်လာတာ။ ဆမ္မဆယ်မှာက နေအိမ်တွေ အများကြီး ထိတယ်”ဟု နောင်ချိုမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် နိုဝင်ဘာလ ၃ ရက်ကလည်း အုမ္မသီးနှင့် ဆိုက်ခေါင်ကျေးရွာတို့မှ အသက် ၂၀ ကျော်အရွယ် လူငယ်အမျိုးသား ၃ ဦးကို စစ်ကောင်စီတပ်မှ ဖမ်းဆီးခေါ်ဆောင်သွားပြီး တစ်ဦးသာ ပြန်လည် လွတ်မြောက်လာသေးသည်ဟု နောင်ချိုမြို့ အုမ္မသီးဒေသခံတစ်ဦးက ပြောသည်။
ထို့အတူ နောင်ချိုမြို့နယ် ကျောက်ကြမ်းကျေးရွာတွင်လည်း နိုဝင်ဘာ ၃ ရက်က လူငယ် ၇ ဦးကို စစ်ကောင်စီတပ်က ဖမ်းဆီးခေါ်ဆောင်သွားပြီး ၄ ဦးပြန်လည် လွတ်မြောက်လာကာ ကျန် ၃ ဦးမှာ ဆက်လက်ဖမ်းဆီးခံထားရကြောင်း သိရသည်။
နောင်ချိုမြို့နယ်တွင် စစ်ကောင်စီတပ်နှင့် TNLA ၊ မန္တလေး-PDF ပူးပေါင်းတပ်ဖွဲ့တို့အကြား တိုက်ပွဲပြင်းထန်နေပြီး စစ်ကောင်စီတပ်မှ လက်နက်ကြီးနှင့် ဂျက်ဖိုက်တာဖြင့် လေကြောင်းမှ ဗုံးကျဲတိုက်ခိုက်လာခြင်းကြောင့် ဆမ္မဆယ်ကျေးရွာအုပ်စုအတွင်း ကုန်စုံဆိုင် ၁ ဆိုင် မီးလောင်ပြီး ပြည်သူနေအိမ်များ ထိခိုက်ပျက်စီးသွားကြောင်း ဒေသခံများက ပြောသည်။
လက်ရှိတွင် နောင်ချိုမြို့နယ်အတွင်း “၁၀၂၇ စစ်ဆင်ရေး”ကြောင့် စစ်ဘေးရှောင်ဦးရေ ၂၅၀၀ ကျော် ရှိလာပြီး သဖန်းကိုင်း၊ သုံးဆယ်၊ ငို့ကလေး၊ အင်းဝိုင်း၊ ဘန့်ဘွေးနှင့် ပြင်ဦးလွင်မြို့များရှိ ဘုန်းကြီးကျောင်းများတွင် ထွက်ပြေးတိမ်းရှောင်နေရသည်ဟု သိရသည်။
