ညီနောင်မဟာမိတ် ၃ ဖွဲ့က စစ်ကောင်စီတပ်ကို ဆင်နွှဲနေသည့် “၁၀၂၇ စစ်ဆင်ရေး”အတွင်း နှစ်ဘက်တပ်ဖွဲ့များသည် ပြည်သူကို အကာအကွယ်ယူပြီး တိုက်ခိုက်နေကြကြောင်း စုံစမ်းသိရသည်။

သျှမ်းပြည် နောင်ချိုမြို့နယ်တွင် ထိုးစစ်ဆင်ရန် အင်အားဖြည့်တင်းလာသည့် စစ်ကောင်စီယာဉ်တန်းကို TNLA နှင့် မန္တလေး-PDF ပူးပေါင်းတပ်ဖွဲ့က ယမန်နေ့ (နိုဝင်ဘာ ၁ ရက်)မှ စ၍ ဖြတ်တောက်တိုက်ခိုက်ခဲ့ရာ စစ်ကောင်စီတပ်သားများမှာ နောင်ချိုမြို့နယ် အုမ္မသီး လမ်းခွဲနှင့် ရေမောင်းတန်းကျေးရွာများရှိ ပြည်သူနေအိမ်များတွင် ဝင်ရောက်နေရာယူပြီး တိုက်ခိုက်နေကြောင်း နောင်ချိုဒေသခံများက ပြောသည်။

“အုမ္မသီးလမ်းခွဲနဲ့ ရေမောင်းတန်းရွာတွေမှာ လမ်းမကြီးဘေးက အိမ်တိုင်းနီးပါးကို စစ်ကောင်စီတပ်သားတွေ ဝင်နေရာယူထားကြတာ။ အိမ်ကြီးအိမ်ကောင်းတွေမှာ သူတို့ခွဲနေကြတာ။ သူတို့လဲ သေမှာကြောက်တယ်ထင်တယ်၊ သူတို့လွတ်မယ်ထင်တဲ့ အိမ်တွေထဲကို ဝင်နေကြတာ။ အိမ်တွေထဲလဲ အကုန်ဝင်မွှေတယ်၊ ရှိတာတွေလဲ အကုန်ယူစားသွားတယ်၊ သူတို့လိုချင်တာ ရှိရင်လဲ ယူသွားတယ်”ဟု နောင်ချိုမြို့ အုမ္မသီးဒေသခံတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် နောင်ချိုမြို့နယ် အုမ္မသီးလမ်းခွဲနှင့် ရွှေညောင်ပင်ကျေးရွာတို့တွင် စစ်တပ်က စစ်ကား အစီး ၃၀ ကျော်နှင့် သံချပ်ကာ ၂ စီးတို့ဖြင့် အခိုင်အမာ တပ်စွဲထားပြီး ပြည်သူများကို အကာအကွယ်ယူကာ တိုက်ခိုက်နေကြောင်း နောင်ချိုဒေသခံများက ပြောသည်။

အလားတူ မြန်မာ-တရုတ်နယ်စပ် နမ့်ခမ်းမြို့တွင်လည်း စစ်ကောင်စီတပ်နှင့် TNLA တပ်ဖွဲ့တို့အကြား ဖြစ်ပွားနေသည့် တိုက်ပွဲများအတွင်း TNLA တပ်သားများက ပြည်သူနေအိမ်များကို အကာအကွယ်ယူပြီး ပစ်ခတ်နေကြောင်း နမ့်ခမ်းမြို့ ဒေသခံများက ပြောသည်။

“ပေါက်နေ၊ ကောင်းနောင်မို၊ ဈေးတန်းနဲ့ နမ့်ခမ်းမြို့မဈေး အနီးတဝိုက်က ပြည်သူတွေရှိတဲ့ အိမ်ရှေ့နားမှာ TNLA စစ်သားတွေ နေတာ။ ပြည်သူအိမ်ကို အကာအကွယ်လုပ်ပြီး ပစ်လိုက်တယ်၊ ပစ်ပြီး သူတို့ထွက်ပြေးသွားတယ်။ စစ်ကောင်စီတပ်က ပစ်လာတဲ့ဘက်ကို လက်နက်ကြီး လက်နက်ငယ်တွေနဲ့ ပြန်ပစ်လာတာ။ ခံရတာက ပြည်သူတွေပဲ”ဟု တိုက်ပွဲကြား ပိတ်မိနေသည့် နမ့်ခမ်းမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ လက်နက်ကိုင်တပ်ဖွဲ့ဝင် စစ်သားများက အရပ်သားပြည်သူတို့၏ မြေ၊ အိမ်ယာ၊ အဆောက်အဦတို့ကို လေးစားမှုမရှိဘဲ အရပ်သားပြည်သူများကို အကာအကွယ်ယူကာ တိုက်ပွဲပစ်ခတ်မှု ဖြစ်ပွားခြင်း၊ မြို့ရွာအတွင်း လူထုနှင့်အတူ ရောနှောနေထိုင်ခြင်းတို့သည် ဂျီနီဗာ ကွန်ဗင်းရှင်း (Geneva Convention)၊ နိုင်ငံတကာ လူသားချင်း စာနာထောက်ထားမှုဆိုင်ရာ ဥပဒေ (IHL)နှင့် ဆန့်ကျင်သည့်အပြင် စစ်ရာဇာဝတ်မှု မြောက်သည်။

သျှမ်းပြည် မြောက်ပိုင်းရှိ မြို့နယ်များတွင် စစ်ကောင်စီတပ်နှင့် ညီနောင်မဟာမိတ် ၃ ဖွဲ့၊ ပြည်သူ့ကာကွယ်ရေးတပ်ဖွဲ့ PDF များ တိုက်ပွဲဆက်လက် ပြင်းထန်နေပြီး စစ်ကောင်စီတပ်မှ လေကြောင်းတိုက်ခိုက်မှုများ ခပ်စိပ်စိပ် ပြုလုပ်လာသည်။