Saturday, July 20, 2024

လောက်ကိုင်တွင် ကုန်စျေးနှုန်းများ အဆမတန် မြင့်တက်နေ

Must read

သျှမ်းပြည်မြောက်ပိုင်း လောက်ကိုင်မြို့တွင် အခုရက်ပိုင်းအတွင်း ကုန်စျေးနှုန်းများ အဆမတန် မြင့်တက်နေပြီး စစ်ကောင်စီမှ ဖုန်းလိုင်းများပါ ဖြတ်တောက်ထား‌သောကြောင့် ဒေသခံများ အခက်အခဲ ဖြစ်နေကြရကြောင်း သိရသည်။

အောက်တိုဘာလ ၂၇ ရက်မှ စတင်ခဲ့သော သျှမ်းမြောက် ညီနောင်မဟာမိတ် သုံးဖွဲ့တို့နှင့် စစ်ကောင်စီတပ်တို့၏ တိုက်ပွဲများ အရှိန်မြင့်လာသည့်နှင့်အမျှ ပြည်ထောင်စု လမ်းမကြီးများပေါ် ကုန်စည်ကူးသန်းခြင်းများပါ ရပ်တန့်သွားသောကြောင့် ကုန်ပစ္စည်းအားလုံး တဟုန်ထိုးဈေးတက်သွားသည့်အပြင် နိုဝင်ဘာလ ၂ ရက်နေ့မှစ၍ စစ်ကောင်စီမှ ဆယ်သွယ်ရေး ဖုန်းလိုင်းများပါ ဖြတ်တောက်ထားသည်ဟု သိရသည်။

Photo – Credit ( ကုန်စျေးနှုန်း အလုအယက်ဝယ်သူများ)

လမ်းပန်းဆက်သွယ်ရေး ပြတ်တောက်ပြီး ကုန်စျေးနှုန်း အဆမတန် မြင့်မားလျက်ရှိသည့် လောက်ကိုင်မြို့တွင် ယခင်က ဆန်ချောတစ်အိတ်လျှင် ငွေကျပ်တစ်သိန်းကျော်မှ ယခု ကျပ်လေးသိန်း ၊ ဆန်ကြမ်း တအိတ်လျှင် ကျပ်တစ်သိန်းနှစ်သောင်းမှ ကျပ်နှစ်သိန်းကျော်အထိ ပေးဝယ်နေရပြီး ကြက်ဥ တစ်ကပ်လျှင် ယခင် ကျပ်တစ်သောင်းနှစ်ထောင်မှ ယခု ကျပ်သုံးသောင်း ၊ ယခင် ကျပ်ငါးရာတန်ခေါက်ဆွဲ ခြောက်တစ်ထုပ်က ယခုအခါ ကျပ်တစ်ထောင်ငါးရာအထိ ပေးဝယ်နေရသည့်အတွက် မြန်မာရွှေ့ပြောင်းအလုပ်သမားများအနေဖြင့် ခက်ခဲကျပ်တည်းစွာ ရပ်တည်နေရကြောင်း စုံစမ်းသိရှိရသည်။

“လမ်းတွေပိတ် ကုန်ကားတွေလည်း မရောက်လာဆိုတော့ ပစ္စည်းပြတ်နေချိန်လေး တရုတ်ဘက်က ဆန် လာရောင်းတော့ အကုန်အလုအယက် တိုးဝှေ့ဝယ်ကြတာပေါ့နော်။ စစ်ဖြစ်နေတဲ့အချိန် လက်ထဲ ပိုက်ဆံကိုင်ထားလို့ အလကားဘဲလေ” ဟု လောက်ကိုင်မြို့ခံ တစ်ဦးမှ သျှမ်းသံတော်ဆင့် သို့ ပြောသည်။

လက်ရှိအခြေအနေတွင် တရုတ်နယ်စပ်မြို့ဖြစ်သည့် လောက်ကိုင်မြို့ ၌ လိုအပ်နေသည့် အခြေခံ စားကုန်များကို တရုတ်ပြည်ဘက် မှ ပြန်လည်တင်သွင်းရောင်းချနေကြပြီး နေ့စဉ် ငွေလဲလှယ်နှုန်းထားများအရ ဈေးနှုန်းအတက်အကျဖြင့် ဝယ်ယူနေကြရကြောင်း ဒေသခံများထံမှ သိရသည်။

ပြီးခဲ့သည့်ရက်ပိုင်းက တရုတ်ပြည်ဘက်မှ ၁၂ ဘီးကားကြီးများဖြင့် လာရောက်ရောင်းချပေးခဲ့သော ပုံမှန်ဆန် အမျိုးအစား ၁၀ ပြည်ပါအိတ် တစ်အိတ်လျှင် ယွမ် ၂၅၀ မှ ၃၀၀ ( မြန်မာငွေကျပ်တစ်သိန်းကျော်) အထိ ပေးဝယ်ခဲ့ရပြီး လူတစ်ဦးလျှင် တစ်အိတ်နှုန်း အကန့်အသတ်ဖြင့်သာ ရရှိကြောင်းလည်း သိရသည်။

ထို့အပြင် လက်ရှိမှာ ဖုန်းလိုင်း အဆင်မပြေမှု အင်တာနက်လိုင်းများ ပြတ်တောက်ခံရမှုကြောင့် မိသားစုနှင့် ဆက်သွယ်ရန် ခက်ခဲနေကြောင်း လောက်ကိုင်မြို့ရောက် ရွှေ့ပြောင်းအလုပ်သမားတစ်ဦးက သျှမ်းသံတော်ဆင့်ကိုပြောသည်။

“အရင်က တခြားလိုင်းတွေ မရလည်း သူတို့ထုတ်တဲ့ Mytel ကဒ်တော့ ရသေးတယ်။ အခုကျတော့ Mytel တွေပါမရတော့ဘူး။ အင်တာနက်လိုင်း မပျက်ဖို့ ဆုတောင်းနေရတယ်။ တရုတ်ဖုန်းဘေတို့ ၊ Wifi တို့က စျေးအရမ်းကြီးတော့ အခုချိန် ဝယ်မသုံးနိုင်ဘူးလေ။ ပြန်ဖို့ကလည်းမရ ရှေ့ဆက်ဖို့ကို တော်တော်ခက်နေပြီ ” ဟု ၎င်းကဆိုသည်။

လောက်ကိုင်မြို့တွင် ရွှေ့ပြောင်းအလုပ်သမား အများအပြားလည်း ပိတ်မိနေရာ ထိုင်းနိုင်ငံသား ၁၆၅ ဦး အပါအဝင် နီပေါ၊ လာအို နှင့် အီသီယိုးပီယားနိုင်ငံတို့မှ နိုင်ငံခြားသား ၅၀၀ ခန့် ပိတ်မိနေကြောင်း Thai သတင်းများ၏ ဖော်ပြချက်အရ သိရသည်။

Leave a Comments

- Advertisement -spot_img

Latest article